وسكەمەندەگى و.بوكەي اتىنداعى كىتاپحانادا «بۋكروسينگ» بۇرىشى اشىلدى

كەشە جاستار جىلى اياسىندا وسكەمەندەگى ورالحان بوكەي اتىنداعى كىتاپحانادا «بۋكروسينگ» بۇرىشى سالتاناتتى تۇردە اشىلدى. اتالمىش بۇرىش اقپارات جانە قوعامدىق دامۋ مينيسترلىگىنىڭ گرانتتىق قارجىلاندىرۋى اياسىندا «Social Devorment Center» قوعامدىق قورىنىڭ قولداۋىمەن اشىلىپ وتىرعانىن ايتا كەتەيىك.

«بۋكروسينگ ءسوزى اعىلشىن تىلىنەن اۋدارعاندا كىتاپتىڭ اينالىمدا ءجۇرۋى دەگەن ماعىنانى بىلدىرەدى. بۋكروسينگ ەڭ العاش 2001 جىلى اقش-تا قولدانىسقا ەنگىزىلگەن. قازىر گەرمانيا ءبىرىنشى ورىندا تۇر. ءبىزدىڭ ەلىمىزگە, ونىڭ ىشىندە الماتىعا 2009 جىلى كەلدى. قازىرگى ۋاقىتتا بۋكروسينگ ايماعى ەلىمىزدىڭ 17 قالاسىندا بار. وسى رەتتە باستامامىزعا قولداۋ بىلدىرگەن وسكەمەن قالالىق جاستار رەسۋرستىق ورتالىعىنا جانە ورالحان بوكەي اتىنداعى كىتاپحانا ۇجىمىنا العىس بىلدىرەمىز» دەدى قوردىڭ وكىلى اسحات بايتورە.

وسكەمەن قالالىق جاستار رەسۋرستىق ورتالىعىنىڭ ديرەكتورى, قالالىق ءماسليحات دەپۋتاتى  رينات احمەتجانوۆ مۇنداي كىتاپ الماسۋ سورەلەرى وبلىس ورتالىعىندا شقمۋ مەن قازاقستان-امەريكا ەركىن ۋنيۆەرسيتەتى قابىرعالارىندا اشىلعانىن جەتكىزىپ, بۇرىشتىڭ اشىلۋىمەن قۇتتىقتادى.

ورالحان بوكەي اتىنداعى كىتاپحانا ديرەكتورى حابيبا اقجىگىتوۆا جاستار جىلىندا جاستارعا ارنالعان جوبانىڭ جۇزەگە اسىپ جاتقانى جاعىمدى جاڭالىق ەكەنىن اتاپ ءوتىپ: «كىتاپحاناشىلار بۇل جوباعا ەرەكشە قۋانىپ جاتىرمىز. نەگە دەسەڭىز, بۋكروسينگ جاستاردىڭ كىتاپقا دەگەن قىزىعۋشىلىعىن ارتتىرادى. ۇلى اباي دا, شاكارىم دە كىتاپ وقىعان. بيل گەيتس, يلون ماسك, مارك تسۋكەربەرگ سەكىلدى الەمگە ايگىلى ادامداردىڭ بارلىعى دا كىتاپ وقۋدان قول ۇزبەگەن. سوندىقتان ءبىزدىڭ كىتاپحانانى تاڭداعانى ءۇشىن ۇيىمداستىرۋشىلار مەن جوبا جەتەكشىلەرىنە ريزاشىلىعىمىزدى بىلدىرەمىز» دەدى.

 كىتاپ الماسۋ سورەسىنىڭ اشىلۋ سالتاناتىنا وسكەمەندىك بەلگىلى جازۋشى, ورنيتولوگ بوريس ششەرباكوۆ تا قاتىسىپ, جاستارعا كىتاپقا قاتىستى اقىل-كەڭەستەرىن ايتتى.

رەتى كەلگەندە ايتا كەتەيىك, كىتاپحانا قابىرعاسىندا اشىلعان سورەگە كەلەسى جىلى 175 جىلدىعى اتاپ وتىلەتىن ۇلى اقىن ابايدىڭ ەسىمى بەرىلدى.

وسكەمەن