گرەكيادا دۇنيەجۇزىلىك كىتاپحانالىق جانە اقپاراتتىق كونگرەس ءوتىپ جاتىر. وسى شارا بارىسىندا الماتىداعى ۇلتتىق كىتاپحانا ديرەكتورى, قازاقستاندىق كىتاپحانالىق وداقتىڭ ءتورايىمى باقىتجامال وسپانوۆا يفلا باس حاتشىسى دجەرالد ليايتنەر جانە كىتاپحانالىق قاۋىمداستىقتار مەن مەكەمەلەردىڭ حالىقارالىق فەدەراتسياسى (يفلا) پرەزيدەنتى گلوريا پەرەس-سالمەرونمەن كەزدەستى.
ەجەلگى وركەنيەت ورتالىقتارىنىڭ ءبىرى افينادا «كىتاپحانالار: وزگەرىستەرگە ارنالعان ديالوگ» دۇنيەجۇزىلىك كىتاپحانالىق جانە اقپاراتتىق كونگرەسس الەمدىك كىتاپحانا قاۋىمداستىعى ءۇشىن ماڭىزدى وقيعا. كونگرەسكە جىل سايىن 140-قا جۋىق كىتاپحانا جانە اقپاراتتىق عىلىم سالاسىنداعى ءارتۇرلى دەڭگەيدەگى 3500-دەن استام مامان قاتىسادى. كىتاپحانالىق قاۋىمداستىقتار مەن مەكەمەلەردىڭ حالىقارالىق فەدەراتسياسىنىڭ (يفلا) پرەزيدەنتى گلوريا پەرەس-سالمەروننىڭ ايتۋىنشا, كىتاپحانالار قوعامداعى وزگەرىستەردىڭ قوزعاۋشىلارى, ال دۇنيەجۇزىلىك كىتاپحانالىق جانە اقپاراتتىق كونفەرەنتسيا ءبىز ءۇشىن جىل سايىن باعىتىمىزدى جاڭاشا ايقىنداۋعا جاقسى مۇمكىندىك.
حالىقارالىق دەڭگەيدەگى اۋقىمدى شارا اياسىندا اباي قۇنانباي ۇلىن الەمدىك وركەنيەت اۋقىمىندا تانىستىرۋ ماقساتىندا « ۇلى دالانىڭ ۇلى اقىنى – اباي» اتتى ادەبي كەش ۇيىمداستىرىلدى. سونداي-اق «ارال ايماعىنىڭ ەكولوگيالىق ورتاسىن قايتا جاڭعىرتۋ جونىندەگى كىتاپحانالىق ەرىكتىلەر قىزمەتى» تۋرالى ۇلتتىق كىتاپحاناسى ماماندارى مەن ەرىكتى قازاقستاندىق كىتاپحاناشىلار بىرگە دايىنداعان كورنەكى (ستەندتىك) بايانداما اعىلشىن تىلىندە دۇنيەجۇزى كىتاپحاناشىلارى نازارىنا ۇسىنىلدى. بۇل شاراعا ۇلتتىق كىتاپحانانىڭ قوردى قابىلداپ الۋ, باقىلاۋ جانە تولىقتىرۋ قىزمەتىنىڭ جەتەكشىسى ق.يزامبەكوۆا, انىقتامالىق-اقپاراتتىق قىزمەت كورسەتۋ قىزمەتىنىڭ جەتەكشىسى – ا.راحيموۆا جانە باسقا دا قىزمەتكەرلەر قاتىسۋدا.
الەمنىڭ تۇپكىر-تۇپكىرىنەن كەلگەن كىتاپحاناشىلار وزىق تاجىربيەلەر مەن يدەيالار الماسىپ, مەيلىنشە جوعارى ساپالى قىزمەت كورسەتۋ جولدارىن انىقتاپ, كىتاپحانالاردىڭ الدىندا تۇرعان وزەكتى ماسەلەلەردى تالقىلايدى جانە سول ارقىلى قوعامعا سونى سەرپىن قوسادى. سونىمەن قاتار ايماقتىق جانە حالىقارالىق دەڭگەيدەگى كىتاپحانا ءىسىن جاڭعىرتۋ, اقپاراتتىق جانە يننوۆاتسيالىق باسقارۋ سالاسىنداعى وزىق تاجىربيەلەردى كورسەتۋ, ءبولىسۋ مەن زەرتتەۋگە مۇمكىندىك جاساۋ, زامان تالابىنا ساي جاڭاشا ويلاۋدى قالىپتاستىرۋ جانە كىتاپحانانىڭ جاڭا بەت-كەلبەتىن قالىپتاستىرۋ ماسەلەسى دە قوزعالماق. سونداي-اق, كونگرەسس الەم كىتاپحاناشىلارىنا 85-ءشى دۇنيەجۇزىلىك كىتاپحانالىق جانە اقپاراتتىق كونفەرەنتسيانىڭ ستراتەگياسىن بىرلەسە جۇزەگە اسىرۋ جانە بىرىڭعاي كىتاپحانا الاڭىن قۇرۋ مۇمكىندىكتەرىن بەرەدى. ءبىلىم الەمىندە كىتاپحانا – يدەيالاردى گەنەراتسيالاۋ الاڭىنا اينالۋى ءتيىس.
الماتى