پارلامەنت سەناتىندا «زاڭ شىعارۋ پروتسەسىن ودان ءارى جەتىلدىرۋ» تاقىرىبى بويىنشا پارلامەنتتىك تىڭداۋ بولدى. بۇل تۋرالى پالاتانىڭ ءباسپاسوز قىزمەتى حابارلادى.
شارا بارىسىندا پارلامەنتكە كەلەتىن زاڭ جوبالارىن ازىرلەۋدىڭ, رەسىمدەۋدىڭ, كەلىسۋدىڭ, قۇقىقتىق مونيتورينگ جۇرگىزۋدىڭ جانە ساپاسىنىڭ وزەكتى ماسەلەلەرى, سونداي-اق زاڭ شىعارۋ پروتسەسىن ودان ءارى جەتىلدىرۋ ماسەلەلەرى تالقىلاندى.
سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆ پارلامەنتتىك تىڭداۋدى اشا كەلىپ, «قابىلداناتىن زاڭداردىڭ ساپاسى ازاماتتاردىڭ ءال-اۋقاتىنىڭ ارتۋى مەن وزدەرىن قورعاۋدا ەكەنىن سەزىنۋىنىڭ نەگىزى بولىپ تابىلادى جانە بۇل زاڭدى جوسپارلاۋدان باستاپ كۇشىنە ەنگەنگە دەيىن بارلىق زاڭ شىعارۋ پروتسەسىنىڭ تيىمدىلىگىنە تىكەلەي بايلانىستى», - دەپ اتاپ ءوتتى.
دۋلات قۇسداۋلەتوۆ زاڭ جوبالارىنىڭ ساپاسى تۋرالى ايتا كەلىپ, مۇندا زاڭداردى ازىرلەۋگە دەگەن فورمالدى ءتاسىل باستى ماسەلە ەكەنىن اتاپ ءوتتى. ء«تىپتى ەل باسشىلىعىنىڭ تاپسىرمالارىن ورىنداۋ كەزىندە دە مەملەكەتتىك ورگاندار بىزگە زاڭ تالاپتارىنا قۇرىلىمدىق جاعىنان دا, مازمۇن جاعىنان دا سايكەس كەلمەيتىن جانە قويىلعان مىندەتتەردى تولىق كولەمدە ىسكە اسىرا المايتىن زاڭ جوبالارىن ۇسىنادى. ەڭ جامانى, مەملەكەتتىك ورگاندار كونستيتۋتسيانىڭ نەگىزگى ەرەجەلەرى مەن قاعيدالارىن دا ارقاشان ەسكەرە بەرمەيدى», - دەپ اتاپ ءوتتى د. قۇسداۋلەتوۆ.
سونىمەن قاتار زاڭ عىلىمدارىنىڭ دوكتورى رامازان نۇرتاەۆ, حالىقارالىق ساراپشى يورگ پۋدەلكا بايانداما جاساپ, زاڭ شىعارۋ ۇدەرىستەرىن جەتىلدىرۋگە قاجەتتى نەگىزگى شارالارعا توقتالدى.
داريعا نازارباەۆا پارلامەنتتىك تىڭداۋلاردى قورىتىندىلاي كەلىپ, بۇگىنگى تاڭدا زاڭ شىعارۋ پروتسەسىنە كوزقاراستى تۇبەگەيلى جانە تۇجىرىمدامالىق تۇرعىدا قايتا قاراۋ قاجەتتىگى تۋىنداپ وتىرعانىن اتاپ ءوتتى.
«زاڭ مەن قۇقىق – ءبىزدىڭ كۇندەلىكتى ءومىرىمىزدى رەتتەپ وتىراتىن ەرەجە. فورماليزمنەن ارىلاتىن ۋاقىت كەلدى. دەمەك, قازىرگى كەزدە ۇكىمەتتىڭ ءوز باستاماسىمەن ازىرلەنگەن زاڭدارعا نەمەسە پارلامەنت دەپۋتاتتارىنىڭ باستاماسى بويىنشا دايىندالعان زاڭدارعا مونيتورينگ جۇرگىزەتىن پارمەندى قۇرالى جوق, دەدى سەنات توراعاسى.
داريعا نازارباەۆانىڭ پىكىرىنشە, قۇقىقتىق مونيتورينگكە كوزقاراستى تۇبەگەيلى وزگەرتۋ قاجەت. «ونسىز, باقىلاۋسىز, تۋىنداعان ماسەلەلەردى تالقىلاۋسىز ەشتەڭە بولمايدى», دەپ اتاپ ءوتتى سەنات توراعاسى.
پارلامەنتتىڭ جوعارعى پالاتاسى باسشىسىنىڭ پىكىرىنشە, كەلەسى پارلامەنتتىك تىڭداۋلاردى قۇقىق قولدانۋ تاجىريبەلەرىنە ارناۋ كەرەك, سوت ورگاندارىنىڭ, پروكۋراتۋرا وكىلدەرى مەن ادۆوكاتتاردى قاتىسۋعا شاقىرۋ قاجەت. «بۇل سوت پروتسەستەرىندە تىكەلەي جۇمىس ىستەيتىن جانە ادامداردىڭ, بيزنەس پەن كومپانيالاردىڭ تاعدىرىن شەشەتىن ءۇش ينستانتسيا. سوندىقتان مازمۇندى اڭگىمە ورىستەۋى كەرەك», - دەدى د.نازارباەۆا.
قۇقىقتىق ساراپتاما تۋرالى ايتقان سەنات باسشىسى ونىڭ ساپاسىنا نازار اۋدارا كەلىپ, «ساپاسى جاقسارعانىن قالايمىز» دەگەن بولاتىن. توراعا قۇقىقتىق ساراپتاما ساپاسىنىڭ شارتتارىن قايتا قاراۋ جانە ساراپشىلاردى ىرىكتەۋدىڭ ناقتى تەتىگىن ازىرلەۋ قاجەتتىگى تۋىندادى دەپ سانايدى.
توراعا سونداي-اق زاڭ قىزمەتتەرى مەن تالداۋشىلار جۇمىسىنىڭ السىزدىگىن اتاپ ءوتتى. ء«بىز پارلامەنت جانىنان ينستيتۋت قۇرۋ تۋرالى ۇسىنىسىمىزدى قولداعانى ءۇشىن قاسىم-جومارت كەمەل ۇلىنا العىس ايتامىز, ول بىزگە وسى جۇمىستى ساپالى ءارى دەربەس جۇرگىزۋگە مۇمكىندىك بەرەر ەدى. ول پارلامەنت مارتەبەسىن نىعايتۋدا جانە كۇشەيتۋدە زور قادام بولادى», دەدى د.نازارباەۆا.
پارلامەنتتىك تىڭداۋدىڭ قورىتىندىسى بويىنشا سەنات بۇدان بىلايعى جۇمىستار جونىندە ۇكىمەت اتىنا ۇسىنىستار ازىرلەدى. قازاقستان رەسپۋبليكاسى پارلامەنتى سەناتى جانىنداعى زاڭ شىعارۋ پروتسەسىن جەتىلدىرۋ جونىندەگى كەڭەس وتىرىسىندا ۇسىنىمداردىڭ ورىندالۋ قورىتىندىلارىن قاراۋ تۋرالى شەشىم قابىلداندى.