قازاقستان ەلشىسى ناجمەدين مۇحامەتالى ومان سۇلتاندىعىنىڭ تۋريزم ءمينيسترى احمەد ءال-ماحريزيمەن كەزدەسىپ, قازاقستان مەن ومان اراسىنداعى تۋريستىك قارىم-قاتىناستاردىڭ احۋالى مەن بولاشاعىن تالقىلادى. بۇل تۋرالى ءسىم ءباسپاسوز قىزمەتى حابارلادى.
قازاقستان ەلشىسى 2019 جىلعى 30 قىركۇيەكتەن باستاپ ومان ازاماتتارى ءۇشىن قازاقستان اۋماعىندا 30 كۇندىك مەرزىمگە دەيىن ۆيزاسىز بولۋ ءتارتىبى ەنگىزىلگەنى تۋرالى مالىمدەدى. قازاقستان ديپلوماتى بۇل قادام تەك تۋريزم سالاسىنداعى قارىم-قاتىناستاردى عانا دامىتىپ قويماي, جالپى ساۋدا-ەكونوميكالىق ىنتىماقتاستىق پەن ارەكەتتەستىكتى ودان ءارى جەتىلدىرۋگە جول اشاتىنىنا سەنىم ءبىلدىردى. وسى رەتتە, ومان تاراپىنان قارىمتا شارالار كۇتەتىنىن جەتكىزدى.
ومان سۇلتاندىعىنىڭ تۋريزم ءمينيسترى ا.ءال-ماحريزي قازاقستاننىڭ بۇل شەشىمىن جوعارى باعالاپ, ريزاشىلىعىن ءبىلدىردى جانە ومان تاراپىنىڭ دا ءتيىستى قارىمتا شارالار قابىلداۋ قاجەتتىلىگىنە نازار اۋداردى. قازاقستان ازاماتتارىنا ومانعا ۆيزا راسىمدەۋدى جەڭىلدەتەتىنىن اتاپ ءوتتى. وسى ورايدا, ول العاشقى قادام رەتىندە ومان تاراپى قازاقستاندىق ازاماتتارعا ەلەكتروندىق ۆيزا ەنگىزەتىنىن جانە جاقىن بولاشاقتا قازاقستان ازاماتتارى (اقش جانە باسقا دا دامىعان باتىس ەلدەرىنىڭ ازاماتتارى سياقتى) ۆيزانى وماننىڭ تىكەلەي اۋەجايلارىندا جانە باسقا دا شەكارالىق بەكەتتەرىندە الۋ مۇمكىندىگىنە يە بولاتىنىن حابارلادى.
ا.ءال-ماحريزي ەلىمىزدىڭ تۋريستىك الەۋەتىن اتاپ ءوتىپ, قازاقستاننىڭ جوعارىدا اتالعان قادامىن قازاقستانعا باراتىن وماندىق تۋريستەر سانىنىڭ كۇرت ارتۋىنا الىپ كەلەتىنىنە سەنىم ءبىلدىردى. سونداي-اق تاراپتار جاقىن بولاشاقتا قازاقستان مەن ومان اراسىنداعى تىكەلەي اۋە رەيسىنىڭ اشىلۋىنا ءۇمىت ءبىلدىرىپ, اتالعان باعىتتا ءتيىستى شارالار قابىلداۋعا كەلىستى.