اقتاۋ قالاسىندا العاش رەت «جاس كاسىپكەر»جوباسىنىڭ تىڭداۋشىلارى «BASTA» الاڭىندا بىلىكتى كاسىپكەرلەرمەن كەزدەستى. جوبا اتى ايتىپ تۇرعانداي, جاستاردى ءوز كاسىبىن باستاۋعا شاقىراتىن شارا. «باستا» فورۋمىنىڭ ماقساتى- جاس كاسىپكەرلەرگە پىكىر الماسۋعا, الدىڭعى بۋىن اعا كاسىپكەرلەردىڭ تاجىريبەسىنەن ۇلگى الاتىن تۇراقتى الاڭ جاساۋ. وسىنداي شارا وبلىستىڭ بارلىق اۋداندارىندا اپتا سايىن وتەتىن بولادى. فورۋمنىڭ باستى ەرەكشەلىگى – تابىستى ادامداردى شاقىرۋ.
ۇلكەن فورماتتاعى كەزدەسۋدە سپيكەرلەر جەتىستىككە جەتۋ قۇپيالارىمەن اشىپ, ومىرلىك تاجىريبەلەرىمەن بولىسەدى. ءىرى كاسىپكەرلەر قازىرگى داڭعىل جولىنا وڭاي جەتپەگەن. مىڭ قۇلاپ, ءجۇز ءسۇرىنىپ, تاجىريبە جيناۋدىڭ ارقاسىندا جەتكەنىن جاسىرمايدى. سونداي سپيكەردىڭ ءبىرى- «Domino home & horeca» دۇكەندەر جەلىسىنىڭ يەسى جالعاس داۋلەتوۆ. ونىڭ ايتۋىنشا, ۇلكەن الاڭداردى جالعا الىپ, دۇكەنشىلەر سانىن ارتتىرىپ, ال ساتىلىم تومەن بولعان كەزدى ەسكە الدى. شىعىن كولەمى پايدادان بىرنەشە ەسە ارتىپ كەتىپ, تىعىرىقتان جول تاپقان ادىستەرىن ايتىپ ءوتتى.
-ءبىز كاسىپ باستاعاندا بيزنەس-ترەنەرلەردىڭ ءدارىسى بولماعان. اقىلىن بەرەتىن تۇلعالار دا تابىلمايتىن. ءوز قاتەلىكتەرىمىزدەن ساباق الىپ, قۇلدىراپ بارىپ, قايتا كوتەرىلۋ جولدارىن وزدەرىمىز زەرتتەپ تاپقانبىز. ەندى كاسىبىن باستاعانداردىڭ ءىسى وڭعا باسىپ كەتۋ ءۇشىن كومەكتەسۋدى ءجون كوردىم. كاسىپكەر اياقتان تەز تۇرسا, ەلدىڭ دامۋىنا دا سەپتىگىن تيگىزەدى, دەيدى جالعاس داۋلەتوۆ.
«جاس كاسىپكەر» جوباسى–جاستاردى وقىتۋدىڭ جاڭا باعدارلاماسى. قاتىسۋشىلار ءوز كاسىبىن تولىقتاي باستاپ كەتۋى ءۇشىن, ولارعا ءبىر اي ىشىندە بيزنەستىڭ بارلىق جولدارى تەگىن وقىتىلادى. وسى جوبا اياسىندا ەلىمىز بويىنشا 200 وقۋ سىنىپتارى اشىلدى. ەلىمىزدىڭ تۇپكىر-تۇپكىرىندە جاستار مەن كوپ بالالى وتباسىلار بيزنەس نەگىزدەرىنە وقىپ جاتىر.
-«جاس كاسىپكەر» جوباسى اياسىندا جاستاردى وقىتۋ, قارجىلاندىرۋ جانە سۇيەمەلدەۋ سىندى بارلىق قولداۋ تەتىكتەرى ەسكەرىلدى. بيىل ەلىمىزدە كەمىندە 20 مىڭ ادام وقىپ, جوق دەگەندە 5 مىڭى كاسىبىن اشىپ, ءارى قاراي اياققا تۇرۋىنا بارلىق جاعداي جاسالادى. ميكروكرەديت, گرانتتار قاراستىرىلادى. ماڭعىستاۋ وبلىسىنىنىڭ وزىندە 600 جاس كاسىپكەرلىك بىلىمدەرىن شىڭدايدى. سونىمەن قاتار «باستاۋ» جوباسى بويىنشا جىل باسىنان 525 جۇمىسسىز ءبىلىم الىپ, سونىڭ ىشىنەن 68-ءى ءوز ءىسىن اشىپ, جۇمىستارىن دوڭگەلەتىپ وتىر. 2017-2019 جىلدارى ءبىزدىڭ وبلىستا «باستاۋ» بويىنشا 2437 ادام وقىدى. وسى جوبالاردىڭ زاڭدى جالعاسى رەتىندە «باستا» فورۋمىن باستادىق, دەيدى ماڭعىستاۋ وبلىسى كاسىپكەرلەر پالاتاسى ديرەكتورىنىڭ ورىنباسارى نۇرلىبەك جارىلعاپوۆ.
جاستارعا تابىس جولىن ايتۋ, تىڭ يدەيالارىمەن سەرپىلتۋ, بيزنەس-باستامانى جانە بيزنەس امبيتسيالاردى دامىتۋعا سەرپىن بەرەتىن شارا «باستادا» 3 بيزنەسمەن سپيكەر بولدى. ولار كاسىپتەرىن ەشبىر تاجىريبەسىز باستاعان. كەزدەسۋگە كەلگەن جاستار تابىستى بيزنەسمەندەرگە تولعاندىرعان سۇراقتارىن قويىپ, تۇششىمدى جاۋاپتارىن تىڭدادى.
ماڭعىستاۋ وبلىسى