قىتايدىڭ ۆەيفان قالاسىندا شاحماتتان 8,10 جانە 12 جاستاعى بالالار اراسىندا الەم بىرىنشىلىگى ءوز مارەسىنە جەتتى.
ايتۋلى جارىستا قازاقستان قۇراماسى قوس كۇمىس مەدالدى يەلەندى. 12 جاسقا دەيىنگى قىزداردىڭ باسەكەدە الۋا نۇرمانوۆا مەن گالينا ميحەەۆا 9,5 ۇپايدان جيىپ, وزگەلەرلەردەن قارا ءۇزىپ كەتتى. 8 جاسقا دەيىنگى ۇلداردىڭ سايىسىندا دا ءدال سونداي جاعداي قايتالاندى. 9 ۇپايدان ولجالاعان دىنمۇحامەد تولەندينوۆ پەن ارتەم لەبەدەۆ جارىس كەستەسىندە كوش باستادى. الايدا قوسىمشا كورسەتكىشتەر بويىنشا باس جۇلدە رەسەيدەن كەلگەن قوس شاحماتشىعا بۇيىرىپ, ءبىزدىڭ ورەندەر كۇمىس مەدالدى قاناعات تۇتتى. سونداي-اق رايانا جۇماعالي (8 جاسقا دەيىن) مەن ەدگار مامەدوۆتىڭ دە (10 جاسقا دەيىن) ونەرى كورەرمەندەردىڭ كوڭىلىنەن شىقتى. ولاردىڭ قولدارى جۇلدەگە ءسال عانا جەتپەدى. رايانا ءتورتىنشى ورىنعا تۇراقتاسا, ەدگار بەسىنشى ساتىعا تابان تىرەدى.
- الەم بىرىنشىلىگىندەگى شاكىرتتەرىمنىڭ ناتيجەسىنە كوڭىلىم تولدى. الۋا 88 سپورتشىدان وزسا, دىنمۇحاممەد 94 قارسىلاسىن ارتقا تاستادى. ارينە, بۇل وتە جاقسى كورسەتكىش. قازاقستاننىڭ بالعىن شاحماتشىلارى الداعى ۋاقىتتا دا تولاعاي تابىستارعا جەتىپ, ءوز جانكۇيەرلەرىن قۋانتادى دەگەن ويدامىن, – دەيدى ەلىمىزدىڭ بالالار مەن جاسوسپىرىمدەر قۇراماسىنىڭ جاتتىقتىرۋشىسى, گروسسمەيستەر ءانۋار يسماعامبەتوۆ.