قازاقستان كاسىپوداقتار فەدەراتسياسىنىڭ توراعاسى ەرالى توعجانوۆ باتىس قازاقستان وبلىسىنا جۇمىس ساپارىمەن كەلىپ, وڭىردەگى سالالىق جانە جەرگىلىكتى كاسىپوداق توراعالارىمەن, كاسىپوداق ماماندارىمەن كەزدەستى.
كەزدەسۋگە وبلىس اكىمىنىڭ ورىنباسارى سەرىك ەگىزباەۆ, الەۋمەتتىك ارىپتەستەر, «مەملەكەتتىك, بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپتىك وداعى» قوعامدىق بىرلەستىگىنىڭ توراعاسى ميربولات جاقىپوۆ قاتىستى.
– الەۋمەتتىك تۇراقتىلىقتى قامتاماسىز ەتۋ, ەكىجاقتى سەرىكتەستىكتى دامىتۋ ماقساتىندا كاسىپوداقتار مەكەمەلەرمەن تىعىز بايلانىستا جۇمىس ىستەۋى قاجەت. كەز كەلگەن ەڭبەك داۋىن مامىلەمەن شەشۋگە بولادى. كەز كەلگەن كەلىسپەۋشىلىك الدىمەن ۇجىم ىشىندە رەتتەلۋى كەرەك. ال كاسىپوداقتار وسى ماسەلەلەردى داۋ-دامايعا جەتكىزبەي, وڭتايلى شەشۋگە تىكەلەي ارالاسىپ, ونى شەشۋ جولدارىن قاراستىرۋى قاجەت. ءبىزدىڭ مىندەتىمىز – كاسىپوداقتىڭ ناقتى جۇمىسىن, قول جەتكىزگەن ناتيجەلەرىن كورسەتۋ ارقىلى كاسىپوداقتىڭ بەدەلىن كوتەرۋ – دەدى ەرالى لۇقپان ۇلى.
كەزدەسۋدە كاسىپوداق مۇشەلىگىن ارتتىرۋ, كاسىپوداعى جوق مەكەمەلەر مەن كومپانيالاردا ۇيىم قۇرۋ, ەڭبەك ادامىنىڭ قۇقىعىن قورعاۋ, ولارعا قاۋىپسىز ەڭبەك جاعدايىن جاساۋ, ۇجىمدىق شارتتاردىڭ سانى مەن ساپاسىن ارتتىرۋ سياقتى ماسەلەلەر كوتەرىلدى.
وبلىستىق كاسىپوداقتار ورتالىعىنىڭ ءتورايىمى ايگۇل ورازقىزى «قازاقستان رەسپۋبليكاسى كاسىپوداقتار فەدەراتسياسىن جاڭعىرتۋ جول كارتاسىنىڭ» وڭىردە جۇزەگە اسۋى جونىندە شولۋ جاسادى. «مەملەكەتتىك, بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپتىك وداعى» وبلىستىق فيليالىنىڭ توراعاسى س.سۇلەيمەن, «سالالىق مادەنيەت, سپورت جانە اقپارات قىزمەتكەرلەرىنىڭ كاسىپتىك وداعى» قوعامدىق بىرلەستىگىنىڭ وبلىستىق فيليالىنىڭ توراعاسى ا.باتىرحانوۆ, «قازاقستاندىق سالالىق ءبىلىم جانە عىلىم قىزمەتكەرلەرى كاسىپتىك وداعىنىڭ وبلىستىق ۇيىمى» قوعامدىق بىرلەستىگىنىڭ توراعاسى م.داۋپاەۆ, «SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپوداعى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ توراعاسى م.قۇسايىنوۆ ءوز سالالارىندا جىل بويى اتقارعان قىزمەتى بويىنشا مالىمەت بەردى.
كەزدەسۋ سوڭىندا توراعا سالالىق جانە جەرگىلىكتى كاسىپوداق ۇيىمدارى توراعالارى جانە كەزدەسۋگە قاتىسۋشىلارمەن پىكىر الماسىپ, وي ءبولىستى. بۇدان كەيىن فەدەراتسيا توراعاسى تۇرعىن ءۇي-كوممۋنالدىق شارۋاشىلىق سالاسىنىڭ 1 مىڭنان استام قىزمەتكەرىن بىرىكتىرەتىن ءىرى مەكەمە – «جايىقجىلۋقۋات» اق باسشىلىعى جانە كاسىپوداق مۇشەلەرىمەن كەزدەستى.
باتىس قازاقستان وبلىسى