التىنجار اۋىلىنا جاقىنداعاننان-اق كوزگە شالىناتىن ءبىر ادەمى كورىنىس بار. ول – ۇلى كۇيشى قۇرمانعازىنىڭ كەسەنەسى. بيىك توبەنى بۇرىن ەل شايتاني باتاعا دەپ كەلىپتى. قازىر قۇرمانعازى توبەسى دەپ قۇرمەتپەن اتايدى.
عۇمىرىنىڭ سوڭعى جىلدارىن استراحان جەرىندەگى ساحما, التىنجار, قىزىلجار بويىندا وتكىزگەن قۇرمانعازى ساعىرباي ۇلىنىڭ ماڭگىلىك تىنىس تاپقان مەكەنى – وسى. رەسەيدىڭ استراحان وبلىسىنداعى التىنجار اۋىلىندا نەگىزىنەن قازاقتار تۇرادى. اتىراۋ ايماعىمەن شەكارالاس ورنالاسقاندىقتان دا بولسا كەرەك, ەكى ەل اراسىندا الىس-بەرىس پەن بارىس-كەلىس جاقسى جولعا قويىلعان. 1996 جىلى كۇيشى جەرلەنگەن ورىنعا كەسەنە تۇرعىزىلىپ, ونىڭ اشىلۋ سالتاناتىنا تۇڭعىش پرەزيدەنت نۇرسۇلتان نازارباەۆ قاتىسقان بولاتىن. 2005 جىلى مادەني ورتالىق اشىلدى. ەلباسىنىڭ: «قۇرمانعازى ساعىرباي ۇلى اتىنداعى كەشەن – كورشىلەس ەكى ەلدىڭ دوستىعى مەن مادەني بايلانىسىنىڭ تاعى ءبىر سيمۆولى» دەگەن ءسوزى مۋزەي قابىرعاسىنان ورىن العان. وتكەن جىلى اتىراۋ وبلىسى اكىمدىگى مەن جاناشىر ازاماتتاردىڭ قولداۋىمەن وسى ورتالىققا كۇردەلى جوندەۋ جاسالدى. ايماق باسشىسى نۇرلان نوعاەۆ جاقىندا التىنجارعا بارىپ, كەشەن جۇمىسىمەن تانىسىپ قايتتى. «قۇرمانعازى» وڭىرلىك مادەني ورتالىعىندا قازىر 40 قىزمەتكەر بار. ونىڭ 25-ءى – دومبىراشى. كەشەن جانىنان «سامال» قازاق مۋزىكالىق ءانسامبلى قۇرىلعان.
– جىل سايىن 1000-عا جۋىق قوناق كەلەدى, – دەيدى ورتالىقتىڭ باسشىسى امانگەلدى ابىلعازيەۆ. – كوپشىلىگىن كۇيشىنىڭ ءومىربايانى مەن ءومىر سۇرگەن كەزەڭىندەگى قازاقتاردىڭ تۇرمىس-تىرشىلىگى قىزىقتىرادى. مۋزەيدى دە وسى باعىتتاعى جادىگەرلەرمەن تولىقتىرۋعا جۇمىستانىپ جاتىرمىز.
الىستاعى التىنجار قۇرمان بابا جاتقان جەر رەتىندە دە كوڭىلىمىزگە جاقىن بولىپ تۇرادى. «اۋىلدىڭ ۇلكەن-كىشىسى دەرلىك تۇگەل دومبىرادا ويناي بىلەدى. دومبىراشىلار مەكتەبى, ءانسامبلى بار», – دەيدى مادەني ورتالىقتىڭ باسشىسى. وسىنىڭ ءوزى ۋاقىت پاراعى قانشا اۋىسسا دا, ونەردىڭ مارتەبەسى ارقاشان بيىك ەكەنىن اڭعارتسا كەرەك.
اتىراۋ