«رۋحاني جاڭعىرۋ: قازاق ءتىلى – ۇلتارالىق قاتىناس ءتىلى» تاقىرىبىندا ا. بايتۇرسىن ۇلى اتىنداعى ءتىل ءبىلىمى ينستيتۋتى مەن حالىقارالىق «قازاق ءتىلى» قوعامى بىرلەسە وتكىزگەن حالىقارالىق عىلىمي-پراكتيكالىق كونفەرەنتسيا قازاقستان حالقى تىلدەرى كۇنى مەن الاش قايراتكەرى, عۇلاما عالىم, قازاقتىڭ رۋحاني كوسەمى – احمەت بايتۇرسىن ۇلىنىڭ تۋعان كۇنىنە ارنالدى.
الاش قايراتكەرىنىڭ ەل كەلەشەگى جولىنداعى ولشەۋسىز ەڭبەگىن دارىپتەۋدى, جاستار اراسىندا ناسيحاتتاۋدى ماقسات ەتە وتىرىپ وتكىزگەن كونفەرەنتسيا بارىسىندا قازاقستان رەسپۋبليكاسى پرەزيدەنتىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋى عالىمدار تارىپىنان كەڭىنەن تالقىلانىپ, ەل كەلەشەگى ءۇشىن ماڭىزدى قۇجاتتىڭ مازمۇنىنا وراي كەلەلى پىكىرلەر ايتىلدى. پرەزيدەنت جولداۋىنداعى «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى» دەگەن ۇستانىمىنا ۇلكەن سەنىم ارتقان عالىمدار وسى باعىتتا ءتىل, ادەبيەت, تاريح سالالارى بىرلەسە جۇمىس ىستەۋى قاجەت دەگەن تۇجىرىم جاسادى.
انا ءتىلىمىزدىڭ مەملەكەتتىك ءتىل دارەجەسىندە دامۋى, قوعامدىق قولدانىس شەڭبەرىنىڭ كەڭەيۋىمەن قاتار احمەت بايتۇرسىنوۆتىڭ قۇندى مۇرالارىن كەيىنگى ۇرپاققا جەتكىزۋدى ماقسات ەتە وتىرىپ ۇيىمداستىرىلعان كونفەرەنتسيانى ا.بايتۇرسىن ۇلى اتىنداعى ءتىل ءبىلىمى ينستيتۋتى ديرەكتورىنىڭ عىلىم جونىندەگى ورىنباسارى سارسەن قۇلمانوۆ جۇرگىزىپ وتىردى. اتالعان ءىس-شارادا ءبىلىم جانە عىلىم ءمينيسترى ا.ايماعامبەتوۆتىڭ, مادەنيەت جانە سپورت ءمينيسترى ا. رايىمقۇلوۆانىڭ قۇتتىقتاۋ حاتتارى وقىلىپ, الماتى قالاسى اكىمى اپپاراتىنىڭ تىلدەردى دامىتۋ جانە لاتىن گرافيكاسىنا كوشۋ ورتالىعىنىڭ باس ينسپەكتورى باقىت قالىمبەت قازاق ءتىلىنىڭ پارمەنىن كۇشەيتۋ ماقساتىندا ءتىل باسقارماسىن قايتا قۇرىپ, انا ءتىلى مەرەكەسىن جوعارى دەڭگەيدە اتاپ ءوتۋدى عالىمدارمەن بىرلەسىپ قولعا الساق ءارى وسى ۇسىنىسىمىزدى پرەزيدەنتكە جەتكىزسەك دەگەن پىكىرىمەن ءبولىستى.
القالى جيىننىڭ كىرىسپە ءسوزىن حالىقارالىق «قازاق ءتىلى» قوعامىنىڭ پرەزيدەنتى, قر ۇعا اكادەميگى ومىرزاق ايتباەۆ الىپ, قازاق حالقىنىڭ, بولاشاق ۇرپاقتىڭ ءححى عاسىردا دەربەس ۇلت بولىپ, ەگەمەندى ەل بولىپ قالۋىنىڭ ەڭ باستى كەپىلىنىڭ ءبىرى – قازاق ءتىلىنىڭ تولىققاندى عىلىم ءتىلى بولۋى قاجەتتىگىنە توقتالدى.
كونفەرەنتسيادا ەۋرازيا عىلىمي-زەرتتەۋ ينستيتۋتىنىڭ ديرەكتورى ۆاكۋر سۇمەر, «ادىلەت» تاريحي-اعارتۋ قوعامى توراعاسىنىڭ ورىنباسارى بەيبىت قويشىباەۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى انار سالقىنباي, اباي اتىنداعى قازاق ۇلتتىق ۋنيۆەرسيتەتىنىڭ پروفەسسورلارى تاڭات اياپوۆا, تەمىرحان تەبەگەنوۆ, م.اۋەزوۆ اتىنداعى ادەبيەت جانە ونەر ينستيتۋتىنىڭ پروفەسسورى ايگۇل ىسماقوۆا, قوعامى قايراتكەرى اسىلى وسمان ءسوز سويلەپ, ينستيتۋت پروفەسسورلارى – ءالىمحان جۇنىسبەك, ايمان الداش, قىزدارحان رىسبەرگەن, قۇرالاي كۇدەرينوۆا, ورىناي جۇباەۆا, فيلولوگيا عىلىمدارىنىڭ كانديداتى ەلميرا وتەباەۆا جانە ت.ب. عالىمدار قاتىسىپ, عىلىمي ورتادا كوتەرىلگەن كەلەلى ماسەلەلەردى الداعى ۋاقىتتا جۇزەگە اسىرۋ بارىسىنا قاتىستى ويلارىمەن ءبولىستى.