داۋرەن اباەۆ فەيك جاڭالىقتارمەن كۇرەسۋ تۋرالى ايتتى

«ەلباسىنىڭ الاڭداۋشىلىعىن ءبىرىنشى كەزەكتە, ازاماتتاردىڭ ارى مەن ابىرويىنا زيانىن تيگىزەتىن جالعان اقپاراتتى تاراتاتىن انونيم اقپارات كوزدەرىنىڭ, فەيك اككاۋنتتار مەن پاراقشالاردىڭ كوپتەپ پايدا بولىپ جاتقانى تۋدىرىپ وتىر, — دەدى د. اباەۆ. — ءوز سوزىندە ەلباسى بۇقارالىق اقپارات قۇرالدارى مەن تەلەكوممۋنيكاتسيا جەلىلەرىن پايدالانۋمەن ورىن الاتىن وسىنداي جاعدايلار تۋرالى ايتتى».

ءمينيستردىڭ ايتۋىنشا, بۇگىندە فەيك جاڭالىقتارمەن كۇرەسۋ شارالارىن ءتۇرلى مەملەكەتتەردىڭ ۇكىمەتتەرى دە, الەۋمەتتىك جەلىلەردىڭ اكىمشىلەرى دە قابىلداۋدا. 

قر اقدم اقپاراتىنا سايكەس, قازاقستان زاڭناماسىندا بۇل ماسەلە رەتتەلگەن. قىلمىستىق كودەكستە ەكى باپ — جالا جابۋ تۋرالى 130-باپ (ادامنىڭ ار-ابىرويىنا نۇسقان كەلتىرۋ) جانە ادەيى جالعان اقپارات تاراتۋ تۋرالى 274-باپ (قوعامدىق ءتارتىپتى بۇزۋ قاۋپىن تۋدىرۋ) قاراستىرىلعان. 

ماسەلەن, قىلمىستىق كودەكستىڭ 130-بابىندا 2 مىڭ اەك دەيىن ايىپپۇل سالۋ جانە 2 جىلعا دەيىن باس بوستاندىعىنان ايىرۋ تۇرىندە جازالاۋ قاراستىرىلعان. تۇلعانى اۋىر جانە اسا اۋىر قىلمىس جاساعانى ءۇشىن ايىپتاۋمەن جالا جابىلعان جاعدايدا 3 مىڭ اەك باستاپ ايىپپۇل سالۋ نەمەسە 3 جىلعا باس بوستاندىعىنان ايىرۋ كوزدەلگەن. ادەيى جالعان اقپارات تاراتۋ تۋرالى 274-باپ بويىنشا اۋىرلىعى جاعىنان بارىنشا جوعارى جازالاۋدى ۇدەتۋ قولدانىلادى — اسكەري جاعدايلاردا نەمەسە توتەنشە جاعدايلاردا قىلمىستىق توپپەن وسى قىلمىستى جاساعانى ءۇشىن 7 جىلعا باس بوستاندىعىنان ايىرۋ. 

ء«بىزدىڭ ماماندارىمىز بۇل ماسەلەنى قاراستىرىپ جاتىر (ەسك. – جالا جاپقانى ءۇشىن جازانى كۇشەيتۋ). مىندەتتى تۇردە باس پروكۋراتۋرامەن, جوعارعى سوتپەن, قۇقىق قورعاۋشى ۇيىمدارمەن,  “Nur Otan” پارتياسىنىڭ فراكتسياسىمەن جۇمىستار جۇرگىزىلەتىن بولادى. حالىقارالىق تاجىريبە زەرتتەلەدى», — دەدى د. اباەۆ.

مينيستر اتاپ وتكەندەي, ەكى باپتىڭ دا قازىرگى رەداكتسياسى (جالعان اقپارات تاراتقانى ءۇشىن) الەمدىك تاجىريبەدە بار. وسىعان بايلانىستى, قۇقىق قولدانۋ تاجىريبەسىن جەتىلدىرۋگە ەرەكشە كوڭىل بولىنەتىن بولادى. بارلىق ۇسىنىستار باق, ساراپشىلار مەن قۇقىق قورعاۋشىلاردىڭ قاتىسۋىمەن جۇمىس توپتارىنا جانە ۆەدومستۆوارالىق كوميسسيالاردا تالقىلانادى.