جاپونيادا جالعىز جۇلدە بۇيىردى

بىردەن ايتا كەتەيىك, قازاقستاننىڭ ەرلەر قۇراماسى ءۇشىن بۇل جامان ناتيجە ەمەس. ولاي دەۋگە نەگىز, وسى كۇرەس ءتۇرىن سەرىك ەتكەن ورەندەرىمىزدىڭ الەم چەمپيوناتتارىندا جۇلدەنى «كۇرەپ الىپ» جاتقاندارى كەزدەرى شامالى. ماسەلەن, 1993-2018 جىلدار ارالىعىندا ايتۋلى جارىستىڭ جالاۋى 16 مارتە جەلبىرەدى. سول باسەكەلەردىڭ 10-ىنان قورجىنىمىز بوس قايتتى. نەبارى 6 جارىستا عانا باعىمىز جاندى.  اتاپ ايتساق, جەرلەستەرىمىز 2001 جىلى ميۋنحەندە 2 قولا (اسحات شاحاروۆ پەن اسحات جيتكەەۆ), 2009 جىلى روتتەردامدا 1 التىن (ماكسيم راكوۆ), 2011 جىلى پاريجدە 1 كۇمىس (ماكسيم راكوۆ), 2013 جىلى ريو-دە-جانەيرودا 1 كۇمىس (ازامات مۇقانوۆ), 2015 جىلى نۇر-سۇلتاندا 1 التىن مەن 1 كۇمىس (ەلدوس سمەتوۆ پەن رۋستام ىبىراەۆ) جانە 2018 جىلى باكۋدە 1 كۇمىسكە (ەرلان سەرىكجانوۆ) يەلىك ەتتى. بار-جوعى 8 جۇلدە (2 التىن+4 كۇمىس+2 قولا). مىنە, وتاندىق دزيۋدو كۇرەسى شەبەرلەرىنىڭ بارلىق تابىسى وسىمەن عانا شەكتەلەدى.

دەسەك تە قازاقستاندىق جانكۇيەرلەر ءوز جەرلەستەرىنەن جاپونيادا بۇدان الدەقايدا زور ناتيجە كۇتكەنى جاسىرىن ەمەس. سەبەبى, سوڭعى كەزدەرى ءبىزدىڭ بالۋاندار حالىقارالىق دودالاردا كوڭىل كونشىتەرلىكتەي ونەر كورسەتىپ, جەڭىس تۇعىرىنا ءجيى-ءجيى كوتەرىلىپ ءجۇردى. ناتيجەسىندە بىرقاتار بالۋانىمىز الەمدىك رەيتينگتە جوعارلاپ, ۇزدىكتەرمەن ۇزەڭگى قاعىستىردى. بىراق جىلدىڭ باستى جارىسىندا ولار ءوز دەڭگەيىندە ونەر كورسەتە المادى. ءۇمىت ارتقان سەركەلەرىمىزدىڭ دەنى سىپىرا ۇتىلدى. اسكەري تىلمەن ايتساق, «ساربازدارىمىز سوعىس جاعدايىنا جارامسىز» بولدى.

توكيوداعى الەم چەمپيوناتىندا قازاقستاندىقتار اراسىنان 60 كيلو سالماق دارەجەسىندە بەلدەسكەن ەلدوس سمەتوۆ پەن عۇسمان قىرعىزباەۆتىڭ عانا ونەرى كوپشىلىك كوڭىلىنەن شىقتى. شىنى كەرەك, ەلدوستىڭ باستاپقى باسەكەلەردەگى قارسىلاستارى – كۋۆەيتتىك ساۋد الاميري مەن يەمەندىك ءالي حوسروفتى ەسىمى قالىڭ كورەرمەنگە مۇلدە تانىس ەمەس. سوندىقتان دا ولاردىڭ اياعىن كوكتەن كەلتىرۋ قانداسىمىز ءۇشىن ەش قيىندىق تۋعىزعان جوق. العاشقى اينالىمداردا جولىققانداردىڭ اراسىندا ەڭ اككىسى ەليوس مانتسي ەدى. يتاليالىق بالۋاننىڭ ەۋروپا بىرىنشىلىگىنىڭ قولا جۇلدەگەرى دەگەن اتاعى بار. سمەتوۆ ءمانتسيدى ۇتتى. بىراق ءتورتىنشى كەزدەسۋىندە ەلدوس 2018 جىلعى الەم چەمپيوناتىنىڭ قولا جۇلدەگەرى, جاپونيالىق ريۋدزيۋ ناگاياماعا ەكى ۆازاريمەن جەڭىلدى. وسى ساتسىزدىكتىڭ سالدارىنان قازاقتىڭ ۇلى باس جۇلدە ءۇشىن تالاسۋ مۇمكىندىگىنەن ايىرىلدى. جۇبانىش بەلدەسۋىندە ول تايپەيلىك يۋن ۆەي ياننان باسىم ءتۇستى.  

كەلەسى توپتا عۇسمان قىرعىزباەۆتىڭ قارقىنى وتە كۇشتى بولدى. گۆاتەمالا, بولگاريا جانە قىرعىزستاننىڭ وكىلدەرىنەن بولەك, ول لوندون وليمپياداسىنىڭ قولا جۇلدەگەرى, پانامەريكا ويىندارىنىڭ جەڭىمپازى, برازيليالىق فيليپە كيتادايدى جانە الەم چەمپيوناتى مەن ەۋروپا ويىندارىندا ەكى رەتتەن جەڭىس تۇعىرىنا كوتەرىلىپ, قۇرلىق چەمپيونى اتانعان گرۋزيالىق اميران پاپيناشۆيليگە سان سوقتىردى. الايدا جارتىلاي فينالدا وزبەكستاندىق شارافۋددين لۋتفۋللاەۆقا جول بەردى.

وسىلايشا, ەلىشىلىك جارىستاردا ءجيى جولىعىپ جۇرگەن قوس قانداسىمىزدىڭ جولى توكيو تورىندە قايتا قيىستى. بۇل تارتىس ەلدوس سمەتوۆتىڭ جەڭىسىمەن اياقتالىپ, ول قولا مەدالدى يەلەنسە, عۇسمان بەسىنشى ساتىعا تابان تىرەدى.

جاپونياداعى جارىستىڭ العاشقى كۇنى-اق كوك بايراعىمىزدىڭ كوكتە جەلبىرەگەنىن قازاق جانكۇيەرلەرى جاقسىلىققا جورىدى. ەندى وزگە جىگىتتەرمىز دە ايشىقتى ونەر كورسەتىپ, ءوز جانكۇيەرلەرىن قۋانتادى دەپ ۇمىتتەندى. الايدا ۇكىلى ءۇمىت اقتالمادى. ەلدوس جۇماحانوۆ پەن ەرلان سەرىكجانوۆ (66 كيلو), جانساي سماعۇلوۆ (73 كيلو), ديدار حامزا (81 كيلو) جانە ايبەك سەرىكباەۆ (100 كيلو) وزدەرىنىڭ تۇساۋكەسەر كەزدەسۋلەرىندە قارسىلاستارىنا تىزە بۇكتى. رۋسلان مۇساەۆ (81 كيلو) پەن يسلام بوزباەۆ (90 كيلو) ەكىنشى كەزەڭدە جەڭىلىس تاپتى. ءسويتىپ, سەنىم ارتقان سەركەلەرىمىز جارىس بەل ورتاعا جاتىپ جەتپەي ءسۇرىندى. ءبىز سوعان كۇيىندىك. ەلدوس پەن ايبەكتىڭ بولگاريالىق بوجيدار تەمەلكوۆ پەن دانيەل ديچەۆتى, جانسايدىڭ يزرايلدىك توحار بۋتبۋلدى جانە ديداردىڭ گەرمانيالىق دومينيك رەسسەلدى جەڭەتىندەي ءجونى بار ەدى. ولاردىڭ پالەندەي اتاقتارى جوق. شەبەرلىك دەڭگەيلەرى دە ءبىزدىڭ جىگىتتەردەن ەش ارتىق ەمەس.  

ال رۋسلان مۇساەۆقا ەش وكپەي اتا المايمىز. ول تىم كۇشتى قارسىلاسقا تاپ بولدى. الەمدىك رەيتينگتە ەكىنشى ورىندا تۇرعان ءيزرايلدىڭ مىقتىسى, ەۋروپا ويىندارى مەن ەۋروپا بىرىنشىلگىننىڭ جەڭىمپازى ساگي مۋكيگە رۋسلان مۇساەۆتىڭ ءالى جەتپەدى. سول سەكىلدى ەرلان سەرىكجانوۆتىڭ دا قارسىلاسى ازۋلى ەدى. ازىربايجاندىق نيجات شيحاليزادەنىڭ الەم جانە ەۋروپا چەمپيوناتتارىنىڭ جۇلدەگەرى دەگەن اتاعى بار. جاسى 30-دان اسقان ساڭلاق ودان دا باسقا ءدۇبىرلى دودالاردا اتوي سالعان. دەسەك تە قازاق بالۋانى دا قارا جاياۋ ەمەس ەدى عوي. ول بىلتىر الەم چەمپيوناتىندا كۇمىس مەدالدى موينىندا جارقىراتىپ, ازيا بىرىنشىلىگىندە الدىنا جان سالمادى. دەسەك تە بۇل باسەكەدە شيحاليزادە شاڭ قاپتىرىپ كەتتى. 

ەرلەر اراسىنداعى جەڭىمپازدار مەن جۇلدەگەرلەر

60 كيلو: 1. لۋكۋم چحۆيمياني (گرۋزيا), 2. شارافۋددين لۋتفۋللاەۆ (وزبەكستان), 3. ەلدوس سمەتوۆ (قازاقستان) پەن  ريۋدزيۋ ناگاياما (جاپونيا).

66 كيلو: 1. دزەسيرو نارۋياما (جاپونيا), 2. كيم نيم حۆان (وڭتۇستىك كورەيا), 3. حيفۋمە ابە (جاپونيا) مەن دەنيس ۆيەرۋ (مولدوۆا). 

73 كيلو: 1. سەحەي ونو (جاپونيا), 2. رۋستام ورۋدجەۆ ء(ازىربايجان), 3. حيدايات گەيداروۆ ء(ازىربايجان) پەن دەنيس يارتسەۆ (رەسەي).

81 كيلو: 1. ساگي مۋكي (يزرايل), 2. ماتتياس كاسسە (بەلگيا), 3. انتۋان-ۆالۋا فورتە (كانادا) مەن لۋكا مايسۋرادزە (گرۋزيا).

90 كيلو: 1. نوەل ۆان ت' ەند (گوللانديا), 2.سەيتيرو مۋحاي (جاپونيا), 3. اكسەل كلەرجە (فرانتسيا) مەن نەمانيا مايدوۆ (سەربيا).

100 كيلو: 1.جورجە فونسەكا (پورتۋگاليا), 2. نياز ءىلياسوۆ (رەسەي), 3. ميكاەل كوررەل (گوللانديا) مەن اورون ۆولف (جاپونيا).

+100 كيلو: 1. لۋكاش كرپالەك (چەحيا), 2. حيساەشي حاراساۆا (جاپونيا), 3. كيم مين يونگ (وڭتۇستىك كورەيا) پەن روي مەيەر (گوللانديا).

*****

ال ايەلدەردىڭ جاي-كۇيى بەلگىلى. ءبىراز ۋاقىتتان بەرى جاھاندىق جارىستاردا تەك اسا جەڭىل سالماقتاعى وتگونتسەتسەگ گالبادراحقا عانا ءۇمىت ارتىپ كەلەمىز. بىراق بۇل جولى ونىڭ دا باعى جانبادى. يزرايل مەن كولۋمبيادان كەلگەن قىزداردى قاپى قالدىرعان قازاقستاندىق دزيۋدوشى ودان كەيىن ءوزىنىڭ سىرالعى قارسىلاسى, موڭعوليالىق ۇرانتسەتسەگ مۇڭحبات پەن يسپانيالىق لاۋرا مارتينەز ابەلەندەگە جول بەرىپ, جەتىنشى ورىندى قاناعات تۇتتى. ەڭ ۇزدىك ناتيجەمىز وسى. ال وزگە قىزدارىمىزدىڭ بارلىعى دا العاشقى اينالىمنان كەيىن كورەرمەندەر قاتارىنا قوسىلدى.    

ايەلدەر اراسىنداعى جەڭىمپازدار مەن جۇلدەگەرلەر

48 كيلو: 1. داريا بەلودەد (ۋكراينا), 2. فۋنا تونكي (جاپونيا), 3. ۇرانتسەتسەگ مۇڭحبات (موڭعوليا) پەن ديستريا كراسنيكي (كوسوۆو)

52 كيلو: 1. ۋتا ابە (جاپونيا), 2. ناتاليا كۋزيۋتينا (رەسەي), 3. مەيليندا كەلمەندي (كوسوۆو) مەن اي سيسيمە (جاپونيا).

57 كيلو: 1. كريستا دەگۋچي (كانادا), 2. تسۋكاسا ەسيدا (جاپونيا), 3. يۋليا كوۆالچيك (پولشا) پەن رافاەلا سيلۆا (برازيليا). 

63 كيلو: 1. كلاريسس اگبەنبەنۋ (فرانتسيا), 2. ميكۋ تاسيرو (جاپونيا), 3. مارتينا ترايدوس (گەرمانيا) پەن فۋل فرانسسەن (گوللانديا)

70 كيلو: 1. ماري-يۆ گايە (فرانتسيا), 2. باربارا تيمۋ (پورتۋگاليا), 3.ساللي كونۆەي ( ۇلىبريتانيا) مەن مارگو پينو (فرانتسيا).

78 كيلو: 1. مادەلاينا مالونگا (فرانتسيا), 2. سوري حامادا (جاپونيا), 3. لوريانا كۋكا (كوسوۆو) مەن مايرا اگيار (برازيليا).

+78 كيلو: 1.اكيرا سانە (جاپونيا), 2. يداليس ورتيس (كۋبا), 3. كايرا سايۋت (تۇركيا) پەن سارا اساحينا (جاپونيا).