فيفا-نىڭ تۇجىرىمى بويىنشا 2019 جىلدىڭ ەڭ ۇزدىگى اتاعىنان ۇمىتكەر ءۇش فۋتبولشىنىڭ ەسىمى انىقتالدى. ولار – ليونەل مەسسي, كريشتيانۋ رونالدۋ جانە ۆيردجيل ۆان دەيك.
بۇگىنگى تاڭدا جوعارىدا ەسىمدەرى اتالعان جىگىتتەردىڭ بارلىعى دا جاسىل الاڭدا جاسىنداي جارقىراپ ءجۇر. ماسەلەن, 32 جاستاعى «بارسەلونانىڭ» بەتكەۇستارى ليونەل مەسسي مەن 34 جاستاعى «يۋۆەنتۋستىڭ» جۇلدىزى كريشتيانۋ رونالدۋدىڭ سپورتتىڭ بۇل تۇرىندە تولاعاي تابىستارعا قول جەتكىزدى. 2008-2017 جىلدار ارالىعىندا قوس ساڭلاقتىڭ ارقايسىسى «التىن دوپتى» بەس رەتتەن يەلەندى. بۇل جايت باقانداي توعىز جىل بويى ولاردىڭ وزگەلەردەن وق بويى وزىق بولعانىن انىق اڭعارتادى.
بۇل كۇندەرى «ليۆەرپۋلدىڭ» ساپىندا ونەر كورسەتىپ جۇرگەن 28 جاستاعى گوللانديالىق قورعاۋشى ۆيردجيل ۆان دەيك تە سوڭعى ۋاقىتتا اسقان شەبەرلىك تانىتۋدا. بيىل ول ۋەفا تاعايىنداعان «ەۋروپانىڭ ەڭ ۇزدىك فۋتبولشىسى» اتاعىن جەڭىپ العان بولاتىن.
ال وزگە اتالمىدار بويىنشا مىنالار جىلدىڭ ۇزدىگى اتانۋعا ءۇمىتتى:
ايەلدەر اراسىندا ەڭ ۇزدىك ويىنشى –ليۋسي برونز (انگليا, «وليمپيك ليون»), الەكس مورگان (اقش, «ورلاندو پرايد») جانە مەگان راپينو (اقش, «رەين فك»).
ەرلەر اراسىنداعى ەڭ ۇزدىك قاقپاشى – اليسسون (برازيليا, «ليۆەرپۋل), ەدەرسون (برازيليا, «مانچەستەر سيتي») جانە مارك-اندرە تەر شتەگەن (گەرمانيا, «بارسەلونا»).
ەرلەر اراسىنداعى ەڭ ۇزدىك باپكەر – پەپ گۆارديولا (يسپانيا, «مانچەستەر سيتي»), يۋرگەن كلوپپ (گەرمانيا, «ليۆەرپۋل») جانە ماۋريسيو پوچەتتينو (ارگەنتينا, «توتتەنحەم»).