الماتىداعى قورعانىس مينيسترلىگىنە قاراستى ارمياشىلاردىڭ ورتالىق سپورت كلۋبىندا قويان-قولتىق جەكپە-جەكتەن اسكەريلەر اراسىندا تمد چەمپيوناتى ءوز مارەسىنە جەتتى.
ەلىمىزدە تۇڭعىش رەت ۇيىمداستىرىلىپ وتىرعان ايتۋلى جارىستا ارمەنيا, بەلارۋس, وزبەكستان, قىرعىزستان, رەسەي, تاجىكستان جانە قازاقستاننىڭ 80-نەن اسا سپورتشىسى كۇش سىناستى. بىرنەشە سالماق دارەجەسى بويىنشا وتكەن اسا شيەلەنىستى باسەكەلەر بارىسىندا جەرلەستەرىمىز اسقان شەبەرلىك تانىتىپ, 3 التىن, 1 كۇمىس جانە 3 قولا مەدالدى ولجالادى. وسى ناتيجەنىڭ ارقاسىندا ءبىزدىڭ ساربازدار جالپى كوماندالىق ەسەپتە ءبىرىنشى ورىندى جەڭىپ الدى. ەكىنشى جانە ءۇشىنشى ساتىلارعا رەسەي مەن وزبەكستان قۇرامالارى جايعاستى.
جەڭىمپازدار مەن جۇلدەگەرلەردى ماراپاتتاۋ كەزىندە قر قورعانىس ءمينيسترىنىڭ ءبىرىنشى ورىنباسارى – قارۋلى كۇشتەرى باس شتابىنىڭ باستىعى, گەنەرال-مايور مۇرات بەكتانوۆ سپورت سالاسىنىڭ ءمانى مەن ماڭىزدىلىعىنا توقتالا كەلە, وسىنداي سايىستاردى ءجيى ۇيىمداستىرۋ قاجەتتىگى جايىن دا تىلگە تيەك ەتتى.