كىتاپ باعا جەتپەس رۋحاني قۇندىلىعىمىز, اسا زور مادەني بايلىعىمىز ەكەنى جايلى نەبىر ۇلىلار ارتىنا عيبراتتى سوزدەر قالدىرعان. «كىتاپ–اقىلىنا اقى سۇرامايتىن اسىل قازىنا» (الىشەر ناۋاي), «ادامدار كىتاپ وقۋىن قويسا, ويلاۋىن دا قويادى» (دەنري ديدرو), «جاقسى كىتاپ وقۋ – اقىلدى اداممەن سىرلاسقانمەن بىردەي» (لەۆ تولستوي). حاكىم اباي «ارتىق عىلىم كىتاپتا, ەرىنبە وقىپ كورۋگە» دەپ بىلىمدىلىككە شاقىرسا, حالقىمىز «كىتاپ – ءبىلىم بۇلاعى» دەپ توبىقتاي سوزبەن تۇيىندەگەن. بۇدان شىعاتىن قورىتىندى, ۋاقىت قانشا وزگەرىپ, بۇگىنگىدەي وزىق تەحنولوگيالار داۋىرىنە جەتسەك تە كىتاپتىڭ ءمان-ماڭىزى, وعان دەگەن ىنتىزارلىق, قۇمارلىق جويىلماق ەمەس. بۇل ورايدا ادامنىڭ ىشكى جان دۇنيەسىن, وي-ساناسىن وسىرۋگە, ينتەللەكتۋالدىق تۇلعاسىن قالىپتاستىرۋعا تىكەلەي قىزمەت ەتەتىن كىتاپحانالاردىڭ الەۋمەتتىك-مادەني مەكەمە رەتىندەگى ءرولى دە, ىقپالى دا ايرىقشا. ونىڭ ايقىن ءبىر ۇلگىسىن وقىرمانداردىڭ ءجيى باس سۇعاتىن سۇيىكتى ورنىنا اينالىپ, كىتاپ وقۋ مادەنيەتى ارقىلى ۇلتتىق مادەني كودىمىزدى جاڭعىرتۋعا بەلسەنە اتسالىسىپ كەلە جاتقان پولتاۆكا اۋىلدىق كىتاپحاناسىنىڭ تاجىريبەسىنەن انىق بايقاۋعا بولادى.
– بۇگىنگى وقىرمان سۇرانىسىن قاناعاتتاندىرۋ وڭاي ەمەس. بۇل تالعام ۇردىسىنەن كورىنۋ ءۇشىن ماتەريالدىق-تەحنيكالىق جاعىنان جاقسى جابدىقتالىپ قانا قويماي, رۋحاني, ەستەتيكالىق اسەر سىيلايتىن, جاس بۋىنعا قوعامدى تانىپ-بىلۋگە, ناقتى ومىرگە قاجەتتى باعىت-باعدار بەرەتىن, ءجون سىلتەيتىن تانىمدىق ءىس-شارالار جۇيەلى ۇيىمداستىرىلۋى شارت. سوندا عانا اقپاراتتىق قولجەتىمدىلىكتى قامتاماسىز ەتۋگە, كىتاپ وقۋ مادەنيەتىن ارتتىرۋعا, وسكەن ورتا, تۋعان جەر تۋرالى ناقتى پاراسات-پايىم تۇسىنىگىن قالىپتاستىرۋعا بولادى, – دەدى اڭگىمەلەسكەنىمىزدە وڭىردە تىرەك ورتالىعى سانالاتىن مادەنيەت وشاعىنىڭ مەڭگەرۋشىسى ۆالەنتينا پاك.
ۆالەنتينا ۆيكتوروۆنانىڭ ايتۋىنشا, «پولتاۆكا» جشس-ءنىڭ ديرەكتورى, ىسكەر باسشى, «قۇرمەت» وردەنىنىڭ يەگەرى ەلتاي زىكىرين كىتاپحانانى جاڭا تيپتىك عيماراتقا كوشىرىپ, كوپسالالى قوندىرعىلار, كىتاپ, كورمە ستەللاجدارىن, كومپيۋتەر, تەلەۆيزور, ينتەراكتيۆتى تاقتا, اۋديو-بەينە اپپاراتۋرا ساتىپ اپەرگەن. ءسويتىپ وبلىستا تۇڭعىش رەت مودەلدىك مارتەبەگە يە بولعان. ەرەسەكتەر مەن بالالار تىنىعاتىن ارنايى بولمە بار. «رۋحاني جاڭعىرۋ» باعدارلاماسى اياسىندا وتكەن وبلىستىق بايقاۋدا جۇلدەگەر اتانىپ, 200 مىڭ تەڭگە سىياقى جيhاز الۋعا جۇمسالىپتى. بىلتىر «رۋحاني قازىنا» اتالىمى بويىنشا توپ جارىپتى. ءمارياش ءشارىپوۆانىڭ باسقارۋىنداعى ورتالىقتاندىرىلعان كىتاپحانالار جۇيەسىنىڭ ماماندارى كاسىبي-ادىستەمەلىك جاعىنان جاردەمدەسىپ, ناقتى كومەكتەر بەرىپ تۇرادى. وسىلايشا بىرلەسە ءىس-ارەكەت ەتۋدىڭ ارقاسىندا ەلىمىزدە دە جاقسى جاعىنان تانىلىپ, ءىس-تاجىريبەسى تاراتىلىپتى. بارلىق الەۋمەتتىك نىساندار جۇمىس ىستەيتىن پولتاۆكا وقىرمانى كوپ ەلدى مەكەندەر ساناتىندا. كىتاپ وقۋدى ومىرلىك سالتىنا اينالدىرعان تۇرعىندار وقۋ زالىنا ءجيى كەلىپ, كەز كەلگەن اقپاراتپەن تانىسىپ, قىزىقتىراتىن ماسەلەلەر توڭىرەگىندە وي-پىكىرلەر الىسىپ, تەگىن ينتەرنەت جەلىسىن پايدالانا الادى. بۇگىندە كىتاپحانانىڭ جالپى قورىندا التى مىڭعا جۋىق كىتاپ ساقتاۋلى. قوردىڭ ۇلكەن بولىگى قازاق, شەتەل كلاسسيكتەرىنىڭ تۋىندىلارىنا ارنالعان. ادىستەمەلىك-بيبليوگرافيالىق كورسەتكىشتەر, وزگە دە كومەكشى قۇرالدار مولىنان كەزدەسەدى. جيناقتاۋ, ەسەپكە الۋ, قۇجاتتاردى جۇيەلەۋ, كاتالوگتار ۇيىمداستىرۋ ءىسى وڭتايلاندىرىلعان. بيىل 7342 وقىرمان كىتاپحانا ەسىگىن اشىپ, 10084 كىتاپ بەرىلىپتى. بۇدان بولەك 15 گازەت-جۋرنال جازدىرىپ الادى. ءار جىل سايىن جاڭا ادەبيەتتىڭ ءۇش جۇزدەن استام داناسىمەن تولىعىپ وتىرادى.
كىتاپحاناشى ۆالەنتينا وقىرماندارمەن جاندى بايلانىستىڭ جاڭا تۇرلەرىن بارىنشا يگەرۋدى باستى ماقسات سانايدى. «تۋعان ەلدىڭ تۋى, ەلتاڭباسى, ءانۇرانى», «ولار وتان ءۇشىن شايقاستى», «انا ءتىلىڭ – ارىڭ بۇل», ء«بىر ەل – ءبىر كىتاپ», «كاسىبىم وسىنداي – اسكەر ادام», «گۋساردان ارنايى جاساققا دەيىن» تاعى سۇبەلى تاقىرىپتار بويىنشا ەسكە ءتۇسىرۋ كورمەلەرى, اكتسيالار, ديالوگ الاڭدارى, ۆيرتۋالدى ساياحاتتار, ۇنقاتىسۋلار, ۆيكتورينالار وتكىزىلىپ, بەينەروليكتەر كورسەتىلىپ, وقۋشىلاردى قازاقستاندىق پاتريوتيزم رۋحىندا تاربيەلەۋ, وتانعا قىزمەت ەتۋ داستۇرلەرىن جالعاستىرۋ, ەلىن, جەرىن ءسۇيۋ, ۇلكەنگە قۇرمەت, كىشىگە ىزەت, يماني, ادامي قاسيەتتەردى باعالاۋ سەكىلدى تانىمدىق ءمان-ماڭىزىمەن ەرەكشەلەنگەن. كىتاپحانا جانىندا «جۇرەك قارتايمايدى», «قاسيەتتى وتباسى», «كيۆيس» ارداگەرلەر, جاستار, جاسوسپىرىمدەر كلۋبتارى قۇرىلعان. ءساليما جاكەنوۆا, تاتيانا باتاي, ليديا سالنيكوۆا سياقتى ەڭبەك ارداگەرلەرى بايىرعى وقىرمان رەتىندە كىتاپتىڭ قادىر-قاسيەتىن ناسيحاتتاۋدان, اتادان بالاعا ميراس بولىپ قالاتىن اسىل قۇندىلىق ەكەنىن ايتۋدان, وقۋعا كەڭەس بەرۋدەن جالىققان ەمەس.
كىتاپحاناشى ۆ.پاك تۇرعىنداردىڭ بوس ۋاقىتىن مازمۇندى دا قىزىقتى وتكىزۋگە دە ۋاقىت تاۋىپ, جاڭا فورماتتاعى اقپاراتتىق تەحنولوگيالاردى بارىنشا پايدالانىپ ءجۇر. وقىرمانداردىڭ ۇزىلمەيتىنى دە سوندىقتان.
سولتۇستىك قازاقستان وبلىسى,
اققايىڭ اۋدانى