نۇر-سۇلتان قالالىق مەملەكەتتىك اكادەميالىق فيلارمونياسى جانىنداعى قازاق وركەسترىنىڭ ححIII كونتسەرتتىك ماۋسىمى باتىر بابامىز ماحامبەت وتەمىس ۇلىنىڭ 215 جىلدىعىنا ارنالعان «قايران, نارىن» كۇي-كەشىمەن اشىلماق.
ەلباسىنىڭ «رۋحاني جاڭعىرۋ» باعدارلاماسى اياسىندا وتەتىن ءىس-شارادا ماحامبەتتىڭ «قايران, نارىن», «شىلتەرلى تەرەزە», «جايىق اسۋ», «جورىقتا», «يساتايدىڭ اقتابانى-اي», «جۇمىر-قىلىش», «وكىنىش», «ارىسىمنان ايرىلدىم», «مەن, مەن, ەدىم, مەن ەدىم» سىندى, ت.ب. قاداۋ-قاداۋ كۇي-مۇرالارى ورىندالىپ, ساحنالىق كورىنىستەر تارتۋ ەتىلمەك. سونداي-اق باعدارلاماعا قۇرمانعازىنىڭ «كىشكەنتاي», كسرو حالىق ءارتىسى نۇرعيسا تىلەنديەۆتىڭ «ماحامبەت», قازاقستاننىڭ ەڭبەك سىڭىرگەن قايراتكەرى, «پاراسات» وردەنىنىڭ يەگەرى ايتقالي جايىموۆتىڭ «ەرەۋىل اتقا ەر سالماي», نۇرلان بەكەنوۆتىڭ «قىزعىش قۇس» سياقتى كوپتەگەن كۇي-سيمفونياسى ەنىپ وتىر.
حالقى ارداق تۇتقان اسىل ەر ۇلى دالانىڭ ازاتتىعى جولىندا, تاۋەلسىزدىك تاڭى ءۇشىن كۇرەستى دەسەك, ءباھادۇر باتىردىڭ وتتى جىرلارى مەن جۇرەكتى قاق جاراتىن تۋىندىلارىنىڭ ماڭىزى كەيىنگى ۇرپاعى ءۇشىن ءالى دە قۇندى, ءالى دە باعا جەتپەس بايلىق سانالادى. ماحامبەت – قازاقتىڭ قاشاندا اسقاق رۋحى, الاسارماس ارمانى, ماڭگىلىك ۇلگى تۇتار تۇلعاسى. ونىڭ ەرلىك جولىن, كۇرەسكەرلىك بولمىسىن دارىپتەۋ, ۇرپاقتان-ۇرپاققا ناسيحاتتاۋ – كەلەشەكتىڭ ورتاق پارىزى, ۇلى ميسسياسى. مەملەكەتتىك اكادەميالىق فيلارمونياسىنىڭ كۇي جوباسىن «رۋحاني جاڭعىرۋ» باعدارلاماسى اياسىندا قولعا الۋداعى ماقساتى دا سول – تاريحي-مادەني مۇرانى ساقتاۋ, دامىتۋ جانە كەڭىنەن دارىپتەۋ.
قارشىعا كۇلەن