ءوز حاتىندا كەنشىلەر قازاقستان رەسپۋبليكاسىنىڭ تۇڭعىش پرەزيدەنتىنە كاسىبي مەرەكەمەن قۇتتىقتاۋى جانە تاۋ-كەن سالاسىن دامىتۋعا ەرەكشە كوڭىل بولگەنى ءۇشىن العىس ءبىلدىردى. بۇل تۋرالى elbasy.kz حابارلادى.
«اسا قادىرلى ەلباسى!
كاسىبي مەرەكەمىزبەن قۇتتىقتاعان جىلى لەبىزىڭىز ءۇشىن شىن جۇرەكتەن العىس بىلدىرەمىز.
ءسىزدىڭ ەگەمەن ەلىمىزدىڭ تاۋ-كەن سالاسىن دامىتۋعا ارقاشان ەرەكشە كوڭىل بولەتىنىڭىز قۋانتادى.
قازاقستاننىڭ بارلىق كەنشىلەرى حالىقتىڭ ءال-اۋقاتىن ارتتىرۋعا جانە ءومىر ءسۇرۋ ساپاسىن جاقسارتۋعا باعىتتالعان يگى باستامالارىڭىزدى تولىق قولدايدى. ءبىز, ەڭبەك ادامدارى, ارقاشان كوشباسشىمىز – ءسىز ءۇشىن جانە وتانىمىز – قازاقستان ءۇشىن قورعان بولامىز.
ءبىز ءسىزدىڭ ساليقالى باسشىلىعىڭىزدىڭ ارقاسىندا ەلىمىزدىڭ تاۋەلسىزدىك جىلدارى قول جەتكىزگەن جەتىستىكتەرىن باعالايمىز. قازاقستاندا بارلىق جاعداي جاسالعان: جولدارىمىز جاقسى, جاستارعا تۇرعىن ءۇي سالىنۋدا, بالالارىمىز ەلىمىزدىڭ جانە دۇنيەجۇزىنىڭ ەڭ جاقسى وقۋ ورىندارىندا ءبىلىم الۋ مۇمكىندىگىنە يە, مەديتسينا دامىپ كەلەدى. ەڭ باستىسى, ادامدارعا جۇمىس ىستەۋگە جانە تابىس تابۋعا مۇمكىندىك مول.
قيىن-قىستاۋ كەزەڭدەرگە قاراماستان, ءبىز ارقاشاندا سىزگە جانە ەلىمىزگە ادال بولدىق. ءدال ءسىزدىڭ, نۇرسۇلتان ءابىش ۇلى, قازاقستاندى عالامات بيىكتەرگە جەتەلەيتىنىڭىزگە كامىل سەندىك. بۇگىن ءسىزدىڭ ولشەۋسىز ەڭبەگىڭىزگە شەكسىز ريزامىز.
ءسىز ءبىزدىڭ كوشباسشىمىز, ءبىزدىڭ – ەلباسىمىزسىز! تۋعان جەرىمىزدەگى بەيبىت اسپان مەن تۇراقتىلىقتىڭ يگىلىگى ءۇشىن ءبىز ءاردايىم ءسىزدىڭ ارتىڭىزدان ەرە بەرەتىن بولامىز!», - دەلىنگەن جەدەلحاتتا.