ۇكىمەتتە وقۋشىلاردىڭ بوس ۋاقىتىن ءتيىمدى وتكىزۋىن قامتاماسىز ەتۋ ماسەلەسى تالقىلاندى

كەڭەسكە ءبىلىم جانە عىلىم, مادەنيەت جانە سپورت, ىشكى ىستەر, سىرتقى ىستەر, قارجى, اقپارات جانە قوعامدىق دامۋ مينيسترلىكتەرىنىڭ وكىلدەرى قاتىستى. بەينەكونفەرەنتسيا بايلانىسى رەجيمىندە بالالار قۇقىعى جونىندەگى ۋاكىلەتتى ارۋجان ساين, وبلىستاردىڭ, نۇر-سۇلتان, الماتى جانە شىمكەنت قالالارى اكىمدەرىنىڭ ورىنباسارلارى قاتىستى. 

كۇن تارتىبىندە مەكتەپ وقۋشىلارىنىڭ ساباقتان تىس, كانيكۋل كەزىندە جانە دەمالىس كۇندەرى ىسپەن شۇعىلدانۋىن جانە بوس ۋاقىتىن وتكىزۋىن ۇيىمداستىرۋ ماقساتىندا جۇمىس ىستەپ تۇرعان مادەنيەت, سپورت, ءبىلىم نىساندارىن پايدالانۋ ماسەلەسى قارالدى. 

ءبىلىم جانە عىلىم مينيسترلىگىنىڭ دەرەكتەرى بويىنشا, ەلىمىزدەگى مەكتەپتەردىڭ 86%-ى سپورت جانە اكت زالدارىمەن قامتاماسىز ەتىلگەن. مەكتەپتەردە 39 440 سپورت سەكتسيالارى بار, ولارعا 1 ملن 150 مىڭ بالا قاتىسادى. بعم, مسم جانە اكىمدىكتەردىڭ ءبىلىم بەرۋ, مادەنيەت جانە سپورت نىساندارىن بالالاردىڭ بوس ۋاقىتىن وتكىزۋىن قامتاماسىز ەتۋ ماقساتىندا ۇتىمدى پايدالانۋ ماسەلەلەرى جونىندەگى بىرلەسكەن بۇيرىعى ازىرلەنگەن.

«قولدا بار ينفراقۇرىلىمنىڭ قولجەتىمدىلىگى مەن ءتيىمدى پايدالانىلۋىن ۇيىمداستىرۋ قاجەت. جىل سايىن ەلىمىزدە جۇزدەگەن جاڭا نىساندار: سپورتتىق عيماراتتار, مۋزەيلەر, تەاترلار سالىنادى. ءاربىر مەكتەپتە دەرلىك سپورت جانە اكت زالدارى بار, ولاردى ساباقتان بوس ۋاقىتتا بارىنشا پايدالانىپ, قولجەتىمدى سەكتسيالار مەن ۇيىرمەلەر ۇيىمداستىرۋ كەرەك. مۇنىڭ بارلىعى جاس ۇرپاقتىڭ رۋحاني, ادامگەرشىلىك تاربيەسىنە, ساۋىقتىرىلۋىنا, شىعارماشىلىق جانە الەۋمەتتىك تۇرعىدا ءوز قابىلەتتەرىن جۇزەگە اسىرۋىنا ىقپالىن تيگىزەتىن بولادى», — دەدى ۆيتسە-پرەمەر.

سونىمەن قاتار كەڭەستە ەلىمىزدىڭ وڭىرلەرىندە سپورت ينفراقۇرىلىمدارىنا قاجەتتىلىگى زور وڭىرلەردە 100 دەنە شىنىقتىرۋ-ساۋىقتىرۋ كەشەنىن سالۋ بارىسى تالقىلاندى. 

ەلباسى ءتيىستى تاپسىرمانى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا بەردى. ونى ىسكە اسىرۋ ماقساتىندا مادەنيەت جانە سپورت مينيسترلىگى سالۋ جوسپارلانعان دەنە شىنىقتىرۋ-ساۋىقتىرۋ كەشەندەرىنىڭ ءتىزىمىن ازىرلەدى, وعان سايكەس 2019 جىلى 22 نىساندى, 2020 جىلى 37-ءسىن, 2021 جىلى 41 نىساندى پايدالانۋعا بەرۋ كوزدەلگەن. 

بۇدان وزگە, كەڭەس قاتىسۋشىلارى اباي قۇنانباي ۇلىنىڭ 175 جىلدىعىن, ءال-ءفارابيدىڭ 1150 جىلدىعىن جانە التىن وردانىڭ 750 جىلدىعىن اتاپ وتۋگە دايىندىق ماسەلەلەرىن, قر تۇڭعىش پرەزيدەنتى – ەلباسىن قورىنىڭ «ەل ءۇمىتى» جانە «قامقورلىق» باستامالارىن ىسكە اسىرۋ, سونداي-اق, مەكتەپتەردى پوليتسيا ۋچاسكەلىك ينسپەكتورلارىمەن قامتاماسىز ەتۋ ماسەلەلەرىن تالقىلادى. 

كەڭەس قورىتىندىسىن شىعارا وتىرىپ, ۆيتسە-پرەمەر جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ ماسەلەلەرى توڭىرەگىندە ۆەدومستۆوارالىق كووپەراتسيانىڭ قاجەت ەكەنىن اتاپ ءوتتى.

«بەيىندى ورگاندار اراسىندا ءتيىستى ءوزارا ءىس-قيمىل جوق. مەكتەپ جانە ۋچاسكەلىك ينسپەكتورلار, الەۋمەتتىك قىزمەتكەرلەر, پسيحولوگتار مەن پەداگوگتار تىعىز ىنتىماقتاستىقتا جاسوسپىرىمدەر اراسىنداعى قۇقىق بۇزۋشىلىقتىڭ الدىن الىپ, ومىرلىك قيىن جاعدايعا تاپ بولعان بالالاردى انىقتاپ, ولارمەن جۇمىس جاساۋى ءتيىس. سونىمەن بىرگە جاۋاپكەرشىلىك تەك مەكتەپكە جۇكتەلمەيدى. بىرىنشىدەن, بالانى تاربيەلەۋ – بۇل اتا-انانىڭ مىندەتى جانە جاۋاپكەرشىلىگى», — دەپ قورىتىندىلادى ب. ساپارباەۆ.