«كەلەشەككە – كەمەل بىلىممەن!» اتتى ماڭعىستاۋ وبلىسى پەداگوگيكالىق قىزمەتكەرلەرىنىڭ تامىز كونفەرەنتسياسىندا ماڭعىستاۋ وبلىسىنىڭ اكىمى سەرىكباي ترۇموۆ ءوڭىردىڭ ءبىلىم بەرۋ سالاسىن جەتىلدىرۋدىڭ جولدارىن تالقىلاپ, ناقتى تاپسىرمالار بەردى.
- الدىمەن, ءبىلىم ساپاسىن كوتەرۋ ءۇشىن مۇعالىمدەردىڭ بىلىكتىلىگى مەن وقۋلىقتاردىڭ ساپاسىنا جانە ءبىلىم بەرۋ ۇيىمدارىن زامان تالابىنا ساي ماتەريالدىق قورلارمەن جابدىقتاۋعا ەرەكشە كوڭىل ءبولۋىمىز كەرەك. بۇل رەتتە, ءبىلىم باسقارماسى ارنايى كۋرستار مەن سەمينارلار ۇيىمداستىرۋ ارقىلى مۇعالىمدەردى كاسىبي تۇرعىدا دامىتۋ جولدارىن قاراستىرۋى ءتيىس. 1 قىركۇيەككە دەيىنگى مەرزىمدە مەكتەپ وقۋشىلارىن تولىقتاي وقۋلىقپەن قامتاماسىز ەتۋ – بارلىق دەڭگەيدەگى اكىمدەردىڭ باستى مىندەتى. مۇعالىمدەردى كاسىبىنە قاتىستى ەمەس جيىندارعا, باسقا دا شارالارعا تارتۋدى توقتاتۋىمىز كەرەك. بۇل – پرەزيدەنتتىڭ تاپسىرماسى. وسىعان بايلانىستى, ەكونوميكا جانە بيۋدجەتتى جوسپارلاۋ باسقارماسىنا, ءبىلىم باسقارماسىنا, اۋدان, قالا اكىمدىكتەرىنە مەكتەپتەردى كەزەڭ-كەزەڭىمەن ارنايى كابينەتتەرمەن, ونىڭ ىشىندە كومپيۋتەرلەر, مۋلتيمەديالىق جانە پاندىك كابينەتتەرمەن جابدىقتاۋ ءۇشىن قارجى كوزدەرىن قاراستىرۋدى تاپسىرامىن. قازىرگى ۋاقىتتاعى ماڭىزدى ماسەلەلەردىڭ ءبىرى – تۇلەكتەرىمىزدىڭ جۇمىسپەن قامتىلۋى. تۇلەكتەر ماماندىق بويىنشا دايارلانادى, الايدا مۇلدە باسقا سالادان ورىن تابادى. نەگىزگى وزەكتى ماسەلە – جاستاردىڭ ماماندىقتى دۇرىس تاڭداماۋىنان تۋىنداپ وتىر. سوندىقتان اۋدان, قالا اكىمدەرىنە مەكتەپ وقۋشىلارىنىڭ قابىلەتىنە جانە نارىقتاعى سۇرانىسقا يە ماماندىقتاردى ەسكەرە وتىرىپ, ەرتە باستان كاسىبي باعدار جۇمىستارىن جۇيەلى تۇردە جۇرگىزۋدى تاپسىرامىن. ال, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى «اتامەكەن» ۇلتتىق كاسىپكەرلەر پالاتاسىمەن بىرلەسە وڭىرىمىزگە قاجەتتى سۇرانىسقا يە ماماندىقتار ءتىزىمىن انىقتاپ, 5-10 جىلدىق بولجام جاساقتاپ, جاڭا ماماندىقتاردىڭ اتلاسىن دايىنداۋ كەرەك. سونداي-اق, «رۋحاني جاڭعىرۋ» باعدارلاماسى اياسىنداعى شارالار بالاباقشادان باستاپ ءار ءبىلىم ورداسىندا وتكىزىلۋى ءتيىس. ءبىلىم ۇيىمدارىندا بەرىلگەن تاربيە تۋعان جەرىڭە, قورشاعان ورتاڭا, ءوز تاريحىڭا قۇرمەتپەن قاراۋعا ۇيرەتىپ, ۇلتتىق قۇندىلىقتى دارىپتەۋى ءتيىس. جاڭا وقۋ جىلىنان باستاپ دارىندى مەكتەپ وقۋشىلارى مەن كوللەدج ستۋدەنتتەرىنە ءابىش كەكىلباەۆ اتىنداعى 20 شاكىرتاقى تاعايىندالاتىن بولادى. وسىنداي يگى ىستەردىڭ جالعاسى رەتىندە وبلىستىق ءبىلىم باسقارماسى جانە اۋدان, قالا اكىمدەرى ءبىلىم بەرۋ ۇيىمدارىنا ۇلى ابايدىڭ اتىن بەرۋ جونىندە ۇسىنىستارىن دايىنداسىن.
مەملەكەت باسشىسى قاسىم-جومارت توقاەۆ دومبىرانى مەكتەپتەردە بالالارعا ۇيرەتۋگە نازار اۋدارعانى بەلگىلى. «وسىعان وراي ۇلتتىق ونەردى ناسيحاتتاۋ ماقساتىندا وقۋشىلارعا ارنالعان دومبىرا ۇيىرمەلەرىن كوپتەپ اشۋدى كوزدەيتىن «دومبىرا-داستان» جوباسىن جۇزەگە اسىرۋدى تاپسىرامىن. وسىلايشا, ماڭعىستاۋلىق وقۋشىلار مەكتەپ بىتىرگەن كەزدە كەم دەگەندە 10 كۇيدى ۇيرەنىپ شىعۋى ءتيىس دەپ ويلايمىن. ارينە, بۇل شارا جۇزەگە اسىرىلسا اتا-انالار دا ريزا بولارى ءسوزسىز.
ساپالى ءبىلىم بالاباقشادان باستالاتىنى بارىمىزگە بەلگىلى. ول ءۇشىن بالاباقشاعا كاسىبي بىلىكتىلىگى مەن ءبىلىمى جوعارى كادرلار قاجەت. بۇگىندە, وڭىرىمىزدەگى بالاباقشالاردا جوعارى ءبىلىمدى جانە جوعارى ساناتتى تاربيەشىلەردىڭ ۇلەسى جەتكىلىكسىز دەڭگەيدە. سوندىقتان, ءبىلىم باسقاماسىنا, اۋدان, قالا اكىمدەرىنە وسىنداي جاعدايلاردى بولدىرماۋ ءۇشىن بۇل سۇراقتى ۇنەمى باقىلاۋدا ۇستاپ, بالانى ەرتە جاستان دامىتۋ, مەكتەپالدى دايارلىقتىڭ ساپاسىن ارتتىرۋ, كادرلاردىڭ كاسىبي بىلىكتىلىگىن كوتەرۋ شارالارىن ۇيىمداستىرۋدى تاپسىرامىن.
جالپى, وبلىسىمىز رەسپۋبليكانىڭ باسقا وڭىرلەرىمەن سالىستىرعاندا تۋ كورسەتكىشى جاعىنان الدىڭعى قاتارلاردى يەلەنەدى, سونداي-اق كوشىپ كەلۋشىلەر سانى دا كۇن ساناپ ارتىپ وتىر. سوندىقتان مەكتەپ قۇرىلىسىنىڭ ماسەلەسى ءبىرىنشى كەزەكتە تۇر. جۇرگىزىلگەن تالداۋلاردىڭ ناتيجەسىندە وڭىرىمىزدە الداعى بەس جىل ىشىندە بالا سانى 138 مىڭنان 212 مىڭعا دەيىن ارتادى دەپ كۇتىلۋدە. قازىر اۋدان, قالا اكىمدىكتەرىمەن جوبالىق قۋاتى 16400 ورىندى قۇرايتىن 21 مەكتەپتىڭ جوبالىق-سمەتالىق قۇجاتتارى جاساقتالۋدا. وسى ورايدا اۋدان, قالا اكىمدەرىنە مەكتەپ قۇرىلىستارىنىڭ جوبالىق-سمەتالىق قۇجاتتارىن ۋاقىتىلى دايىنداپ, ءبىلىم, ەكونوميكا جانە بيۋدجەتتىك جوسپارلاۋ باسقارمالارىمەن بىرلەسىپ قاراجات كوزدەرىن قاراستىرۋ ماسەلەلەرىن شەشۋدى تاپسىرامىن, دەدى ايماق باسشىسى.
ماڭعىستاۋ وبلىسى