الماتىدا شاحماتتان ازيا چەمپيوناتى باستالدى. ايتۋلى دودادا 16 مەملەكەتتەن كەلگەن 70 ويىنشى باق سىناۋدا.
وسى جارىستا العاشقى ءجۇرىستى شارتتى تۇردە قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت كوميتەتىنىڭ توراعاسى سەرىك ساپيەۆ, الماتى قالاسى اكىمىنىڭ كەڭەسشىسى ءۋاليحان تەن جانە قازاقستان شاحمات فەدەراتسياسىنىڭ ۆيتسە-پرەزيدەنتى ەركىن يسرايلوۆ جاسادى. سودان كەيىن شارشى تاقتاداعى شيەلەنىستى تارتىستار باستالدى. بۇل باسەكەلەر ەكى جاس ەرەكشەلىكتەرى بويىنشا وتۋدە: 50 جاستان جوعارىلار جانە 65 جاستان جوعارىلار.
الماتىداعى دوداعا قاتىسۋشىلار قاتارىندا قازاقستاندىق ەلەنا انكۋدينوۆا مەن ايتقازى بايمۇرزين, اۆستراليالىق حەلەن ميلليگان جانە تاعى باسقا اتاقتى شاحماتشىلار بار.