قاسيەتتى قارقارالى توپىراعىنا الاشتىڭ ارداقتىلارى احمەت بايتۇرسىن ۇلىنىڭ, ءاليحان بوكەيحاننىڭ جانە ءالىمحان ەرمەكوۆتىڭ تۇلعالارى قولادان قۇيىلعان ەسكەرتكىش بولىپ ورنىقتى.
«رۋحاني جاڭعىرۋ» باعدارلاماسى اياسىندا دۇنيەگە كەلگەن بۇل ەسكەرتكىشتىڭ اۆتورلارى – جەرگىلىكتى سۋرەتشى ساكەن داۋلەتباەۆ, مۇسىنشىلەر تالعات بايورازوۆ پەن كەنجەبەك قوشانتاەۆ. كومپوزيتسيالىق ءمۇسىننىڭ بيىكتىگى 3,15 مەترگە تەڭ بولسا, سالماعى 2 توننا تارتادى.
ەسكەرتكىشتىڭ اشىلۋ سالتاناتىندا قارقارالى اۋدانىنىڭ اكىمى حالەل ماقسۇتوۆ قۇتتىقتاۋ ءسوز سويلەپ, بۇل ونەر تۋىندىسىنىڭ «رۋحاني جاڭعىرۋ» باعدارلاماسى اياسىندا اۋداندا جۇزەگە اسىرىلۋى جوسپارلانعان 19 جوبانىڭ ءبىرى ەكەندىگىن ايتتى.
– دوڭگەلەك ۇستەل باسىندا حالقىنىڭ جارقىن بولاشاعى تۋرالى اڭگىمە ء وربىتىپ وتىرعان ءالىمحاندى ۇستامدى دا, سابىرلى ءاليحان جاعىن تايانىپ, ءۇنسىز ويعا شومىپ تىڭداسا, ال احاڭ بولسا ءالىمحاننىڭ كوزىنەن ۇشقىنداعان وتتى كورگەندەي مۇقيات دەن قويىپ وتىر, – دەپ ەسكەرتكىش يدەياسىنىڭ سىرىن اشقان اۋدان باسشىسى قايراتكەر تۇلعالاردىڭ بولمىس-ءبىتىمىن ايقىنداپ تۇرعان كومپوزيتسيانىڭ تاريحي جانە تاربيەلىك ءمان-مازمۇنىنىڭ قۇندىلىعىنا دا باسا نازار اۋداردى. يدەيانى ىسكە اسىرىپ, حالىقتىڭ العىسىنا بولەنگەن اۆتورلارعا ريزاشىلىق سەزىمىن ءبىلدىردى.
سونداي-اق, ساتىمەن ىسكە اسقان شارۋانىڭ قۋانىشىنا ەڭبەك ارداگەرلەرى امانتاي راحيموۆ, سەرىك جەكەەۆ, تاريح عىلىمدارىنىڭ دوكتورى, پروفەسسور ساتاي سىزدىقوۆ, ايتىسكەر اقىندار قويلىباي اسانوۆ پەن امانجول التاەۆ, اقتوعاي اۋدانى اكىمىنىڭ ورىنباسارى ابىلاي امانجولوۆ جانە تاريحشى قايرات وماربەكوۆ كۋا بولىپ, جىلى لەبىزدەرىن ءبىلدىردى.
ەسكەرتكىشتىڭ اشىلۋ سالتاناتىنان كەيىن الاشتىڭ اياۋلى ۇلدارىنىڭ رۋحىنا ارنالىپ اس بەرىلدى.
قاراعاندى وبلىسى