وتاندىق جانە شەتەلدىك جوعارى وقۋ ورىندارى وكىلدەرىنىڭ قاتىسۋىمەن ەلوردادا ءبىلىم ساپاسىن قامتاماسىز ەتۋ بويىنشا ەۋرازيالىق فورۋم ءوتتى. شارادا سپيكەرلەر مەن قوناقتار ۋنيۆەرسيتەتتى تسيفرلاندىرۋدىڭ ماڭىزى مەن ءتيىمدى جولدارى جونىندە وي ءبولىستى.
جوعارى ءبىلىم سالاسىنداعى وزەكتى تاقىرىپتاردى تالقىلاۋعا ارنالعان الاڭدى ء«بىلىم ساپاسىن قامتاماسىزداندىرۋ بويىنشا تاۋەلسىز اگەنتتىگى» ۇيىمداستىردى.
جيىندا العاشقىلاردىڭ ءبىرى بولىپ ءسوز العان EQAR (جوعارى ءبىلىم بەرۋ ساپاسىن قامتاماسىز ەتۋدىڭ ەۋروپالىق رەەسترى) پرەزيدەنتى, پروفەسسور كارل ديتريح «تسيفرلاندىرۋ عاسىرىنداعى ساپا, ساپا كەپىلدىگى جانە ىنتىماقتاستىق» تاقىرىبىندا بايانداما جاسادى. ونىڭ ويىنشا, ءبىلىم بەرۋدىڭ ساپاسى وقىتۋدىڭ ساپاسىنا, سونداي-اق پەداگوگتاردىڭ كاسىبيلىگى مەن بىلىكتىلىگىنە بايلانىستى. قازىرگى زاماندا زاماناۋي تەحنيكالار مەن تسيفرلى تەحنولوگيالاردى مەڭگەرمەگەن مامان ساپالى ناتيجە كورسەتە المايدى. ال ساپالى بىلىممەن قامتاماسىز ەتۋدە ىنتىماقتاستىقتىڭ ءرولى وراسان. بۇل ءوز كەزەگىندە ءبىلىم بەرۋدى ينتەرناتسيونالداندىرۋ ماسەلەسىن العا شىعارادى. «ينتەرناتسيونالداندىرۋ – ءبىلىم بەرۋدەگى كوپتەگەن تۇيتكىلدىڭ ءتۇيىنىن تارقاتاتىن ءتيىمدى جول. ءبىز ءوز-ءوزىمىزدى دامىتۋ ءۇشىن ءبىر-بىرىمىزگە قۇشاق اشۋىمىز كەرەك», دەگەن سپيكەر ءبىلىم بەرۋدى ينتەرناتسيونالداندىرۋ الەمدىك وزىق تاجىريبەنى يگەرۋگە, مامانداردى وقىتۋعا, حالىقارالىق قاۋىمداستىقتارمەن تىعىز بايلانىس ورناتۋعا, سەنىممەن ديالوگ قۇرۋعا, اينالىپ كەلگەندە ساپاعا كەپىلدىك بەرەدى.
ساتباەۆ ۋنيۆەرسيتەتىنىڭ اكادەميالىق جۇمىستار جونىندەگى پرورەكتورى رينات مارات ۇلى ءبىلىم بەرۋدى تسيفرلاندىرۋ اياسىنداعى جوو-نىڭ باسەكەگە قابىلەتتىلىگىنە توقتالدى. سپيكەردىڭ سوزىنە سەنسەك, ۋنيۆەرسيتەتتەر باسەكەگە قابىلەتتى بولۋى ءۇشىن ماماندىق – قۇزىرەتتىلىككە, ماماندانۋ – داعدىلانۋعا, اقپاراتتىق ءتارتىپ – ينتەراكتيۆتى تارتىپكە, لەكتسيا – بەلسەندى ساباققا, اقپارات – تالقىلاۋعا, جازباشا كۋرستىق جانە ديپلومدىق جۇمىستار – دايىن نىسان نەمەسە ءونىم نەگىزىندەگى كۋرستىق جانە ديپلومدىق جۇمىستارعا اينالۋى قاجەت. بايانداماشىنىڭ پايىمداۋىنشا, تسيفرلاندىرۋ زامانىنداعى پروفەسسور قويىلعان سۇراقتىڭ جاۋابىن ويلانىپ بولامىن دەگەنشە, ستۋدەنتتەر ءوز كەرەگىن بىرنەشە فاكتىلەرمەن تاۋىپ قويادى. سوندىقتان بۇرىنعى ءادىس-ءتاسىل جارامايدى.
بىرنەشە بايانداماشىنى تىڭداپ, تالقىلاۋعا قاتىسقان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى حالىقارالىق قۇقىق كافەدراسىنىڭ مەڭگەرۋشىسى شولپان تلەپينا فورۋمنان كوپ وي تۇيگەنىن ايتتى.