5 قازاندا اقش-تىڭ نيۋ-يورك قالاسىندا قازاقستاندىق كاسىپقوي بوكسشى گەننادي گولوۆكين (39-1-1, 35 كو) مەن ۋكراينالىق سەرگەي دەرەۆيانچەنكو (13-1, 10 كو) اراسىنداعى جەكپە-جەك وتەدى. بۇل تۋرالى «قازاقستان» تەلەراديوكورپوراتسياسىنىڭباسپاسوز قىزمەتى حابارلادى.
ايگىلى «Madison Square Garden» الاڭىندا وتەتىن بوكس كەشىندە قارسىلاستار IBF نۇسقاسى بويىنشا ورتاشا سالماقتاعى الەم چەمپيونى تيتۋلىنا تالاساتىن بولادى.
سونداي-اق بۇل بوكس كەشىندە تاعى ءبىر قازاقستاندىق بوكسشى ءالي احمەدوۆ (15-0, 11 كو) امەريكالىق ەندريۋ ەرناندەسكە (20-7-2, 7 كو) قارسى قولعاپ تۇيىستىرەدى.
«قازاقستان» رترك» اق بوكس كەشىنىڭ بارلىق كەزدەسۋىن كورسەتۋ قۇقىعىنا يە بولدى. جەكپە-جەكتەردى «Qazaqstan» جانە «Qazsport» ارنالارى تىكەلەي ەفيردە ۇسىنادى. ترانسلياتسيا نۇر-سۇلتان ۋاقىتى بويىنشا 6 قازان كۇنى 05:00-دە باستالادى.
سونىمەن قاتار تەلەراديوكورپوراتسيا قازاقستاندىق كورەرمەندەرگە كەزدەسۋلەردى qazaqstan.tv جانە qazsporttv.kz cايتتارى ارقىلى, QAZAQSTAN TV ءموبيلدى قوسىمشاسى ونلاين تاماشالاۋ مۇمكىندىگىن ۇسىنىپ وتىر.
بۇل كەزدەسۋ - گەننادي گولوۆكيننىڭ DAZN ستريمينگتىك سەرۆيسىمەن جاساسقان كەلىسىمشارت بويىنشا ەكىنشى جەكپە-جەگى. العاشقى كەزدەسۋدە ول كانادالىق ستيۆ روللستى نوكاۋتپەن جەڭگەن بولاتىن.