18 قىركۇيەك كۇنى نۇر-سۇلتان قالاسىندا قازاقستان رەسپۋبليكاسى پارلامەنتى سەناتىنىڭ توراعاسى - حاتشىلىق باسشىسى داريعا نازارباەۆانىڭ توراعالىق ەتۋىمەن الەمدىك جانە ءداستۇرلى دىندەر سەزى حاتشىلىعىنىڭ XVIII وتىرىسى بولادى. جيىنعا قاتىسۋشىلار الدا وتەتىن سەزد جۇمىسىن پىسىقتاپ, ۇيىمداستىرۋ ماسەلەلەرىن تالقىلايدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
وتىرىسقا 19 ەلدەن كەلگەن ءتۇرلى دىندەر وكىلدەرى مەن كوشباسشىلارى قاتىسادى. ولاردىڭ قاتارىندا قىتاي, وڭتۇستىك كورەيا, تايلاند, رەسەي, مىسىر, ساۋد ارابياسى, پاكىستان, ۆاتيكان, ۇلىبريتانيا جانە تاعى باسقا دا ەلدەر بار. بارلىق دىندەر وكىلدەرى ەلورداعا كەلىپ بولدى.
كۇن ءتارتىبى بويىنشا الەمدىك جانە ءداستۇرلى دىندەر كوشباسشىلارىنىڭ VI سەزىنىڭ قورىتىندىسى مەن حاتشىلىقتىڭ الداعى شارالارى تالقىعا سالىنادى. سونداي-اق الداعى VII سەزد بەن حاتشىلىقتىڭ XIX وتىرىسى وتەتىن كۇنى بەلگىلەنەتىن بولادى.
بۇگىن بەيبىتشىلىك جانە كەلىسىم سارايىندا ەرتەڭگى وتەتىن حاتشىلىق وتىرىسىنا ازىرلىك جۇمىستارى باستالدى. قاتىسۋشىلار ادەتتەگىدەي «اتريۋم» زالىندا باس قوسادى. مۇندا قازىر سوڭعى دايىندىق جۇمىستارى جۇرۋدە: ورىندىقتار قويىلىپ, دىبىس جانە جارىق جابدىقتارى تەكسەرىلۋدە.
الەمدىك دىندەر وكىلدەرى ءۇشىن ارنايى عيبادات بولمەلەرى بەلگىلەندى. بۇقارالىق اقپارات وكىلدەرىنە ارنايى ءباسپاسوز ورتالىعى جاساقتالىپ, قاجەتتى اقپاراتپەن قامتاماسىز ەتۋگە جانە تىكەلەي ەفير ارقىلى قاتىسۋشىلاردى تىڭداۋعا مۇمكىندىك بار.
«ن.نازارباەۆتىڭ كونفەسسياارالىق جانە وركەنيەتارالىق ديالوگتى دامىتۋ ورتالىعىنىڭ» باسقارما توراعاسى التاي ابيبۋللاەۆتىڭ ايتۋىنشا, دىنارالىق, داستۇرارالىق بولىكتەردى ىلگەرىلەتۋدىڭ قازاقستاندىق ۇلگىسى ءبىزدىڭ ەلىمىزدىڭ بەيبىتشىلىك پەن ءوزارا تۇسىنىستىكتى قامتاماسىز ەتۋدەگى ەرەكشە بەينەسى بولىپ تابىلادى.
«الەمدەگى ءتۇرلى دىندەر كوشباسشىلارى مەن وكىلدەرى اراسىندا ءدال وسى رۋحاني ديپلوماتيا ارقىلى ديالوگ ورناتۋ مەن دامىتۋعا قازاقستان بەلسەندى ۇلەس قوسىپ كەلە جاتقانى سىزدەرگە بەلگىلى», دەدى التاي ابيبۋللاەۆ.