كەنشىلەر استاناسىندا وتكەن «مەرەيلى وتباسى» رەسپۋبليكالىق بايقاۋىنىڭ وبلىستىق كەزەڭىنە ءوڭىردىڭ بارلىق قالالارى مەن اۋداندارىنان 19 وتباسى قاتىستى. قازىلار القاسى ۇزدىكتەردى انىقتار كەزدە وتباسىنىڭ تاريحى مەن ءداستۇرىن, اۋلەتتىڭ بەلگىلى ءبىر ماماندىققا ادال بولۋىن جانە شاڭىراقتاعى بالالار سانىن ەرەكشە نازارعا الدى.
بايقاۋعا جەزقازعاننان كەلىپ قاتىسقان قايرات تاعامباەۆ مۇنداي شارا شاراپاتىنىڭ مول بولعانىن جاسىرمادى.
– ماعان وسى بايقاۋعا اكىمدىك قىزمەتكەرلەرى قاتىسۋعا ۇسىنىس جاسادى, سەبەبى مەن كوپ بالالى اكەسىمىن – بەس بالام بار. مەن ءوزىم دە ون بالانىڭ ءبىرىمىن, مەنىڭ اتا-انامنىڭ 25 نەمەرەسى بار, ولاردىڭ تەگى سالقاۋوۆتار. پورتفوليو جيناۋ وسىنشا قىزىقتى بولادى دەپ كۇتپەگەن ەدىم. ول ءۇشىن قۇجاتتاردى دايىنداۋ ءتىپتى دە قىزىقتى بولدى. مەن ولاردى ەكى اپتا بويى جيناپ, وتباسى تۋرالى كوپتەگەن قىزىقتى مالىمەتتەرگە قانىق بولدىم. كەيبىر دەرەكتەردى بىلمەيدى ەكەنمىن, ال ءبىرازىن ۇمىتىپ تا قالىپپىن. بۇل ءبىر قىزىقتى تاجىريبە بولدى. بۇل ىسكە بارلىق تۋىستارىمىز جۇمىلدى. ءبىز ءوز وتباسىمىزدىڭ تاريحىن بالالارعا ايتىپ, ونى ءبىلۋ ماڭىزدى ەكەنىنە كوز جەتكىزدىك, – دەيدى ول.
بيىل دا وبلىستىق كەزەڭدە وتباسىلاردى ىرىكتەۋ ولشەمشارتتارى ايماقتىق بايقاۋداعىداي بولىپ وزگەرىسسىز قالدى. ەسەسىنە, باسەكەلەستىك ايتارلىقتاي وسە تۇسكەن.
مىسالى, جەزقازعاننان كەلگەن ستامقۇلوۆتار وتباسىندا 11 بالا, 33 نەمەرە, 17 شوبەرە بار. وتاعاسى ءاليراحمان ستامقۇلوۆ 20 جىل مەكتەپ ديرەكتورى بولىپ جۇمىس ىستەگەن ەكەن, «قازاق سسر حالىق اعارتۋ ءىسىنىڭ ۇزدىگى» بەلگىسىمەن ماراپاتتالعان. ول كىسىنىڭ زايىبى روزا سەكەمانوۆانىڭ ايتۋىنشا, وتباسىنىڭ بارلىق مۇشەلەرى ءجيى باس قوسىپ تۇرادى ەكەن.
– مەرەكەلەردە مىندەتتى تۇردە باس قوسىپ, ەت اسامىز. بۇل ءداستۇر بولىپ كەتكەن, – دەيدى وتاناسى.
بايقاۋدا قاراعاندى قالاسىنىڭ تانىمال وتباسىلارى دا باق سىنادى. مىسالى, «دارىندى بالا» جەكەمەنشىك بالاباقشالار جەلىسىنىڭ جانە «دارىندى انا» كوۆوركينگ-ورتالىعىنىڭ نەگىزىن قالاۋشى ايناگۇل حاميتوۆانىڭ وتباسى قاتىسىپ, كونكۋرستىڭ كورىگىن قىزدىردى. ىسكەر ايەل بەس بالانىڭ اناسى. ونىڭ اتاسى تولەۋحان حاميتوۆ ۇلى وتان سوعىسىنىڭ ارداگەرى ەكەن. ال اناسى ءسانيا حاميتوۆا ۇزاق جىلدار اۋداندىق ەمحانادا دارىگەر بولىپ جۇمىس ىستەگەن.
سونىمەن, «مەرەيلى وتباسى» بايقاۋىنىڭ وبلىستىق كەزەڭىندە باس جۇلدەگە حاميتوۆتار اۋلەتى لايىق دەپ تانىلدى. جەڭىمپاز وتباسىعا «جارتاس» شيپاجايىنا 10 كۇنگە جولداما بەرىلدى. ەكىنشى جۇلدەنى جەزقازعان قالاسى اتىنان قاتىسقان سالقاۋوۆتار وتباسى وتباسى يەلەندى. رەسپۋبليكالىق كوميسسيانىڭ شەشىمىمەن ەندى ولار ەلوردادا وتەتىن بايقاۋدىڭ اقتىق سايىسىندا قاراعاندى وبلىسىنىڭ نامىسىن قورعايتىن بولادى. ال, ءۇشىنشى ورىن ستامقۇلوۆتار وتباسىنا بۇيىردى.
– وبلىستىق كەزەڭدە وتباسىمىزدىڭ مۇشەلەرى تولىق جينالا الماي قالدى. قارىنداسىم مەن كەلىنىم جۋىردا بوسانىپ, قاتىسا المادى. بىراق رەسپۋبليكالىق كەزەڭگە بارلىعى كەلەدى دەگەن ۇمىتتەمىن. ء بىز فينالعا تولىق دايىنبىز, – دەيدى سالقاۋوۆتار وتباسىنىڭ كوشباسشىسى قايرات تاعامباەۆ.
بايقاۋعا قاتىسىپ, باق سىناعان وتباسىلاردىڭ بارلىعىنا ەستەلىك سىيلىقتار تاپسىرىلدى.
قاراعاندى وبلىسى