«ەگەمەن»-ءنىڭ ارداگەر ءجۋرناليسى ءادىل دۇيسەنبەك ومىردەن ءوتتى

ءادىل دۇيسەنبەك 1942 جىلى 24 مامىردا تاراز قالاسىنىڭ جانىنداعى «جاس وركەن» اۋىلىندا دۇنيەگە كەلگەن. 1961 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە ءتۇستى. 1964-1967 جىلدارى اسكەر قاتارىندا بولىپ, اۋە دەسانتىندا قىزمەت ەتكەن. اسكەري مىندەتىن وتەپ كەلگەن سوڭ, ۋنيۆەرسيتەتتەگى وقۋىن ودان ءارى جالعاستىرىپ, 1969 جىلى ءبىتىرىپ شىقتى.

ۋنيۆەرسيتەتتىڭ سوڭعى كۋرسىندا رەسپۋبليكالىق «سوتسياليستىك قازاقستان» (قازىرگى «ەگەمەن قازاقستان») گازەتىنە كىشى ادەبي قىزمەتكەر بولىپ ورنالاستى. سودان ءۇزىلىسسىز باسىلىمدا 36 جىل ەڭبەك ەتكەن. بولىم مەڭگەرۋشىسى, رەداكتسيا القاسىنىڭ مۇشەسى بولعان.

اڭگىمەلەرى مەن پوۆەستەرى بىرنەشە ۇجىمدىق جيناققا ەنگەن. باسپادان «اق كۇمبەز» («جالىن» 1977), «كوكجيەك» («جالىن», 1979), «جۇرەك جىلۋى» («قازاقستان», 1984), «تەرگەۋ ءالى بىتكەن جوق» («جەتى جارعى», 1997), «كوكجيەك» («فوليانت», 2002), «قارا شاڭىراق» («فوليانت», 2004), «شەراعامنىڭ شەرۋى» («قازىعۇرت», 2007) دەگەن كىتاپتارى باسىلىپ شىقتى. 2002 جانە 2004 جىلدارى «مەنىڭ شەراعام» اتتى ەسسە-اڭگىمەلەر مەن نوۆەللالار جيناعى («ولكە») شىقتى.

ءادىل دۇيسەنبەك س.حودجانوۆ اتىنداعى سىيلىقتىڭ لاۋرەاتى (1995). ەلگە سىڭىرگەن ەڭبەگى ءۇشىن جازۋشى قر جوعارعى كەڭەسىنىڭ گراموتاسىمەن (1987), «ەڭبەك ارداگەرى» (1988), «قازاقستان رەسپۋبليكاسىنىڭ تاۋەلسىزدىگىنە 10 جىل» (2002), «ەرەن ەڭبەگى ءۇشىن» (2002) مەدالدارىمەن ماراپاتتالعان.

وسىدان ءبىر جىل بۇرىن «ەگەمەننىڭ» قارا شاڭىراعىندا قوناقتا بولىپ, ۇجىم مۇشەلەرىمەن كەزدەسكەن ەدى.