پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىن ىسكە اسىرۋ شارالارى تالقىلاندى. بۇل تۋرالى primeminister.kz حابارلادى.
پرەزيدەنتتىڭ قازاقستان حالقىنا جولداۋىنىڭ بەس باستى باعىتىن ورىنداۋ جولدارى تۋرالى پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ, ۇكىمەت باسشىسىنىڭ ورىنباسارلارى ج. قاسىمبەك پەن ب. ساپارباەۆ باياندادى.
قر پرەمەر-ءمينيسترى اسقار مامين مەملەكەت باسشىسىنىڭ جولداۋىن ىسكە اسىرۋدى تولىعىمەن قارجىلاي قامتاماسىز ەتۋ شارالارىن قابىلداۋ قاجەتتىگىن ايتتى.
«پرەزيدەنت تاپسىرمالارىن ورىنداۋعا بارلىق ءبىرىنشى باسشىلار دەربەس جاۋاپتى ەكەنىن نازارلارىڭىزعا سالامىن. اتاپ ايتايىن, ءاربىر تاپسىرماسىنىڭ ورىندالۋى قاتاڭ باقىلاۋعا الىنىپ, ورىندالۋىنىڭ ناقتى مەرزىمى بەلگىلەنۋى قاجەت. ءبىز قويىلعان مىندەتتەردى ءتيىمدى شەشۋ بويىنشا ۇيلەسىمدى جۇمىس جۇرگىزۋىمىز كەرەك», — دەدى اسقار مامين.
ۇكىمەت باسشىسى 7 قىركۇيەككە دەيىن مەملەكەت باسشىسىنىڭ جولداۋىندا قويىلعان مىندەتتەردى ىسكە اسىرۋدىڭ جالپىۇلتتىق جوسپارىنىڭ جوباسىن ازىرلەۋدى تاپسىردى.