فۋتبولدان قازاقستان ۇلتتىق قۇراماسى 2020 جىلعى ەۋروپا چەمپيوناتىنىڭ ىرىكتەۋ كەزەڭىندەگى كەزەكتى ويىنىن وتكىزدى. سىرت الاڭدا رەسەي قۇراماسىمەن كەزدەسكەن جەرلەستەرىمىز سوڭعى مينۋتتا ءوز قاقپاسىنا گول وتكىزىپ الىپ, 0:1 ەسەبىمەن جەڭىلىپ قالدى. ءسويتىپ, سوڭعى مينۋت سيندرومى تاعى دا قايتالاندى. دەگەنمەن, قازاقستان قۇراماسىنىڭ كەشەگى ويىنى جانكۇيەرلەردىڭ كوڭىلىنەن شىقتى.
ەۋرو-2020 ءتۋرنيرى اياسىنداعى رەسەي مەن قازاقستان ماتچ الدىندا فۋتبول ماماندارى قوس قۇراما اراسىنداعى العاشقى ويىنداعى ناتيجەنى ەسكەرىپ جانە رەسەيلىكتەردىڭ سوڭعى ويىنداعى كورسەتكىشتەرىنە قاراپ, بۇل جولى دا رەسەي قۇراماسى قازاقستاندى قالپاقپەن ۇرىپ الادى دەپ بولجاعان بولاتىن. الايدا ميحال بيلەك شاكىرتتەرى مامانداردىڭ ساۋەگەيلىگىن جوققا شىعارىپ, وڭايلىقپەن بەرىلمەيتىنىن اڭعارتتى. باس باپكەر ميحال بيلەك رەسەيگە قارسى جاس ءارى تىڭ فۋتبولشىلاردى ءبىرىنشى مينۋتتان باستاپ الاڭعا شىعاردى.
جالپى, چەحيالىق مامان سوڭعى ەكى ويىننان بەرى شابۋىلعا قاراعاندا, قورعانىسقا كوپ كوڭىل ءبولىپ كەلەدى. كيپر جانە رەسەي قۇراماسىنا قارسى وتكەن ويىندا الاڭعا بەس قورعاۋشىنى شىعاردى. سوندىقتان قازاقستان قۇراماسى ادەتتەگىدەي قورعانىسقا كوبىرەك كوڭىل ءبولىپ, قارىمتا شابۋىلعا يەك ارتتى. جالپى, باس باپكەردىڭ كوكسەگەنى دە تەڭ ويىن بولاتىن. بىراق بۇل ويى جۇزەگە اسپاي قالدى. ماتچ بويى ۇزدىكسىز شابۋىلداعان رەسەي فۋتبولشىلارى تەك ويىننىڭ 89-مينۋتىندا عانا قازاقستان قۇراماسىنىڭ قاقپاسىنان ساڭىلاۋ تاپتى. الەكساندر گولوۆيننىڭ سول قاپتالدان كوتەرگەن دوبىنا ءبىرىنشى بولىپ جەتكەن رەسەيلىك فۋتبولشى ماريو فەرناندەس باسپەن گول سوعىپ كەتتى. قاقپاشى نەپوگودوۆ دوپتىڭ باعىتىن تاپقانىمەن, قاقپانى گولدان امان ساقتاپ قالا المادى. وسىلايشا رەسەي قۇراماسى ءوز الاڭىندا 1:0 ەسەبىمەن ارەڭ جەڭىسكە جەتتى.
ماتچتان كەيىنگى ءباسپاسوز ءماسليحاتىندا قازاقستان قۇراماسىنىڭ باس باپكەرى ميحال بيلەك كەشەگى ويىندا ءبىر ۇپاي الۋىمىز كەرەك ەدى دەدى. سونداي-اق ول ۇلتتىق قۇرامادا العاشقى ويىنىن وتكىزگەن جاس فۋتبولشى ايبول ابىكەننىڭ ونەرىن جوعارى باعالادى. «قارسىلاستىڭ دەڭگەيىن الدىن الا ۇعىنىپ, كوپ قورعانۋعا تۋرا كەلەتىنىن تۇسىندىك. سول سەبەپتى قورعانىس جۇيەسىن تۇزۋگە كۇش جۇمسادىق. جوسپار بويىنشا وينادىق, سول سەبەپتى ءبىزدىڭ قاقپانىڭ الدىندا قاۋىپتى ساتتەر بولمادى. ءبىر ستاندارتتان عانا جەڭىلىپ قالدىق. ويىنشىلار سوڭىنا دەيىن كۇرەسكەن ەدى. ءبىر ۇپايعا لايىق بولاتىن. وتكەن ويىندا كوپ كۇش سارقىدىق. سول سەبەپتى وزگەرىستەرگە جۇگىنۋگە تۋرا كەلدى. نەگىزگى قۇرامدا شىققان ويىنشىلاردىڭ بارلىعى جاقسى وينادى. ايبول ابىكەن ۇلتتىق قۇراماداعى العاشقى ويىنىن مىقتى قارسىلاسقا قارسى لايىقتى وتكىزدى. قالعان جىگىتتەر دە جاراپ تۇر», دەدى باس باپكەر.
ەندى قازاقستان قۇراماسى 10 قازان كۇنى «استانا ارەنادا» كيپر قۇراماسىن قابىلدايدى.