اتىراۋ قالاسىندا «Atyrau Jastar Fest» فەستيۆالىندە مما بويىنشا ءتورت كۇن بويى ءارتۇرلى جارىستار ۇيىمداستىرىلدى. ءتۋرنيردى مادەنيەت جانە سپورت مينيسترلىگى, اتىراۋ قالاسىنىڭ اكىمدىگى ۇيىمداستىردى. بۇل تۋرالى مينيسترلىكتىڭ ءباسپاسوز قىزمەتى حابارلادى.
فەستيۆالگە UFC چەمپيونى حابيب نۋرماگومەدوۆ, UFC ساربازدارى زۋبايرا تۋحۋگوۆ جانە يسلام ماحاچەۆ قاتىستى. سونداي-اق رەسەيدىڭ ەڭبەك سىڭىرگەن جاتتىقتىرۋشىسى ابدۋلماناپ نۋرماگومەدوۆ (حابيب نۋرماگومەدوۆتىڭ جاتتىقتىرۋشىسى) جاس سپورتشىلارعا شەبەرلىك ساعاتىن وتكىزدى.
اتىراۋ وبلىسى اكىمدىگى مەن مەتسەنات يبراگيم اقدراشەۆتىڭ قولداۋىمەن ۆەلوورتالىق اشىلدى.
بوكستان بيىلعى الەم چەمپيونى بەكزات نۇرداۋلەتوۆ, بوكستان جاسوسپىرىمدەر اراسىنداعى وليمپيادا ويىندارىنىڭ چەمپيونى جانە بوكستان بيىلعى الەم چەمپيوناتىنىڭ جۇلدەگەرى ابىلايحان ءجۇسىپوۆ, قر مسم سپورت جانە دەنە شىنىقتىرۋ ىستەرى كوميتەتىنىڭ توراعاسى, 2012 جىلعى وليمپيادا ويىندارىنىڭ چەمپيونى سەرىك ساپيەۆ جاستارمەن كەزدەستى.
سونداي-اق وسى شارا اياسىندا اتىراۋ قالاسىندا كوپتەن كۇتكەن GFC-17 جانە قازاقستاننىڭ جاۋىنگەرلىك ونەر اسسوتسياتسياسى ۇيىمداستىرعان «Jayynger» پروموۋشەنىنىڭ ءتۋرنيرى ءوتتى. كەش قوناعى ابدۋلماناپ نۋرماگومەدوۆ پەن حابيب نۋرماگومەدوۆ بولدى. ۇيىمداستىرۋشىلار اتىراۋ جەرىندەگى كەشتىڭ تارتىسقا تولى وتكەنىن جانە الداعى ۋاقىتتا قازاقستاننىڭ باسقا دا قالالارىندا جەكپە-جەك كەشتەرىن ۇيىمداستىرۋدى جوسپارلاپ وتىرعاندارىن ايتتى.
- مۇنداي كەشتەر حالىقتىڭ سپورتقا دەگەن قىزىعۋشىلىعىن ارتتىرۋعا جانە دە اتىراۋ جەرىن الەمگە تانىتۋعا سەپتىگىن تيگىزەدى, - دەدى اتىراۋ وبلىسى دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ.
ءتۋرنيردىڭ باستى ۇيىمداستىرۋشىلارى قر پانكراتيون فەدەراتسياسى مەن اتىراۋ وبلىسى جاۋىنگەرلىك ونەر اسسوتسياتسياسى. ۇيىم ديرەكتورى ەرلان حيسمەت ۇلى -مۇنداي كاسىپقوي كەزدەسۋلەر الداعى ۋاقىتتا دا جالعاسىن تابادى, -دەدى.
GFC-17 تۋرنيرىنە بەس بىردەي اتىراۋلىق سپورتشى قاتىستى. ولار: ابىلاي تولەش, داۋرەن ەرمەكوۆ, جالعاس ۇلى جۇماگەلدى, نۇربەرگەن شاريپوۆ, جانە تالعات جۇماعاليەۆ.
ارالاس جەكپە-جەكتەن بولەك مۋاي-تاي سپورتىنان دا ءۇش كاسىبي كەزدەسۋ ءوتتى. وندا جەرگىلىكتى سپورتشى ءابىل گاليەۆ تاي سپورتشىسىن نوكاۋتپەن جەڭدى.
فەستيۆالدىڭ قورىتىندى بولىمىندە اتىراۋ قالاسىداعى يساتاي جانە ماحامبەت الاڭىندا ستريت-بول, اسىق اتۋ, كىر تاسىن كوتەرۋ سپورتى, ارمرەستلينگ, شاحمات, ستريت ۆوركاۋتتان ۇلگى كورىنىستەر مەن جارىستار ءوتتى.
جارىس سوڭىندا اتىراۋ قالاسىنىڭ تۇرعىندارى مەن قالا قوناقتارىنا كونتسەرت ۇيىمداستىرىلدى.