مادەنيەت قىزمەتكەرلەرىنىڭ جالاقىسىن ارتتىرۋ ءۇشىن ۇكىمەتكە ءتيىستى قاۋلى ازىرلەندى - ا. رايىمقۇلوۆا

مەملەكەت باسشىسىنىڭ جولداۋىندا بۇقارالىق سپورتتى دامىتۋدىڭ ماڭىزدىلىعىنا ەرەكشە ءمان بەرىلگەنى بەلگىلى. پرەزيدەنت اسىرەسە «سپورت ينفراقۇرىلىمىنىڭ بالالار ءۇشىن بارىنشا قولجەتىمدى بولۋىن قامتاماسىز ەتۋ كەرەك» دەگەن ەدى. مادەنيەت جانە سپورت ءمينيسترى اقتوتى رايىمقۇلوۆا ء«ۇش قوڭىر» مەكتەبى وسى مىندەتتى جۇزەگە اسىرۋعا ۇلەس قوسىپ جاتقانىن ايتا كەلە, سپورت سالاسىندا جۇرگىزىلىپ جاتقان جانە جوسپارلانىپ وتىرعان جۇمىستاردىڭ قورىتىندىسى بويىنشا 2025 جىلعا قاراي ەلىمىزدە دەنە شىنىقتىرۋ جانە سپورتپەن شۇعىلدانۋشىلاردىڭ سانىن 35%-عا دەيىن ارتتىرۋعا بولاتىنىن جەتكىزدى. بىلتىرعى جىلدىڭ قورىتىندىسىنا سايكەس, ەلدەگى سپورتپەن جۇيەلى تۇردە اينالىساتىندار سانى 5,4 ملن-نان استام ادام, ياعني 29,8%.

مينيستر سونداي-اق جولداۋ سالا قىزمەتكەرلەرىنىڭ الەۋمەتتىك جاعدايىن جاقسارتۋعا دا مۇمكىندىك بەرەتىنىن ايتتى. «مادەنيەت جانە سپورت مينيسترلىگى 2020 جىلدان باستاپ مادەنيەت جانە ونەر قىزمەتكەرلەرىنىڭ جالاقىسىن ارتتىرۋ ءۇشىن ۇكىمەتتىڭ ءتيىستى قاۋلىسىن ازىرلەدى, ول جىل سوڭىنا دەيىن قابىلداناتىن بولادى. مادەنيەت سالاسىنا تىكەلەي قاتىسى بار ادام رەتىندە, وسى جالاقىنى ارتتىرۋ ماسەلەسىنىڭ شەشىلۋىن قانشالىقتى كۇتكەنىمىزدى تۇسىنەمىن», - دەدى مينيستر.

قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ قولداۋىمەن وسىدان 3 اي بۇرىن اشىلعان «ۇشقوڭىر» سپورت كەشەنىندە سپورتتىڭ 16 ءتۇرى بويىنشا ۇيىرمەلەر جۇمىس ىستەيدى, 2 باسسەين بار. بالالار ەركىن كۇرەس, دزيۋدو, بوكس, ۆولەيبول, جەڭىل اتلەتيكا, تاەكۆاندو مەن ۇلكەن تەننيس سىندى وليمپيادالىق سپورت تۇرلەرىنەن جاتتىعادى. 45 جاتتىقتىرۋشى قىزمەت ەتەتىن مەكەمەدە 2 مىڭعا جۋىق سپورتشىنى دايىنداپ شىعارۋعا مۇمكىندىك بار. ەلباسى ن.نازارباەۆ بۇل كەشەننەن بولاشاق وليمپيادا جەڭىمپازدارى تۇلەپ شىعاتىنىنا سەنىم بىلدىرگەن ەدى.