قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ اياسىندا تۇراقتى دامۋ ماسەلەلەرى جونىندە جوعارى دەڭگەيدەگى فورۋمدا ءسوز سويلەدى, دەپ حابارلادى پرەزيدەنتتىڭ ءباسپاسوز قىزمەتى.
قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ 74-سەسسياسى اياسىندا جوسپارلانعان بارلىق ەكىجاقتى كەزدەسۋلەردەن كەيىن تۇراقتى دامۋ ماسەلەلەرى جونىندە جوعارى دەڭگەيدەگى فورۋمعا قاتىستى. مەملەكەت باسشىسى شاراعا قاتىسۋشى سپيكەرلەر اراسىنان ءبىرىنشى بولىپ ءسوز الدى.
قاسىم-جومارت توقاەۆ ءوز بايانداماسىندا 2030 جىلعا دەيىنگى تۇراقتى دامۋ ماقساتتارى – ادامزاتقا الەۋمەتتىك, تەحنولوگيالىق جانە ەكونوميكالىق جەتىستىكتەردىڭ يگىلىگى بارشاعا ورتاق بولاتىن كەمەل كەلەشەككە جەتۋدىڭ ناقتى جول كارتاسىن ۇسىنۋ ەكەنىن اتاپ ءوتتى.
سونىمەن قاتار مەملەكەت باسشىسى قازاقستان حالىقارالىق قوعامداستىقتىڭ تۇراقتى دامۋ ماقساتتارىنا قول جەتكىزۋ جونىنەن ارتتا قالىپ بارا جاتقانىنا الاڭداۋشىلىق بىلدىرەتىنىن مالىمدەدى. قاسىم-جومارت توقاەۆ بۇل ماسەلەنى شەشۋ ءۇشىن الداعى ون جىلدىقتا ءتيىستى ناتيجەگە قول جەتكىزۋ ماقساتىندا ناقتى شەشىم قابىلداۋ قاجەتتىگىن ايتتى.
– ءوز ەلىمنىڭ ساياسي, ەكونوميكالىق, الەۋمەتتىك جانە ەكولوگيالىق ساياساتىنىڭ 2030 جىلعا دەيىنگى تۇراقتى دامۋ مىندەتتەمەلەرىنە تولىقتاي سايكەس كەلەتىنىن ايتا الامىن. الەمدىك نارىقتىڭ ارالۋاندىعىنا قاراماستان قازاقستاننىڭ ەكونوميكاسى تاباندى ءوسىمدى ساقتاپ قالادى, – دەدى قازاقستان پرەزيدەنتى.
قاسىم-جومارت توقاەۆ قازاقستاننىڭ تۇراقتى ەكونوميكالىق وسىمگە, ينكليۋزيۆتى قوعام قۇرۋعا, تازا ەكولوگيانى ساقتاۋعا جانە ءتيىمدى ءارى ەسەپ بەرەتىن ينستيتۋتتار قۇرۋعا قول جەتكىزە الاتىنىنا سەنىم ءبىلدىردى.
مەملەكەت باسشىسى وسى مىندەتتەردى جۇزەگە اسىرۋ اياسىندا حالىقتىڭ ۇنىنە قۇلاق اساتىن مەملەكەت قۇرۋ تۇجىرىمداماسىنىڭ قولعا الىنعانى تۋرالى ايتتى. ونىڭ باستى مىندەتى – ۇكىمەت پەن حالىق اراسىنداعى ديالوگتى قامتاماسىز ەتۋ. سونىمەن قاتار مەملەكەت باسشىسى ءبىلىم جۇيەسىن جاڭعىرتۋدىڭ, «جاسىل» جانە تسيفرلى ەكونوميكانى جانە قارقىندى تۇردە ينفراقۇرىلىمدى دامىتۋدىڭ ماڭىزدىلىعىنا باسا نازار اۋداردى. ونىڭ ايتۋىنشا, بۇل باعىتتار جالپى ادامزاتتىڭ وركەندەۋى مەن ەكونوميكالىق جەتىستىكتەرگە جەتۋدىڭ قۋاتتى قوزعاۋشى كۇشى بولماق.
قازاقستان پرەزيدەنتى ءبىزدىڭ ەلدىڭ تاجىريبەسىندە تۇراقتى دامۋ ماقساتتارىنىڭ 80%-ى قازاقستاننىڭ ستراتەگيالىق باعدارلامالارىندا كورسەتىلگەنىن اتاپ ءوتتى.
– 2018 جىلى قازاقستان بۇۇ ينستيتۋتتارىمەن ءوزارا تىعىز ءىس-قيمىل جاساي وتىرىپ, تۇراقتى دامۋ ماقساتتارىنا قول جەتكىزۋگە ىقپال ەتەتىن «ينستيتۋتسيونالدىق ارحيتەكتۋرا» ەنگىزدى, ونىڭ ىشىندە باسقارۋشى كەڭەس تە بار. تۇراقتى دامۋ ماقساتتارى جونىنەن وتكەن العاشقى فورۋم 2019 جىلعى استانا ەكونوميكالىق فورۋمىنىڭ نەگىزگى ءىس-شاراسىنا اينالدى. بيىل شىلدە ايىندا ءبىز العاش رەت ەرىكتى تۇردە, قازاقستاننىڭ جەتىستىكتەرى مەن شەشىلمەگەن ماسەلەلەرى جانە الداعى ون جىلدىقتا جاسالۋى ءتيىس مۇمكىندىكتەر بويىنشا ۇلتتىق شولۋ جاسادىق, – دەپ اتاپ ءوتتى قاسىم-جومارت توقاەۆ.
مەملەكەت باسشىسى تۇراقتى دامۋ ماقساتتارىنىڭ, جالپى پلانەتانىڭ كەلبەتىن قالىپتاستىراتىن ءوزارا بايلانىسىن ەسكەرتە وتىرىپ, جەكەلەگەن ساناتتاردىڭ نەمەسە ەلدەردىڭ جەتىستىگىنە قاناعات تۇتىپ قاراپ وتىرۋعا بولمايتىنىن ايتتى.
بۇل ماسەلەدە مەملەكەت باسشىسى قازاقستاننىڭ تۇراقتى دامۋ ماقساتتارىن ايماقتىق جانە حالىقارالىق دەڭگەيدە بەلسەندى جۇزەگە اسىرىپ جاتقانىنا توقتالدى. وسى ورايدا قاسىم-جومارت توقاەۆ بىرقاتار شارانى ىسكە اسىرۋدى ۇسىندى.
مەملەكەت باسشىسىنىڭ ايتۋىنشا, بىرىنشىدەن, تۇراقتى دامۋ ماقساتتارىنا بولىنەتىن قارجى رەسۋرستارىنىڭ ءتيىمدى جۇمسالۋىن قامتاماسىز ەتۋ قاجەت.
ەكىنشىدەن, قاسىم-جومارت توقاەۆ قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن قۇرىلعان ازىق-ت ۇلىك قاۋىپسىزدىگى جونىندەگى يسلام ىنتىماقتاستىق ۇيىمىنىڭ شولەيتتەنۋ, جاسىل جەلەكتى قالپىنا كەلتىرۋ, ەروزيا, تۇزدانۋ, سونداي-اق الەۋمەتتىك قاۋىپسىزدىكتى قامتاماسىز ەتۋ ماسەلەلەرىن شەشۋگە باعىتتالعان ماقساتتارىنىڭ ماڭىزدىلىعىن اتاپ ءوتتى. ول جاقىن بولاشاقتا يىۇ-عا مۇشە 57 مەملەكەتتىڭ بارلىعى وسى باستاماعا قوسىلاتىنىنا سەنىم ءبىلدىردى. تاعى ءبىر پارمەندى شارا رەتىندە پرەزيدەنت ورتالىق ازيا مەملەكەتتەرى مەن اۋعانستان ءۇشىن تۇراقتى دامۋ ورتالىعىن قۇرۋدى اتاپ ءوتتى. ونىڭ ايتۋىنشا, بۇل تۇراقتى دامۋ ماقساتتارىن تەك قازاقستاندا عانا ەمەس, سونىمەن قاتار باسقا دا ورتالىق ازيا مەملەكەتتەرى مەن اۋعانستاندا جۇزەگە اسىرۋدى جەدەلدەتەتىن ەدى.