قاراعاندى وبلىسى شاحتەر كۇنى مەرەكەسىن كەڭىنەن اتاپ ءوتتى. ءۇش كۇن بويى وبلىس ورتالىعى مەن نەگىزىنەن كەنشى قاۋىمى تۇراتىن قالالاردىڭ بارىندە مەرەكەلىك ءىس-شارالار, حالىقتىق سەرۋەن مەن كونتسەرتتەر ۇيىمداستىرىلدى.
قاراعاندى وبلىسىنىڭ اكىمى ەرلان قوشانوۆ پەن «ارسەلورميتتال تەمىرتاۋ» اق-نىڭ باس ديرەكتورى پارامجيت كالون ەكەۋى ساران, اباي جانە شاحتينسك قالالارىندا بولىپ, كومىر ونەركاسىبىنىڭ ارداگەرلەرى مەن قىزمەتكەرلەرىن كاسىبي مەرەكەلەرىمەن قۇتتىقتادى.
وبلىس اكىمى ولارعا قاجىرلى ەڭبەكتەرى ءۇشىن ەلباسى مەن ەل پرەزيدەنتىنىڭ اتىنان العىس ايتتى.
– كەنشىلەر كۇنى – ءبىزدىڭ ولكەمىزدىڭ سۇيىكتى مەرەكەسى. قاراعاندى وبلىسىن ءداستۇرلى تۇردە كەنشىلەر ءوڭىرى دەپ اتايدى جانە ءبىز ونى ماقتان تۇتامىز. ەلباسى ءوزىنىڭ قۇتتىقتاۋ جەدەلحاتىندا شاحتەرلەردىڭ جۇمىسىن جوعارى باعالادى. ول كەنشىلەرگە ءاردايىم ۇلكەن قۇرمەتپەن قارايدى جانە كەنشىلەر ەڭبەگىنىڭ قانشالىقتى قيىن ەكەنىن بىلەدى. بۇل كۇندەرى قاسىم-جومارت توقاەۆ ءبىزدىڭ وبلىسقا ساپارمەن كەلىپ قايتقان بولاتىن. ول مەملەكەت تاراپىنان ءوڭىر تۇرعىندارىنىڭ ءومىر ءسۇرۋ ساپاسىن ارتتىرۋ بويىنشا شارالار جالعاستىرىلاتىنىن اتاپ ءوتتى, – دەدى ءوزىنىڭ قۇتتىقتاۋ سوزىندە ءوڭىر باسشىسى ەرلان قوشانوۆ.
سونداي-اق, وبلىس اكىمى بيلىك تاراپىنان شاحتەرلەر مەكەن ەتەتىن قالالارداعى جاعدايدى جاقسارتۋ جانە تۇرمىس ساپاسىن ارتتىرۋ بويىنشا قولدان كەلگەن مۇمكىندىكتىڭ ءبارى جاسالاتىنىنا ۋادە بەردى. الەۋمەتتىك ماسەلەلەر بىرتىندەپ شەشىلۋدە, تۇرعىن ءۇي سالىنىپ جاتىر, جولدار مەن اۋلالار رەتكە كەلتىرىلۋدە, دەپ اتاپ ءوتتى ول.
وبلىس ورتالىعىندا مەرەكە كۇنى قاراعاندى كومىر باسسەينىنىڭ تاريحى, كەنشىلەر كاسىبىنىڭ بەدەلى مەن ەرلىگىن تاقىرىپ ەتكەن تەاترلاندىرىلعان قويىلىمدار كورسەتىلدى. كەنشىلەردى كاسىبي مەرەكەسىمەن قۇتتىقتاۋعا ەلىمىزدىڭ ەسترادا جۇلدىزدارى مەن اتاقتى ونەر ۇجىمدارى كەلدى. شاحتەرلەر ءۇشىن وزبەكتىڭ «ياللا» ۆوكالدى-اسپاپتار ءانسامبلى, «گولوس.دەتي» بايقاۋىنىڭ جەڭىمپازى ەرجان ماكسيم جانە «رايم ي ارتۋر» تانىمال دۋەتى ونەر كورسەتتى.
سونداي-اق «شاحتەرسكايا سلاۆا» ۆوكالدىق بايقاۋىندا كەنشىلەر وزدەرىنىڭ انشىلىك تالانتتارىن كورسەتىپ, ونەر جارىستىردى. كەنشىلەر استاناسىنا ارنالعان ءداستۇرلى رەترو-كونتسەرتتىڭ دە كوپتىڭ كوڭىلىنەن شىققانىن ايتا كەتكەن ءلازىم.
بۇدان بولەك, قالا تۇرعىندارى مەن قوناقتارى ءۇشىن ورتالىق ساياباقتىڭ جاعالاۋىندا ۆەنگريا, يسپانيا, سەربيا جانە يتاليادان كەلگەن ونەر ۇجىمدارى كونتسەرت قويدى. شەتەلدىك ونەرپازدار جاقىندا عانا ۇلىتاۋدا وتكەن Jezkiik ەتنيكالىق مۋزىكا فەستيۆالىنە قاتىسقان بولاتىن. كەنشىلەردىڭ كەرەمەت وتكەن مەرەكەسىن كەشكىلىك وتشاشۋلار تۇيىندەدى.
قاراعاندى وبلىسى