كەزدەسۋ بارىسىندا تاراپتار قازاقستان مەن يادرولىق سىناقتارعا جالپىعا بىردەي تىيىم سالۋ تۋرالى شارت ۇيىمى اراسىنداعى ءوزارا ىقپالداستىقتى, سونىڭ ىشىندە جاھاندىق قاۋىپسىزدىكتى نىعايتۋعا بايلانىستى ەلباسى نۇرسۇلتان نازارباەۆتىڭ حالىقارالىق باستامالارىن ودان ءارى ىلگەرىلەتۋ ماسەلەسىن تالقىلادى. بۇل تۋرالى اقوردانىڭ ءباسپاسوز قىزمەتى حابارلادى.
قازاقستان پرەزيدەنتى لاسسينا زەربونى «يادرولىق قارۋسىز الەم جانە جاھاندىق قاۋىپسىزدىك ءۇشىن نازارباەۆ سىيلىعىنا» يە بولۋىمەن قۇتتىقتاپ, ونىڭ يادرولىق قارۋسىزدانۋ جانە يادرولىق قارۋدى تاراتپاۋ ىسىنە قوسقان زور ۇلەسىن اتاپ ءوتتى.
– ءسىزدىڭ كۇش-جىگەرىڭىزدىڭ ارقاسىندا يادرولىق سىناقتارعا جالپىعا بىردەي تىيىم سالۋ تۋرالى شارت ۇيىمىنىڭ ابىرويى ارتا ءتۇستى. ءسىزدىڭ ۇيىمىڭىز حالىقارالىق ارەنادا زور بەدەلگە يە. ءبىز يادرولىق سىناقتارعا جالپىعا بىردەي تىيىم سالۋ تۋرالى شارت ۇيىمىنىڭ باسشىسى قىزمەتىندەگى جەمىستى ەڭبەگىڭىزگە ريزاشىلىق بىلدىرەمىز, – دەدى مەملەكەت باسشىسى.
لاسسينا زەربو قاسىم-جومارت توقاەۆقا يادرولىق سىناقتارعا جالپىعا بىردەي تىيىم سالۋ تۋرالى شارت ۇيىمىنىڭ جۇمىسىنا قولداۋ كورسەتكەنى ءۇشىن العىس ايتتى, سونداي-اق ءوزارا كۇش جۇمىلدىرا وتىرىپ, الداعى ۋاقىتتا يادرولىق قارۋسىز الەم ورناتۋ جونىندەگى ماقساتقا قول جەتكىزەتىنىنە سەنىم ءبىلدىردى.