ابايدى جاتقا وقيتىن قىز (ۆيدەو)

اكىم تانياعا بەكەر جولداماعان ەكەن. ول مەملەكەتتىك ءتىلدى جەتىك مەڭگەرگەن, دانىشپان ابايدىڭ 225 ولەڭىن مۇدىرمەستەن جاتقا وقيتىن بولىپ شىقتى. قوستاناي اۋدانىنىڭ التىن دالا اۋىلىنداعى ورتا مەكتەپتى قازاقشا وقىپ, ومىرزاق سۇلتانعازين اتىنداعى قوستاناي پەداگوگيكالىق ۋنيۆەرسيتەتىن تاريح ءپانى بويىنشا تامامداعان...

قاراپايىم وتباسىندا تاربيەلەنگەن تانيا – اۋداندىق, قالالىق, وبلىستىق «اباي وقۋلارى» بايقاۋلارىنىڭ جەڭىمپازى. ۇلى اقىننىڭ قارا سوزدەرىن, «ەسكەندىر» پوەماسىن, سونداي-اق شاكارىم شايىردىڭ 80 ولەڭىن دە جاتقا بىلەدى. سەمەيدە وتكەن رەسپۋبليكالىق «اباي وقۋلارى» بايقاۋىنان دا توپ جارىپ, 2-ورىندى جەڭىپ الىپتى.

بۇگىندە قوستانايدا قازاقشا سايراپ جۇرگەن تانيانىڭ ۇيالى تەلەفون ءنومىرىن تاۋىپ الىپ, قوڭىراۋلاتتىق.

– قازاقشانى قالاي ۇيرەنىپ ءجۇرسىڭ؟ – دەپ قىزىعۋشىلىق تانىتتىق ءبىز سالعان جەردەن.

– جەرگىلىكتى ۇلتتىڭ بالالارىمەن قازاقى اۋىلدا بىرگە ءوستىم. قازاق دەگەن اعايىننىڭ شۇرايلى دا باي ءتىلىن جان-جاقتى مەڭگەرۋگە تالپىندىم. ارينە, ۋاقىت وتە ماقساتىما جەتۋ ءۇشىن تاۋداي تالاپ از ەتەتىندىگىن ءتۇسىندىم. ول ءۇشىن جوعارى ءبىلىم الىپ, تىڭ ىزدەنىستەر جاساۋ كەرەك ەكەندىگىن تەرەڭ ۇقتىم, – دەپ اقتارىلا كەتتى قارشاداي قىز.

– اباي الەمى سەنى نەسىمەن باۋراپ الدى؟ – دەپ جانە سۇرادىق.

– اقىن ولەڭدەرىن بالا كۇنىمنەن وقىپ, جاتتاپ ءوستىم. وعان ۇلكەن اپكەم كريستينا ۇلگى بولدى. ول دا «اباي وقۋلارىنا» قاتىسىپ, جۇلدەلى ورىن الىپ ءجۇردى. وبلىستىق بايقاۋدان 1-ورىندى جەڭىپ الىپ, رەسپۋبليكاعا دەيىن باردى. 9-سىنىپتان كەيىن كوللەدجدى ءبىتىرىپ, قازىر وتباسىن قۇردى. ونىڭ قورجىنىندا ابايدىڭ 100 ولەڭى بار, – دەيدى تانيا. – سول سەكىلدى كىشى ءسىڭلىم دە ۇلى اقىننىڭ بىرنەشە ولەڭىن جاتقا ايتادى. ال مەنىڭ ارمانىم – ابايدى يگەرۋ.

تانيانىڭ ايتۋىنا قاراعاندا, اتا-اناسى مارينا مەن ۆيكتور سيتنيكوۆتەر وتباسىنداعى التى بالانى دا قازاق مەكتەبىنە بەرگەن ەكەن.

– مەن كوپ بالالى وتباسىندا ءوستىم. اكەم ۆيكتور مەن انام مارينا ءبىز ءۇشىن بارلىق جاعدايدى جاسادى. ءبىزدىڭ ءبىلىم الۋىمىزعا, ەڭبەكقور بولىپ قالىپتاسۋىمىزعا ايرىقشا كوڭىل ءبولدى. سونداي قامقورلىقتىڭ ارقاسىندا وتباسىنداعى التى بالا ەشتەڭەدەن كەمدىك كورگەن جوقپىز. وتباسىندا تەك ماتەريالدىق جاعداي عانا ەمەس, رۋحاني جاعىنا دا ايرىقشا نازار اۋدارىلدى. تاراتىپ ايتار بولسام, ءوزىم شاڭىراقتاعى ءتورتىنشى پەرزەنتپىن. وزىمنەن ۇلكەن ەكى اپكەم, ءبىر اعام جانە ەكى ءىنىم بار, – دەيدى تانيا.

قازاقتىڭ سالت-ءداستۇرى مەن ادەت-عۇرپىن جاستايىنان بويىنا ءسىڭىرىپ وسكەن تاتيانا جەرگىلىكتى حالىقپەن كادىمگى تۋىستارداي بولىپ ارالاسىپ كەتكەنىن ايتادى. مەملەكەتتىك ءتىلدى ءتيىستى دەڭگەيدە ۇيرەنۋىنە تالىمگەرلەرى, ياعني ۇستازدارىنىڭ دا سىڭىرگەن ەڭبەگى ايرىقشا ەكەندىگىن جەتكىزدى.

تاتيانا بالا كۇنىنەن جۋرناليست بولۋدى ارمانداپتى. ديكتور بولىپ, جاڭالىقتار جۇرگىزسەم عوي دەپ تە قيالداعان. وسىلايشا, بىردە باعىن سىناپ كورمەككە «قوستاناي» تەلەارناسىنا بارعان. ءبىر ايداي تاجىريبە جيناقتاپتى. الايدا, جۇمىسقا قابىلدانباي قالعان. ديپلومى سايكەس كەلمەگەنگە ۇقسايدى. بىراق جىگەرلى قىز, ارمانى كوككە ۇشسا دا, ەش مويىماي, قۇربىلارىمەن قالادان پاتەر جالداپ, McDonald’s-تا ينسترۋكتور بولىپ جۇمىس ىستەپ ءجۇر ەكەن.

– ماماندىعىم بويىنشا جۇمىس ىزدەپ كو­رىپ ەدىم, تابا المادىم. قوستاناي اۋدانى­نىڭ­ بىرنەشە اۋىلىنىڭ مەكتەپتەرىنە تۇيىن­دەمەمدى تاپسىرىپ ەدىم, ەش جاۋاپ جوق. كۇن­كورۋ كەرەك بولعان سوڭ, امال جوق, وسى مەكەمەدە جۇمىس ىستەپ جاتىرمىن. بۇل جۇمىسىم ۇنا­عانمەن, ماماندىعىم بويىنشا ىستەۋىم كە­رەك قوي, – دەيدى ابايدى ءپىر تۇتاتىن سارى قىز.

قوستانايلىق شەنەۋنىكتەر تانياعا تەك ەستافەتا جولدامايدى ەكەن, مەرەكەلىك ءىس-شارالارعا قاتىسۋعا شاقىرىپ تۇراتىن كورىنەدى.

بىزدىڭشە, قوستانايلىق اكىم-قارالار ءىس-شارالاردا وزدەرى كوزگە تۇسكىسى كەلىپ, ولەڭ وقۋعا شاقىرا بەرگەنشە, قوستاناي وبلىسى اكىمىنىڭ «قازاق ءتىلىن دامىتۋعا ۇلەس قوسقانى ءۇشىن» اتالىمىنىڭ لاۋرەاتى, كوپ بالالى وتباسىنان شىققان تالاپتى جاس تاتيانا سيتنيكوۆانى بارىنشا قولداپ, ماماندىعى بويىنشا جۇمىس تاۋىپ بەرمەي مە؟!.