قوستانايدا جازۋشى بەيىمبەت ءمايليننىڭ تۋعانىنا 125 جىل تولۋىنا وراي وتكەن مەرەكەلىك شارالار اياسىندا ادەبيەت پەن تاريح سالاسىنداعى جاس عالىمداردىڭ قاتىسۋىمەن بەيىمبەت ءمايليننىڭ شىعارماشىلىعى مەن ومىرىنە ارنالعان جاستار كونفەرەنتسياسى ءوتتى.
«بي-اعانىڭ مەرەي تويىنا بايلانىستى ءوتىپ وتىرعان بۇل شارا ەشقانداي رەسمي سيپاتتا ەمەس, شىعارماشىلىق نەگىزدە وتەدى, ونىڭ اۋديتورياعا قىزىقتى بولۋى عانا ويلاستىرىلدى. ءبىزدىڭ ماقساتىمىز بەيىمبەت ءمايليندى زەرتتەۋ جانە شىعارماسىن زەردەلەۋ ىسىندە جاڭا تولقىننىڭ اتسالىسۋى, جاڭا بۋىننىڭ كوزقاراسى, جالپى «تاۋەلسىز ەلدىڭ تۇرعىسىنان العاندا بەيىمبەت ءبىز ءۇشىن كىم؟» دەگەن سۇراققا جاۋاپ ىزدەۋ بولاتىن» دەدى وبلىستىق مادەنيەت باسقارماسىنىڭ باسشىسى ەرلان قالماق.
كونفەرەنتسيا جاس اقىن ابىلاي ماۋداننىڭ مودەراتورلىعىمەن ءوتتى. وندا ادەبيەتتانۋشى, سىنشى لەۆ گۋميلەۆ اتىنداعى ۋنيۆەرسيتەتتىڭ دوكتورانتى زاڭعار كارىمحان, اقىن, ادەبيەتتانۋشى, جۋرناليست اينۇر تولەۋ, سەمەي قالاسىنداعى شاكارىم اتىنداعى ۋنيۆەرسيتەتتىڭ كافەدرا مەڭگەرۋشىسى ەركىن راحمەتۋللين, جازۋشى-دراماتۋرگ, اباي اتىنداعى پەداگوگيكا ۋنيۆەرسيتەتىنىڭ دوكتورانتى الىبەك بايبول, بالالار جازۋشىسى, ادەبيەت سىنشىسى, «دارىن» مەملەكەتتىك سىيلىعىنىڭ لاۋرەاتى ەلدوس توقتارباي ۇلى بەيىمبەت شىعارماشىلىعى مەن ونىڭ زەرتتەلۋى, جازۋشى شىعارماشىلىعىنىڭ ومىرشەڭدىگى, جاستارعا ناسيحاتتالۋى جايىندا جان-جاقتى اڭگىمە قوزعادى. سونىمەن قاتار ولار اۋديتورياداعى جاستار سۇراقتارىنا دا تولىققاندى جاۋاپ بەرىپ وتىردى.
ء«بىزدىڭ گۋمانيتارلىق عىلىمداعى عالىمداردىڭ باسى 80 جاستىڭ ۇستىندە, ەڭ جاسىنىڭ ءوزى ەلۋدە. قوعامدىق عىلىمنىڭ قارتايعانى بايقالادى. بىزدە زەرتتەلەتىن, انىقتايتىن, ايتىلماعان دۇنيە كوپ, اقتاڭداقتار دا جەتكىلىكتى. ولارمەن كىم اينالىسادى, كىم زەرتتەيدى؟ وتكەن عاسىردىڭ باسىندا جازبا ادەبيەتىمىز قالىپتاسقان تۇستا اۋىر تراگەديالىق-پسيحولوگيالىق ۇدەرىستەر ورىن الدى. ساياسي قۋعىندالعان, رەپرەسسياعا ۇشىراعان جازۋشىلاردىڭ شىعارمالارى ورتەلدى, سورەدەن الىنىپ تاستالدى, تيىم سالدى. سولارىدڭ اراسىندا بي-اعاڭ دا بار. بارلىعى دا زەرتتەۋدى كۇتىپ جاتىر, رەسەيدىڭ ارحيۆتەرىنەن قاراۋ كەرەك» دەدى ەلدوس توقتارباي.
كونفەرەنتسيادا بەيىمبەت شىعارماشىلىعىن ناسيحاتتاۋ, ونىڭ ەرەكشەلىكتەرى تۋرالى كوپتەگەن قىزىقتى پىكىرلەر ورتاعا سالىندى. ەكى ساعاتقا سوزىلعان كونفەرەنتسيانى قورىتا كەلە, جاستار بەيىمبەت شىعارمالارى ماڭگىلىك, ولار ۋاقىت باسقا بولسا دا شەبەرلىگىمەن, الىنعان ماسەلەسىنىڭ ماڭىزدىلىعىمەن حالقىمىزبەن بىرگە جاساي بەرتىندىگى ايتىلدى.
قوستاناي