ەلىمىزدەگى كونستيتۋتسيالىق كەڭەس «نەگىزگى زاڭ اپتالىعى» جوباسىن باستاپ كەتتى. اپتالىقتىڭ ماقساتى – ەلىمىزدىڭ نەگىزگى زاڭىنا دەگەن حالىقتىڭ نازارىن اۋدارۋ, جالپى, حالىقتىڭ كونستيتۋتسيالىق مادەنيەتىن ارتتىرۋ.
وسى اپتالىق جوبا بارىسىندا وڭىردەگى ادىلەت دەپارتامەنتى Nur Otan پارتياسىنىڭ جەرگىلىكتى قوعامدىق قابىلداۋ بولمەسىندە تۇرعىنداردى قابىلداۋ كۇنىن وتكىزدى.
– اپتالىق جوبا, ياعني «نەگىزگى زاڭ اپتالىعى» وتەتىنى جايلى ەستىدىم. بۇل اپتالىق قاراپايىم حالىقتىڭ كۇندەلىكتى تىرلىك بارىسىندا زاڭ ورىندارىنا, قۇقىق سالاسىنىڭ ماماندارىنا جەتكىزە الماي جۇرگەن ساۋالدارىنىڭ جاۋابىن الۋعا مۇمكىندىك بەرۋدە, – دەيدى حابيبا مولدەكوۆا.
– تىيىم سالىنعان ەسەپشوتتى شەشۋگە بايلانىستى سۇراعىم بار ەدى. زاڭگەرلەر ءبارىن دە ناقتى ءتۇسىندىرىپ بەردى. نەگىزى, زاڭ اپتالىعى ايىندا ءبىر رەت بولسا دا تۇرعىندارعا قاجەت, – دەيدى اقىلبەك بەكىشوۆ. دەپارتامەنت ماماندارىنىڭ ايتۋىنشا, اپتالىق بارىسىندا 20-دان استام تۇرعىن ناقتى, تۇسىنىكتى, قۇقىقتىق كومەك الدى. بۇل قۇقىقتىق كومەكتەر زياتكەرلىك مەنشىك نىساندارىن تىركەۋ, جىلجىمايتىن م ۇلىكتى تىركەۋ, زاڭ بويىنشا مۇرانى قابىلداۋ, نەكە قيۋ, تۋدى جانە ءولىمدى تىركەۋ, نەسيە الۋ ارقىلى الاياقتىق ارەكەتتەر جاساۋ, اليمەنت تولەۋ جانە باسقا دا ماسەلەلەر قابىلداۋ بارىسىندا ءتۇسىندىرىلدى. وبلىستىق ادىلەت دەپارتامەنتى باسشىسىنىڭ ورىنباسارى شىنار تابىلوۆانىڭ ايتۋىنشا, اپتالىق الداعى 28, 29 كۇندەرى دە جالعاسادى. دەپارتامەنتتە اشىق ەسىك كۇنى تۇرعىنداردى قابىلداۋ جۇرگىزىلەدى.
– جالپى, اليمەنت ماسەلەسى بويىنشا سۇراقتار كوپ تۇسەدى. اليمەنتتەن جالتارعاندار اكىمشىلىك جاۋاپكەرشىلىككە تارتىلادى. ونى تولەيتىن ادامدارعا موينىنداعى قارىزىن وتەۋگە مىندەتتى ەكەنىن تۇسىندىرەمىز, – دەيدى.
سونىمەن قاتار ادىلەت دەپارتامەنتى قىزمەتكەرلەرى ادۆوكاتتار القاسىمەن, وبلىستىڭ نوتارياتتىق پالاتاسىمەن, جەكە سوت ورىنداۋشىلارىنىڭ وڭىرلىك پالاتاسىمەن بىرلەسىپ قولدانىستاعى زاڭنامالار بويىنشا سوتتالعاندارعا كەڭەس بەرۋ ماقساتىندا اپ 162/2 تۇزەۋ مەكەمەسىندە دە بولدى.
كەزدەسۋ بارىسىندا سوتتالعاندارعا ولاردىڭ جازاسىن وتەۋ كەزىندەگى قۇقىقتارى, جازا مەرزىمى اياقتالعاننان كەيىن ولاردى جۇمىسقا ورنالاستىرۋ ءتارتىبى ءتۇسىندىرىلدى.
سوتتالعاندارمەن جەكە اڭگىمە جۇرگىزىلدى, ولارعا راقىمشىلىق جاساۋ تۋرالى زاڭناما, قاماۋداعىلاردىڭ ەڭبەك قۇقىقتارىنا قاتىستى قۇقىقتارى مەن مىندەتتەرى ءتۇسىندىرىلدى.
سوتتالعاندار ازاماتتىق حال اكتىلەرىن تىركەۋ, سوت شەشىمدەرىن قايتا قاراۋ جانە شاعىم جاساۋ, سوتتالعانداردىڭ رەجىمىن اۋىستىرۋ, اليمەنت تولەۋ ماسەلەلەرى بويىنشا دا بىلىكتى زاڭگەرلەر كومەگىن الدى.
– باس بوستاندىعىنان ايىرۋ تۇرىندەگى جازاسىن وتەپ جاتقان ادامداردىڭ قۇقىقتىق ساۋاتتىلىعى مەن مادەنيەتىن ارتتىرۋ ماقساتىندا وسىنداي ءىس-شارالاردى وتكىزۋ, ولاردىڭ قۇقىقتارى مەن مىندەتتەرىن ءتۇسىندىرۋ ءتيىمدى الەۋمەتتىك بەيىمدەلۋىنە ىقپال ەتپەك, – دەيدى زاڭگەرلەر.
پاۆلودار وبلىسى