بۋراباي باۋرايىندا «Qazaqstan. A la Prima» فورۋمدارى شەڭبەرىندەگى «بۋراباي اڭىزدارى» تاقىرىبىندا سۋرەتشىلەردىڭ حالىقارالىق فورۋمى وتكىزىلدى.
كوز ۇشىندا ەتەگىن ماڭگى جاسىل قاراعايلار مەن قولدىڭ سالاسىنداي اق قايىڭدار كومكەرگەن بۋرابايدىڭ بەينەسى. ۇيىسا وسكەن قالىڭ ورماننىڭ قىراتقا ورلەگەن تۇسىندا سارىارقانىڭ سامال جەلىمەن تەربەلگەن ءبيشى قايىڭدار بيلەپ تۇر. ون سان ءتۇرلى بوياۋ. الدە ودان دا كوپ پە ەكەن؟ تىلسىم تابيعاتتىڭ تۇنىعىن سول قالپىندا قوتارىپ الىپ, كەنەپكە كوشىرگەندەي.
سۋرەت ونەرى شىن مانىندە قۇدىرەت-اۋ! قازاق دالاسىنىڭ كوركەم پۇشپاعىن كەلىستى سۋرەتتەن كورگەندە جۇرەك شىمىرلاپ كەتەدى ەكەن. حالىقارالىق فورۋمعا بىرىنەن ءبىرى وتكەن, كىلەڭ سايدىڭ تاسىنداي سۋرەتشىلەر جينالىپتى. كورەيا, اقش, گوللانديا, قىرعىزستان, گەرمانيا, تۇركيا, ۆەتنام, رەسەي, وزبەكستان ەلدەرىنىڭ سۋرەتشىلەرى. مۇنداعى نەگىزگى ماقسات – اتا-بابامىز اق نايزانىڭ ۇشىمەن, اق بىلەكتىڭ كۇشىمەن قورعاپ قالعان كيەلى جەرلەردى بەينەلەۋ ونەرى ارقىلى بارشا الەمگە تانىتۋ.
قازاق توپىراعىنا تابانى تۇڭعىش رەت تيگەن امەريكالىق سۋرەتشى Alan Skalaski كورىكتى ءوڭىردىڭ كوركەم بەينەسى امەريكانىڭ سولتۇستىك وڭىرلەرىن ەسكە سالادى دەيدى. بالكىم سوندىقتان دا ەتەنە جاقىن ءتارىزدى. نيۋ-دجەرسي شتاتىندا دۇنيەگە كەلگەن 26 جاستاعى سۋرەتشىنىڭ قىتاي ەلىندە وقىپ جۇرگەنىنە ءۇش جىل بولىپتى. ال سۋرەت ونەرى ەس بىلگەلى جان جۇرەگىن باۋراعان دۇنيەسى.
– نۇر-سۇلتان قالاسىنان بۋرابايعا ساپار شەكتىك. جولدىڭ قوس قاپتالى جانارىڭ جەتپەس كەڭىستىك. نە دەگەن مول دۇنيە؟! امەريكانىڭ سولتۇستىك-باتىس, سولتۇستىك-ورتالىق بولىگىندە ءدال وسىنداي كورىنىستى كورۋگە بولار ەدى. ءتىپتى مىنانداي كوركەم كورىنىستى سۋرەت تىلىنە كوشىرۋ سۋرەتشىگە دە وڭاي شىعار. نازار سالىپ قاراساڭىز, قانشاما قانىق بوياۋ, انىق كەسكىن مەنمۇندالاپ تۇرعان جوق پا؟ فورۋم اياسىندا تورتكۇل دۇنيەنىڭ ءتورت بۇرىشىنان كەلگەن سۋرەتشىلەرمەن تانىسىپ, پىكىر الماسىپ, تىڭ اقپارات الۋعا مۇمكىندىك تۋدى. وسىنىڭ ءوزى وتە پايدالى دۇنيە, – دەيدى Alan Skalaski.
ال گەرمانيادان كەلگەن تانىمال سۋرەتشى حەتتيك روبەرت تاجىكستاندا دۇنيەگە كەلگەن ەكەن. قازاقستاننىڭ جايىمەن ەتەنە تانىس.
– 2005 جىلى بەرليندە وتكەن كورمەگە قازاقستاندىق سۋرەتشىلەرمەن بىرگە ءوز تۋىندىلارىمدى قويعان بولاتىنمىن. كەيىن دە سان مارتە كورمەلەردە كەزدەسىپ جۇردىك. گەرمانيادا قازاق ەلشىلىگىنىڭ عيماراتىنداعى ەكى ۇلكەن قابىرعاداعى قازاق دالاسىنان سىر شەرتەتىن تاريحي سۋرەتتەردى سالۋعا اتسالىستىم, – دەيدى سۋرەتشى.
ايماقارالىق مادەني بايلانىستى نىعايتىپ, ءتۋريزمدى دامىتۋ ءۇشىن اسا قولايلى ءوڭىر سانالاتىن بۋراباي كۋرورتىنىڭ مارتەبەسىن ارتتىرۋدى كوزدەيتىن فورۋمنىڭ باستى ماقساتى كورىكتى جەرلەردى سۋرەت تىلىمەن ايشىقتاۋ عانا ەمەس, ونەگەگە تولى باي تاريحىمىزدى بار الەمگە تانىتۋ.
فورۋم ناتيجەسىندە ءار سۋرەتشى ءوزىنىڭ ەكى تۋىندىسىن وبلىس جۇرتشىلىعىنا تارتۋ ەتپەك. سوڭعى ءتۇيىن «كوكشەتاۋ» مادەنيەت سارايىندا وتەتىن قورىتىندى كورمەدە تۇيىلمەك. ەندى الەم جۇرتشىلىعى ەلىمىزدىڭ وتكەنى مەن بۇگىنىن, اجارلى بەينەسىن, بازارلى بولاشاعىن بارشاعا ۇعىنىقتى سۋرەت ءتىلى ارقىلى ءتۇيسىنىپ, تانيتىن بولادى.
اقمولا وبلىسى