قالا تۇرعىندارى مەن قوناقتارىنا تاريحي نىساندارعا تەگىن ەكسكۋرسيالار ۇيىمداستىرىلدى. ەكسكۋرسيانى ءار سارسەنبى سايىن كاسىبي گيدتەر جۇرگىزەدى. بۇل تۋرالى ەلوردا اكىمدىگىنىڭ ءباسپاسوز قىزمەتى حابارلادى.
نۇر-سۇلتان قالاسىنىڭ «رۋحاني جاڭعىرۋ» جوبالىق كەڭسەسى قالا تۇرعىندارى مەن قوناقتارىنا ارناپ ەلوردانىڭ كونە تاريحي-مادەني جەرلەرىنە ارنايى ەكسكۋرسيا ۇيىمداستىرادى.
جوبانىڭ ماقساتى ەلوردا اۋماعىنداعى تاريحي جەرلەردى حالىققا كەڭىنەن ناسيحاتتاپ, تانىمال ەتۋ. استانالىقتار ەكسكۋرسيا كەزىندە «قازاقستاننىڭ كيەلى جەرلەرىنىڭ گەوگرافياسى» جوباسىنا ەنگەن 7 جانە باسقا دا تاريحي نىسانداردى تاماشالاپ, ولاردىڭ تاريحىمەن كەڭىرەك تانىسا الادى.
اتاپ ايتقاندا «الجير» ساياسي قۋعىن-سۇرگىن جانە توتاليتاريزم قۇرباندارىن ەسكە الۋ مەموريالدى مۇراجاي كەشەنى, كوپەس ۆاسيلي كۋبريننىڭ ءۇيى, «كۋبرين جانە ۇلدارى» كوپەستەر سەرىكتەستىگىنىڭ ساۋدا ءۇيى, كوپەس پ.س. ءسيليننىڭ تۇرعىن ءۇيى, «جاسىل» مەشىتتىڭ قورشاۋى, بۇرىنعى مۇسىلمان مەكتەبى, قالالىق باسقارما عيماراتى, گيمنازيا ء(حىح ع. اياعى) جانە ت.ب. تاريحي عيماراتتار بار.
ەكسكۋرسياعا بارۋ ءۇشىن ۇيىمداستىرۋشىلارعا الدىن الا حابارلاسىپ, تىركەلۋ كەرەك. تولىق اقپاراتتى حابارلامادا كورسەتىلگەن نومىرلەر ارقىلى بىلۋگە بولادى.
ەكسكۋرسيا ءار سارسەنبى سايىن ساعات 10.00-دە باستالادى. جينالۋ ورنى وتىرار كوشەسى, 1/2 مەكەن-جايى بويىنشا ورنالاسقان بۇرىنعى مۇسىلمان مەكتەبىنىڭ جانىندا.