حالقىمىز تۇڭعىشتارىنىڭ ءبىرى – قازاق ۇلتتىق ءمۇسىن ونەرىنىڭ نەگىزىن قالاعان, مەملەكەتتىك سىيلىقتىڭ لاۋرەاتى, پروفەسسور, قازاقستاننىڭ حالىق سۋرەتشىسى حاكىمجان ناۋرىزباەۆ بولاتىن.
ول حالقىمىزدىڭ دارالارىن تاسقا ءتىل ءبىتىرىپ, ءمۇسىن ونەرىندە سۋرەتتەدى. اسىرەسە الماتى قالاسىنداعى اباي, شوقان, تاراز قالاسىنداعى جامبىل ەسكەرتكىشتەرى ۇلتتىق رۋحاني ايبىنىمىز سەكىلدى كورىنەدى. قازاقتىڭ ۇلتتىق كاسىبي ءمۇسىن ونەرىنىڭ ىرگەتاسىن سالعان تالانتتى ءمۇسىنشىنىڭ ومىردەن وزعانىنا ون جىل بولىپ قالىپتى. ونىڭ شاكىرتتەرىنىڭ ءبىرى تىلەۋبەردى بيناشەۆ مۇسىنشىگە ەسكەرتكىش قويىلۋى ءتيىس ەكەنىن ءار جەردە ايتىپ جۇرەتىن.
حاكىمجان ەسىمحان ۇلى – قوستاناي توپىراعىنىڭ پەرزەنتى. توبىل بويىندا ءوستى. قوستاناي قالاسىنىڭ 140 جىلدىق مەرەكەسى شەڭبەرىندە حاكىمجان ناۋرىزباەۆتىڭ جاس ءمۇسىنشى گۇلفيا مەلدەش جاساعان تاس بەينەسى وبلىس ورتالىعىنداعى پۋشكين جانە التىنسارين كوشەلەرىنىڭ قيىلىسىنان ورىن الدى. حاكىمجان ناۋرىزباەۆتى جانە ونىڭ شىعارماشىلىعىن بىلەتىندەر ءمۇسىننىڭ وتە تابيعي جاسالعاندىعىن, وزىنە وتە ۇقسايتىنىن بىردەن بايقايدى. ومىردە ۇلىلىق پەن قاراپايىمدىلىقتىڭ اعايىن ەكەنىن دالەلدەپ كەتكەن ءمۇسىنشىنىڭ ويلى جۇزىنەن ول تاعى ءبىر كەسەك تۋىندى جاساۋعا كىرىسەتىندەي سەزىلەدى.
– قازاق ونەرى تۇڭعىشتارىنىڭ ءبىرى حاكىمجان ناۋرىزباەۆ ءوزىنىڭ تۋعان جەرىنىڭ تورىندە تۇراتىن بولدى. لايىعى قاشاننان دا وسى ەدى. ەندى وبلىس ورتالىعىندا حاكىمجان اعانىڭ اتىندا كوشە بولۋى ءتيىس. ەرەكشە دارىن يەسىنىڭ ەسىمى تۋعان جەرىندە ۇلىقتالماسا, ول بارىمىزگە دە سىن ەمەس پە؟! – دەدى ەسكەرتكىشتىڭ اشىلۋ سالتاناتىنا قاتىسقان بەلگىلى اكتەر ءاسانالى ءاشىموۆ.
ەسكەرتكىشتەر قالانىڭ ءسانى عانا ەمەس, ول كەيىنگى ۇرپاققا رۋحاني ازىق, پاتريوتتىق تاربيە بەرۋگە قىزمەت ەتەدى. تاۋەلسىزدىك العان جىلداردان بەرى قوستاناي قالاسىندا احمەت بايتۇرسىنوۆقا, بەيىمبەت مايلينگە ەسكەرتكىش, شايسۇلتان شاياحمەتوۆكە, كامشات دونەنباەۆاعا ءمۇسىن ورناتىلدى. ولاردىڭ قاتارىن اتاقتى ءمۇسىنشىنىڭ ءمۇسىنى تولىقتىردى.
قوستاناي