PrimeMinister.kz-كە بەرگەن سۇحباتىندا يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتى توراعاسىنىڭ ورىنباسارى ايبەك ءالجانوۆ ترانزيتتىك اۆيا تاسىمالدار سالاسىن دامىتۋ تۋرالى ايتىپ بەردى. بۇل تۋرالى PrimeMinister.kz حابارلادى.
ا. ءالجانوۆتىڭ ايتۋىنشا, حالىقارالىق تاسىمالداردى دامىتۋ سالاسىندا تۇراقتى ءوسىم بايقالۋدا. 2013 جىلى 73 باعىت بويىنشا ۇشقان بولسا, 2019 جىلى 99 باعىتقا دەيىن ۇلعايدى.
يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتى نورماتيۆتىك-قۇقىقتىق بازانى قۇرۋ جانە تولىققاندى ىنتىماقتاستىق ورناتۋ بويىنشا باسقا ەلدەرمەن ۇنەمى كەلىسسوزدەر جۇرگىزىپ تۇرادى.
2019 جىلدىڭ باسىنان بەرى قازاقستاندىق جانە شەتەلدىك اۋە كومپانيالارى 7 باعىت بويىنشا حالىقارالىق رەيستى اشتى: «نۇر-سۇلتان – پراگا», «نۇر-سۇلتان – ۇلان-باتىر», «الماتى – باكۋ», «جۋكوۆسكي – قاراعاندى», «جۋكوۆسكي – كوكشەتاۋ», «جۋكوۆسكي – پەتروپاۆل», «نۇر-سۇلتان – ۇلان-باتىر» جانە «نۇر-سۇلتان – توكيو».
بۇگىندە ىشكى باعىتتار بويىنشا 8 اۋە كومپانياسى 54 ىشكى رەيستى ورىندايدى.
سونىمەن قاتار, بيىل رەسەي فەدەراتسياسىنىڭ كولىك مينيسترلىگىمەن «نۇر-سۇلتان – ماسكەۋ» باعىتى بويىنشا Air Astana جانە اەروفلوتپەن ۇلەستەس ەمەس, ەكىنشى تاسىمالداۋشىلاردى تاعايىنداۋ ارقىلى ۇشۋ جيىلىگىن ءار تاراپتان اپتاسىنا 12-دەن 21-گە دەيىن ۇلعايتۋ بويىنشا ۋاعدالاستىققا قول جەتكىزىلدى. قازاقستاندىق تاراپتان SCAT اۋە كومپانياسى تاعايىندالدى.
«بۇعان دەيىن Air Astana كومپانياسى اپتاسىنا 14 رەيس ورىنداسا, بيىل SCAT اۋە كومپانياسى 7 رەيس قوستى. قازىر كۇنىنە اتالعان باعىتتا 6-عا جۋىق رەيس ورىندالادى. مۇنىڭ بارلىعى جولاۋشىلار ءۇشىن بيلەت قۇنىنىڭ تومەندەۋىنە ىقپالىن تيگىزەدى», — دەدى ا. ءالجانوۆ.
سونىمەن قاتار العاشقى ۇلتتىق FlyArystan لوۋكوستەرى ۇشىرىلدى, قازىر ول 6-عا جۋىق باعىتتا ۇشادى. بيىل جىل سوڭىنا دەيىن تاعى ەكى بورتتىڭ قوسىلۋى كۇتىلىپ وتىر, تيىسىنشە ءبىز كوپتەگەن باعىتتار بويىنشا ۇشۋلاردىڭ ارتقانىن بايقايتىن بولامىز. جىل سوڭىنا دەيىن Fly Arystan 1 ملن-عا دەيىن جوشاۋشى تاسىمالدايدى دەپ كۇتىلۋدە. 2023 جىلعا دەيىن اۋە كومپانياسى 10-عا جۋىق اۋە كەمەسىن الۋى ءتيىس. سونىڭ ناتيجەسىندە باعدار جەلىسى 54 باعىتقا دەيىن ارتادى.
«جۋىردا عانا نۇر-سۇلتان قالاسىنان پاۆلودارعا رەيس ۇشاتىنى بەلگىلى بولدى, مۇندا بيلەت قۇنى 999 تەڭگەدەن باستالادى. ءبىز بۇل رەتتە باسەكەلەستىكتى بايقاپ وتىرمىز», — دەدى ايبەك ءالجانوۆ.
سونىمەن بىرگە, قولدانىستاعى ۇشۋ-قونۋ جولاقتارىن رەكونسترۋكتسيالاۋ جانە جاڭالارىن سالۋ, اەروحاب توراپتارىن سالۋ, اۋەجاي كەشەندەرىن دامىتۋ, حالىقارالىق ازاماتتىق اۆياتسيا ۇيىمىنىڭ تالاپتارىنا سايكەس كەلتىرۋ ءۇشىن اەروناۆيگاتسيالىق جۇيەلەردى جاڭعىرتۋ بويىنشا شارالار كەشەنى قاراستىرىلاتىن بولادى. اتاپ ايتقاندا, قوسىمشا حالىقارالىق جانە ترانزيتتىك باعىتتار اشىپ, حالىقارالىق رەيستەردى جۇزەگە اسىراتىن قازاقستاندىق اۋە تاسىمالداۋشىلار پاركىن جاڭعىرتىپ, جاڭارتۋمەن نۇر-سۇلتان, اقتوبە, اقتاۋ, الماتى اەروحابتارى ارقىلى ءترانزيتتىڭ سەرۆيستىك ينفراقۇرىلىمىن دامىتۋ جوسپارلانعان.