جاقىندا ورال قالاسىندا الەمدە سيرەك كەزدەسەتىن عاجاپ وقيعا بولدى. باتىسقازاقستاندىق دارىگەرلەر اناسىنىڭ قوس جاتىرىندا ەكى بولەك ءبىتىپ, ەكى بولەك دامىپ جەتىلگەن شارانالاردى امان الىپ قالدى.
تابيعاتتىڭ تىلسىمى كوپ: دۇنيەدە ەكى جاتىرى بار انالار سيرەك تە بولسا كەزدەسەدى. مەديتسينادا بۇل قۇبىلىس پاتالوگيا, ياعني اۋىتقۋ سانالادى. عىلىمي ادەبيەتتەردە «قوس جاتىرلىق – ەمدەلمەيتىن دەرت» دەگەن باعا بەرىلگەن. ادەتتەگى ايەلگە قاراعاندا قوس جاتىرى بار ايەلدىڭ بالا كوتەرىپ, جۇكتى بولۋى قيىن. جۇكتى بولعان كۇننىڭ وزىندە تۇسىك تاستاۋ قاۋپى وتە جوعارى بولادى ەكەن.
ورال قالاسىندا تۇراتىن ليليا كونوۆالوۆا ءوزىنىڭ وسىنداي ەرەكشەلىگىن 19 جاسىندا ەمحانادا قارالعان كەزىندە ءبىلىپتى. ارينە دارىگەرلەر بولاشاقتا كەزدەسۋى مۇمكىن قيىندىقتار تۋرالى بويجەتكەنگە ەسكەرتكەنى انىق. بىراق ليليانىڭ ءومىرى ادەتتەگىدەي ءوربىدى. ۋاقىتىندا تۇرمىسقا شىقتى, 22 جاسىندا الينا ەسىمدى تۇڭعىش قىزىن امان-ەسەن دۇنيەگە اكەلدى.
– ءبىز ەندى ۇل قالاعان ەدىك. ارادا جەتى جىل سالىپ كوتەرگەن سوڭ دارىگەردىڭ باقىلاۋىندا بولدىق. بويىمدا ەگىز نارەستە بار ەكەنىن, ولاردىڭ ەكى جاتىردا ءوسىپ كەلە جاتقانىن ەستىگەندە قاتتى ۋايىمدادىم, – دەيدى ليليا.
ەگىزدەردىڭ اراسى ەكى جارىم اي
اناسىنىڭ ايتۋىنشا, 25 اپتاعا دەيىن جۇكتىلىك بىرقالىپتى, ادەتتەگىدەي وتكەن ەكەن. تەك اياعى اۋىر بولعانىنا التى ايعا تايانعاندا اياق استىنان تولعاق قىسقان. بىراق وسىنداي جاعدايدى الدىن الا بولجاپ, دايىن وتىرعان ورالدىق دارىگەرلەر ابىرجىعان جوق.
– بۇل – مەديتسينا تاريحىندا وتە سيرەك كەزدەسەتىن وقيعا. قوس شارانا ەكى جاتىردا دامىعانىمەن, ۇرىق ءبىر مەزگىلدە ءتۇسىپ, قاتار دامىعان. انانىڭ ەرتە تولعاعى باستالىپ, التى ايلىق قىز بالا دۇنيەگە كەلدى. ءبىز تاۋەكەلگە بەل بايلاپ, ەكىنشى نارەستەنى جاتىردا ساقتاۋعا, جۇكتىلىكتى جالعاستىرۋعا ۇيعاردىق. بۇعان مامانداردىڭ بىلىكتىلىگى دە, باتىس قازاقستان وبلىستىق پەريناتالدىق ورتالىقتىڭ تەحنيكالىق مۇمكىندىگى دە جەتتى, – دەيدى ورتالىقتىڭ باس دارىگەرىنىڭ ورىنباسارى, اكۋشەر-دارىگەر ەسەت ەرالين.
24 مامىردا 25 اپتالىق بولىپ دۇنيەگە كەلگەن ليانىڭ تۋعان كەزدەگى بويى – 42 سم, سالماعى بار بولعانى 850 گرامم بولاتىن! ول بىردەن شالا تۋعان شاقالاقتاردى باعاتىن ارنايى اپپاراتقا – رەسپيراتورلىق قولداۋ كورسەتەتىن ينكۋباتورعا جالعاندى. ال ونىڭ سىڭارىنىڭ جارىق دۇنيەگە كەلۋىنە ءالى ەكى جارىم اي بار بولاتىن.
وسى ەكى ايدان اسا ۋاقىت ىشىندە جاس انا باتىس قازاقستان وبلىستىق پەريناتالدىق ورتالىعىندا, دارىگەر-مامانداردىڭ تولىق باقىلاۋىندا بولدى. مىنە, كوپتەن كۇتكەن 9 تامىز دا جەتتى. دارىگەرلەر ايى-كۇنى جەتكەن ۇل بالانى كەسار تىلىگى ارقىلى امان-ەسەن دۇنيەگە اكەلدى. ماكسيم ەسىمىن يەلەنگەن باتىردىڭ سالماعى – 2900 گرامم, بويى 50 سم, ياعني تولىق جەتىلگەن.
– مۇنداي جاعداي ءبىزدىڭ وبلىستا ءبىرىنشى رەت كەزدەسىپ وتىر. ءار بالا ءوز جاتىرىندا تۋدى. ارنايى كۇتىم ارقىلى شالا تۋعان قىز بالا دا تەز جەتىلىپ, قازىر ەگىزدىڭ دامۋىندا, سالماعى مەن جەتىلۋىندە ەش ايىرماشىلىق قالمادى, – دەيدى نەوناتولوگ-دارىگەر نۇرگۇل ءجۇنىسوۆا.
سيرەك ساندار
ماماندار ءبىر اۋىزدان مۇنداي وقيعا الەمدە سيرەك كەزدەسەتىنىن ايتىپ جاتىر. مىسالى, سوڭعى 60 جىلدا جەر بەتىندە وسىنداي وقيعانىڭ سانى 70-تەن اسپاپتى. جانە بۇل وقيعالاردىڭ ارقايسىسى ءوز الدىنا سەنساتسيا, قايتالانبايتىن ەرەكشە قۇبىلىسقا اينالعان.
ۇلىبريتانيا تۇرعىنى حاننا كيورسي تۇرمىسقا شىققانىمەن ءسابي سۇيە الماي, دەنەدەن تىس – جاساندى ۇرىقتاندىرۋ كومەگىنە جۇگىنگەن. ءسويتىپ ونىڭ قوس جاتىرىنىڭ بىرىنە ءبىر قىز, ەكىنشىسىنە ەگىز قىز ءبىتىپتى. دامىعان مەديتسينانىڭ كومەگىمەن دۇنيەگە كەلگەن كەزىندە وتە ءالسىز بولعان نارەستەلەر بۇگىندە امان-ەسەن ءوسىپ كەتكەن.
ال امەريكالىق ەندجي كروماردىڭ وقيعاسى ورالدىق ليليا كونوۆالوۆانىڭ تاريحىنا ۇقسايدى. 2010 جىلى ەكى جاتىرىنان ەكى ءسابيدى دۇنيەگە اكەلگەن ەندجيدىڭ بۇعان دەيىن ءار جىلدارى دۇنيەگە كەلگەن ەكى بالاسى بار ەكەن.
دەگەنمەن, دۇنيە جۇزىندە مۇنداي وقيعا ساۋساقپەن سانارلىقتاي از ەكەنى اقيقات. انانىڭ قوس جاتىرىمەن ءبىر مەزگىلدە ءسابي كوتەرۋى 15 000 000-نان 1 كەزدەسەدى ەكەن. ال ولاردىڭ امان-ەسەن دۇنيەگە كەلۋى – 100 ميلليوننان 1 مارتە عانا كەزدەسەتىن جاعداي!
جاقىندا عانا باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى نۇردانات بەركىنعالي وبلىستىق ءماسليحات دەپۋتاتتارى الدىندا بايانداما جاساپ, وڭىردە «دەنساۋلىق» مەملەكەتتىك باعدارلاماسىنىڭ ورىندالۋى جونىندە ەسەپ بەردى.
قاي كەزدە دە مەديتسينالىق قىزمەتتىڭ ساپاسى, دامۋ دارەجەسى انا مەن بالا ءومىرىنىڭ ساقتالۋىمەن ولشەنەدى. قۇدايعا شۇكىر, باتىس قازاقستان وبلىسىندا سوڭعى جىلدارى انا ءولىمى تىركەلگەن جوق. ال ليليا كونوۆالوۆانىڭ وقيعاسى – قوس جاتىردان دۇنيەگە كەلگەن سابيلەردىڭ حابارى باتىسقازاقستاندىق دارىگەرلەردىڭ بىلىكتىلىگى مەن ەرلىگىن دۇنيەگە ايگىلەدى. جاقىندا عانا رەسەي فەدەراتسياسىنىڭ 1 ارناسى – بەلگىلى «جيت زدوروۆو» تەلەحابارىنىڭ جۇرگىزۋشىسى ەلەنا مالىشەۆا وسى وقيعاعا ءبىر حابارىن ارنادى. بۇل شىنىندا دا عاجاپ وقيعا! الەمدە سيرەك كەزدەسەتىن ساتتە بىلىكتىلىك تانىتىپ, انانى دا, بالالاردى دا امان الىپ قالعان دارىگەرلىك توپتى ءبىز مەملەكەتتىك ناگراداعا ۇسىنامىز, – دەدى نۇردانات بەركىنعالي ۇلى.
دۇرىس, ماراپات يەسىن تابۋى ءتيىس!
باتىس قازاقستان وبلىسى