قازاننىڭ 2-ءسى - قازاقتىڭ قاھارمان قىزى مانشۇك مامەتوۆانىڭ تۋعانىنا 97 جىل تولدى. بۇل كۇندى باتىردىڭ جەرلەستەرى ەرەكشە اتاپ ءوتتى.
بيىل جازدا سايقىن اۋىلىنان ون سەگىز شاقىرىم جەردەن 1941 جىلى ستالينگراد مايدانىنا جول تارتقان جاۋىنگەرلەردىڭ مۇردەسى تابىلعان ەدى. فاشيست ۇشاقتارىنىڭ شابۋىلىنا ۇشىراپ, سۇيەگى تەمىرجول جانىندا قالعان 15 بوزداقتىڭ سۇيەگى ءدال وسى كۇنى قۇرمەتپەن جەرلەندى.
«نارىن» ىزدەستىرۋ توبىنىڭ مۇشەسى ايىم حاميدوللا ايتقانداي, وسى جىلى ماۋسىم ايىندا تەمىرجول بويىنداعى №65 راۆنيننىي ستانساسى تۇسىندا قازبا جۇمىستارى جۇرگىزىلگەن بولاتىن. ءسويتىپ, سوناۋ سوعىس جىلدارى ستالينگرادقا كومەككە اتتانعان تەڭىزشى اتقىشتار بريگاداسى جاۋىنگەرلەرىنىڭ مۇردەسى تابىلعان ەدى.
– بۇگىنگى ۇندەس ەكى شارانىڭ ءبىر كۇندە وتكىزىلۋى زاڭدىلىق. ويتكەنى, مانشۇك اپامىز جيىرما ءبىر جاسىندا قازا تاپسا, جەرلەنگەلى وتىرعان جاۋىنگەرلەردىڭ ورتا جاسى دا 18-22 جاس ەكەن. ورىمدەي جاستار ەستىپ-بىلمەگەن بوكەي دالاسىندا وققا ۇشتى. ۇلى وتان سوعىسى – ەكى شاڭىراقتىڭ ءبىرى قارا جامىلعان ۇلكەن قاسىرەت. ءبىزدىڭ اۋدانىمىزدا سوعىس جاڭعىرىعى ءالى دە بار. ويتكەنى, ءبىز ستالينگراد مايدانىنىڭ ەڭ جاقىن تىلى بولدىق. مىنا تەمىرجول بويى جاۋ بومباسىنىڭ استىندا قالدى. بەيبىت كۇن, اشىق اسپاننىڭ قادىرىن بىلەيىك. بۇل بەيبىتشىلىك بىزگە اعا-اپالارىمىزدىڭ قانىمەن كەلگەن,-دەدى بوكەي ورداسى اۋدانىنىڭ اكىمى نۇرلان راقىمجانوۆ.
ەڭبەك ارداگەرى, ۇستاز نوقاش قاديموۆتىڭ ايتۋىنشا, باۋىرلاستار سوعىس كەزىندە وققا ۇشقان جاۋىنگەرلەردىڭ سۇيەگىن جيناپ, يت-قۇسقا جەم بولۋدان ساقتاپ قالعان ساقىپ وتەعاليەۆا, ناتاشا ەسىمدى اپالارىمىز ەكەن. ال سوعىس قۇرباندارىنىڭ ارنايى باۋىرلاستار زيراتىنا جەرلەنۋىنە باستاماشى بولعان - سول كەزدەرى ەل باسقارعان شىنىباي شارافەددينوۆ ەسىمدى ازامات ەكەن.