كەشە اقوردادا مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ توراعالىق ەتۋىمەن شەتەلدەردە كادرلار دايىنداۋ جونىندەگى رەسپۋبليكالىق كوميسسيانىڭ كەزەكتى وتىرىسى بولدى.
ەلباسى نۇرسۇلتان نازارباەۆتىڭ باستاماسىمەن جاسالعان شەتەلدەردە ماماندار دايىنداۋ ءجونىندەگى “بولاشاق” باعدارلاماسى قازىردىڭ وزىندە ءوزىنىڭ ومىرشەڭدىگىن كورسەتە باستادى. وسى باعدارلامامەن شەتەلدە وقىپ, مامان بولىپ كەلىپ جاتقان جاستار ەل ەكونوميكاسىن الەمنىڭ بارىنشا دامىعان, باسەكەلەستىككە توتەپ بەرە الاتىن ەلدەرىنىڭ قاتارىنا شىعارۋ جولىندا جەمىستى ەڭبەك ەتىپ ءجۇر. قازاقستان ەكونوميكاسىنىڭ جوعارى دەڭگەيدە دامۋى جانە ەلىمىزدىڭ گۇلدەنۋى ناق وسى مامانداردىڭ ءبىلىمى مەن بىلىگىنە تىكەلەي بايلانىستى, دەدى كوميسسيا جۇمىسىن جۇرگىزىپ وتىرعان ق.ساۋداباەۆ.
“بولاشاق” ستيپەندياسىنا ۇمىتكەرلەردى كونكۋرستىق تاسىلمەن تاڭداۋ 2010 جىلدىڭ 13-26 اقپانى ارالىعىندا جۇرگىزىلگەن بولاتىن. ونىڭ ەكى تۋرىنان وتكەن 196 ءۇمىتكەردىڭ جەكە ىستەرى رەسپۋبليكالىق كوميسسيانىڭ قاراۋىنا ۇسىنىلدى. سونىڭ ىشىندە 135 ۇمىتكەر شەتەلدىك جوعارى وقۋ ورىندارىنا وزدىگىنەن تۇسكەندەر, ال 61-ءى جالپى كونكۋرس بويىنشا قاتىسقاندار بولىپ شىقتى. ۇمىتكەرلەردىڭ 22-ءسى باكالاۆر, 41-ءى ماگيستراتۋرا, 133-ءى عىلىمي تاجىريبەدەن وتۋگە بارماقشى ەكەن.
ۇمىتكەرلەردىڭ ەڭ كوبى ۇلىبريتانيا جوو-لارىنا بارۋدى قالاعان كورىنەدى. ولاردىڭ سانى 55 ادام, ال رەسەيگە – 50 جانە اقش-قا 31 ۇمىتكەر بارۋدى كوزدەپ وتىر. سونداي-اق پولشا, يسپانيا, سلوۆاكيا, شۆەيتساريا, گەرمانيا, فرانتسيا, كانادا, يتاليا, بەلگيا, مالايزيا, سينگاپۋر جانە ت.ب. ەلدەردى قالاعاندار دا بار. “بولاشاقتىقتار” تاڭداعان باسىمدى ماماندىقتار اراسىندا “كاسىبي ءبىلىمنىڭ تەورياسى مەن مەتوديكاسى”, “پەداگوگيكالىق دياگنوستيكا, ءبىلىم ساپاسىن باعالاۋ مەن باسقارۋ”, “شىعىستانۋ”, “اقپاراتتىق تەحنولوگيا”, “ەكولوگيا”, “قۇقىق”, “ەكونوميكا”, “بيوتەحنولوگيا”, “مەملەكەتتىك ساياسات”, “قوعامدىق دەنساۋلىق ساقتاۋ”, “مەنەدجمەنت” جانە باسقالار بار.
وتىرىس قورىتىندىسى بويىنشا رەسپۋبليكالىق كوميسسيا “بولاشاق” ستيپەندياسىن 139 ۇمىتكەرگە بەرەتىندىگى جونىندە شەشىم قابىلدادى. ونىڭ ۇلكەن بولىگىن, جوعارىدا ايتقانىمىزداي, عىلىمي تاجىريبەدەن وتۋگە باراتىن ۇمىتكەرلەر يەلەندى.
جاقسىباي سامرات.