الماتىدا ورتالىق ساياباقتا ەگىزدەر شەرۋى ءوتتى. ءجۇز ەلۋدەن استام ەگىزدەر جينالعان مەرەكە بالالار عانا ەمەس, ەگىزدەر تاربيەلەپ وتىرعان وتباسىلار ءۇشىن ەرەكشە كۇنگە اينالدى.
ەگىز قوزىداي ءوسىپ كەلە جاتقان بالالاردىڭ تاربيەسىندە اتا-اناسى عانا ەمەس, اتا-اجەلەرى مەن كومەكشىلەرىنىڭ ورنىن ەرەكشە اتاپ كەتكەن ءجون. مەرەكەلىك شارادا بالالار عانا ەمەس, اتا-انالارى, اتا-اجەلەرى دە پىكىرلەسىپ, تاربيە بارىسىنداعى تاجىريبەلەرىمەن ءبولىستى. تىپتەن, بولاشاق سابيلەرىنىڭ ەگىز بولىپ تۋىلاتىندىعىنان حاباردار بولعان ەر ادامداردىڭ بىرقاتارى قوبالجۋ ساتتەرىن باسىنان وتكەرگەندىگىن ەستىگىندە ەگىز بالا تاربيەسىنىڭ وڭاي بولمايتىندىعىنا كوز جەتكىزە تۇسكەندەي بولدىق.
دارىگەردىڭ ءاربىر تەكسەرۋىنە كەلگەن سايىن قولبالجۋلى كۇي كەشكەن اكەلەر كەيىننەن سابيلەرى ومىرگە كەلگەندە ەرەكشە قۋانعاندارىن دا جاسىرمادى. ال مىنا ءبىر وتباسىنىڭ تاريحى مۇلدە وزگەشەلىگىمەن قىزىقتىردى. الماس پەن نازيرانىڭ وتباسىندا ومىرگە كەلگەن ەگىز ۇلدىڭ ەسىمدەرىن قويۋدىڭ ءوزى ۇلكەن جاۋاپكەرشىلىك جۇكتەپتى. مامىر ايىنىڭ 9-ى كۇنى دۇنيە ەسىگىن اشقان قوس ءسابيدىڭ ەسىمىن اتا-اجەسى مەن اتا-اناسى كوپ ويلانباستان, قازاقتىڭ تاۋ تۇلعالى باتىرلارى باۋىرجان مەن راقىمجان اتالارىنداي بولسىن دەپ ىرىمداپ قويعان ەكەن. بۇل كۇندەرى ءتورت جاسقا كەلگەن ەگىزدەر اتا-اجەسىنىڭ كوز قۋانىشى. باتىر اتالارىنداي ەلىنە قىزمەت ەتەتىن ازاماتتار بولىپ ءوسۋى ءۇشىن وتباسى مۇشەلەرى باۋىرجان مەن راقىمجانعا ساپالى ءبىلىم مەن سانالى تاربيە بەرۋدى ماقسات ەتەدى.
الماتى