پرەمەر-ءمينيسترى اسقار مامين قر تۇڭعىش پرەزيدەنتى – ەلباسىنىڭ «Nur Otan» پارتياسىنىڭ ساياسي كەڭەسىندە بەرگەن حالىقپەن كەرى بايلانىس قۇرالدارىنىڭ تيىمدىلىگىن ارتتىرۋ بويىنشا تاپسىرماسىنىڭ, سونداي-اق مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا قويىلعان «حالىق ۇنىنە قۇلاق اساتىن مەملەكەت» مەملەكەتىن قالىپتاستىرۋ بويىنشا مىندەتتەردىڭ اياسىندا «Nur Otan» پارتياسىنىڭ رەسپۋبليكالىق قوعامدىق قابىلداۋىندا ازاماتتاردى جەكە قابىلداۋدى وتكىزدى. بۇل تۋرالى primeminister.kz حابارلادى.
«Nur Otan» قابىلداۋىنا ەلىمىزدىڭ ءتۇرلى وڭىرلەرىنىڭ تۇرعىندارى ەلەكترمەن, سۋمەن جابدىقتاۋمەن قامتاماسىز ەتۋگە, ينفراقۇرىلىمدى دامىتۋعا قاتىستى پروبلەمالارىمەن جانە باسقا دا ماسەلەلەرمەن جۇگىندى.
كۇمىسجان ميفتاحوۆا اقمولا وبلىسى تسەلينوگراد اۋدانى تالاپكەر كەنتىنىڭ 14 مىڭنان استام تۇرعىنىنىڭ اتىنان اتالعان ەلدى مەكەندى ەلەكترمەن قامتاماسىز ەتۋ ماسەلەسىن كوتەردى — كەنتتە نەبارى 10 ترانسفورماتور قوسالقى ستانتسياسى جۇمىس ىستەيدى, سونىڭ سالدارىنان ەنەرگيامەن قامتاماسىز ەتۋدە پروبلەمالار تۋىنداپ وتىر.
ا. مامين ەنەرگەتيكا مينيسترلىگىنە جانە اقمولا وبلىسىنىڭ اكىمدىگىنە قىسقا ۋاقىت ىشىندە ۇزدىكسىز ەلەكترمەن قامتاماسىز ەتۋمەن اتەك بالانسىنا بارلىق ەلەكترمەن قامتۋ نىساندارىن بەرۋ ماسەلەسىن پىسىقتاۋدى, سونداي-اق تاريفتەگى ايىرماشىلىقتاردى ازايتۋدى قاراستىرۋدى تاپسىردى.
الماتى وبلىسىنىڭ قاراساي اۋدانىنىڭ تۇرعىنى بازاركەلدى انيسوۆ قابىلداۋعا «اقسەڭگىر – شامالعان» تەمىر جول وتپەسىندە كوپىر سالۋ تۋرالى وتىنىشىمەن جۇگىندى.
«كوپىر مەن جاياۋ جۇرگىنشىلەر وتكەلى سالىنىپ, 2020 جىلدىڭ سوڭىنا دەيىن پايدالانۋعا بەرىلەدى», — دەدى ا. مامين.
پرەمەر-مينيستر يندۋستريا جانە ينفراقۇرىلىمدىق دامۋ مينيسترلىگىنە جانە اقمولا وبلىسىنىڭ اكىمدىگىنە ناقتى تاپسىرمالار بەردى. سونىمەن قاتار جەرگىلىكتى بيلىك ورىندارىنا تۇرعىندار مەن اۆتوكولىك قۇرالدارىنىڭ تەمىر جولدى كۇندەلىكتى ءارى قاۋىپسىز كەسىپ وتۋىنە بايلانىستى اعىمداعى ماسەلەلەردى شەشۋ تاپسىرىلدى.
الماتى وبلىسى ەڭبەكشىقازاق اۋدانىنىڭ 330 تۇرعىنىنىڭ اتىنان پارتيا قابىلداۋىنا اۋدانداعى 11 كەنتتە ورتالىقتاندىرىلعان سۋمەن قامتۋدىڭ بولماۋى پروبلەماسىن شەشۋ وتىنىشىمەن اسىل بايتۋلاقوۆ جۇگىندى.
ۇكىمەت باسشىسى قازىرگى ۋاقىتتا قۇنى 4,5 ملرد تەڭگە بولاتىن توپتىق سۋ تارتقىشتارىن سالۋ جوباسى ازىرلەنگەنىن ايتتى, بۇل كەلەسى جىلدىڭ سوڭىنا دەيىن تۋىنداپ وتىرعان اۋداندى سۋمەن قامتاماسىز ەتۋ ماسەلەسىن شەشۋگە مۇمكىندىك بەرەدى.
اتىراۋ قالاسىنان كەلگەن كاسىپكەر وتەمىس جۇماعاليەۆ «اتىراۋ – نۇر-سۇلتان» باعىتى بويىنشا اۋە بيلەتتەرىنىڭ قۇنىن تومەندەتۋ تۋرالى ماسەلەنى كوتەردى.
ا. مامين قر تۇڭعىش پرەزيدەنتى – ەلباسى ن. نازارباەۆتىڭ تاپسىرماسىن ورىنداۋ اياسىندا اۋە بيلەتتەرىنىڭ قۇنىن تومەندەتۋ جانە باسەكەلەستىكتى كۇشەيتۋ ماقساتىندا «FlyArystan» اۋە كومپانياسى قۇرىلعانىن ايتتى, ول 2020 جىلدىڭ مامىر ايىنان باستاپ اتىراۋعا اۋە رەيستەرىن ورىنداۋدى باستايدى. بۇل رەتتە اۋە بيلەتتەرى ولاردى الدىن الا ساتىپ العان جاعدايدا ەڭ تومەنگى تاريف بويىنشا ساتىلاتىن بولادى (5-10 مىڭ تەڭگە). سونىمەن قاتار, كولىك قاتىناسىن جاقسارتۋ ءۇشىن «اتىراۋ – اقتوبە» جانە «اتىراۋ – استراحان» اۆتوجولدارى قايتا جوندەلەدى.
«Nur Otan» پارتياسىنىڭ قوعامدىق قابىلداۋىنا شىمكەنت قالاسىنىڭ 195-ورامىنىڭ (بادام) 3400 تۇرعىنىنىڭ اتىنان مەكتەپ مۇعالىمى گۇلناز ءابدىروۆا جۇگىندى. ونىڭ ايتۋىنشا, اۋداندا ەلەكتر بەرۋدە ۇنەمى ىركىلىستەر بار.
پرەمەر-مينيستر شىمكەنت ق. 195-ورامىنىڭ 828 ءۇيىن ەلەكترمەن جابدىقتاۋ ءۇشىن 244 ملن تەڭگە بولىنگەنىن ايتتى. جۇمىستاردى وسى جىلدىڭ جەلتوقسان ايىندا اياقتاۋ كوزدەلگەن. سۋ قۇبىرىن جانە گاز جەلىلەرىن سالۋ كەلەسى جىلعا جوسپارلانعان.
قارالعان ءاربىر جۇگىنۋ بويىنشا ۇكىمەت باسشىسى اكىمدىكتەردىڭ, سونداي-اق مينيسترلىكتەر مەن ۆەدومستۆولاردىڭ باسشىلىعىنا ناقتى تاپسىرمالار بەرىپ, ازاماتتاردى كوتەرىلگەن ماسەلەلەردىڭ شەشىمى جەكە باقىلاۋىنا الىناتىنىنا سەندىردى.
الداعى ۋاقىتتا ازاماتتاردىڭ وتىنىمدەرىنە شۇعىل ارەكەت ەتۋ ماقساتىندا قر پرەمەر-ءمينيسترى ۇكىمەت مۇشەلەرىنە «Nur Otan» پارتياسىنىڭ قوعامدىق قابىلداۋلارىندا حالىقپەن جۇيەلى تۇردە كەزدەسۋلەر وتكىزۋدى تاپسىردى.