سەناتورلار مارات تاعىموۆ پەن مۇحتار جۇماعازيەۆ جۇمىس ساپارىمەن اقتوبە وبلىسىنىڭ مۇعالجار اۋدانىندا بولدى. اۋدان ورتالىعى قاندىاعاشتا سەناتورلار كوپ پاتەرلى تۇرعىن ءۇيدىڭ قۇرىلىسىمەن, كوپ بالالى وتباسىلاردىڭ ماسەلەلەرىمەن تانىستى, دەپ حابارلادى سەناتتىڭ ءباسپاسوز قىزمەتى.
جەرگىلىكتى كاسىپكەر اشقان مەكتەپكە دەيىنگى «باقىتتى بالا» ورتالىعىندا الەۋمەتتىك از قامتىلعان وتباسىلاردان شىققان بالالار وقىتىلادى. اۋدان اكىمى اسقار شەريازدانوۆ اۋدان ورتالىعىندا دەموگرافيالىق ءوسىم قارقىنى بايقالاتىنىن, بۇرىنعى جاتاقحانا كۇردەلى جوندەۋدەن ءوتىپ جاتقانىن, توقسان پاتەرلى تۇرعىن ءۇي قازان ايىندا پايدالانۋعا بەرىلەتىنىن جەتكىزدى.
Nur Otan پارتياسىنىڭ عيماراتىندا ءماسليحات دەپۋتاتتارى, اۋدان اقساقالدارى مەن تۇرعىندار جەرگىلىكتى ءوزىن ءوزى باسقارۋ زاڭناماسىن جەتىلدىرۋ بويىنشا ۇسىنىستار ايتىپ, جاستاردى جۇمىسپەن قامتۋ, ءبىلىم بەرۋ سالاسىنداعى رەفورمالار, ءدارى-دارمەك باعاسىنىڭ قىمباتتاۋى جانە مەديتسينا قىزمەتتەرىنىڭ ساپاسى تۋرالى ۇسىنىس, پىكىرلەرىن جەتكىزدى.
دەپۋتاتتار سونىمەن قاتار تۇرعىن ۇيگە مۇقتاج كوپ بالالى انالارمەن جانە الەۋمەتتىك از قامتىلعان وتباسىلارمەن كەزدەستى. قاندىاعاش قالاسىنىڭ اكىمى تالعات وتەمۇراتوۆتىڭ ايتۋىنشا, تۇرعىن ۇيگە كەزەكتە 1100 ادام, سونىڭ ىشىندە 110 كوپ بالالى انالار بار. سەناتور مارات تاعىموۆ مەملەكەت تاراپىنان قابىلدانىپ جاتقان كوپ بالالى جانە الەۋمەتتىك از قامتىلعان وتباسىلاردى قولداۋ شارالارى تۋرالى ايتىپ ءوتتى. مۇحتار جۇماعازيەۆ اۋىل تۇرعىندارىنىڭ ءومىر ساپاسىن ارتتىرۋ جونىندەگى مەملەكەت باستامالارى تۋرالى حاباردار ەتتى.
اقجار اۋىلدىق وكرۋگىندە سەناتورلار اۋدانداعى تابىستى استىق شارۋاشىلىقتارىنىڭ ءبىرى بولىپ ەسەپتەلەتىن «اقجار-اگرو» جاۋاپكەرشىلىگى شەكتەۋلى سەرىكتەستىگىندە بولدى. ال مارتوك اۋدانىنداعى كوشپەلى سەمينار بارىسىندا اقتوبە وبلىسىنداعى مال شارۋاشىلىعىن, مال ازىعى ءوندىرىسىن جانە كوكونىس شارۋاشىلىعىن دامىتۋ ماسەلەلەرى تالقىلاندى.