كەرەكۋ وڭىرىندە ۇەۇ – بيزنەس – مەملەكەت سەرىكتەستىگىنە ارنالعان «ASAR» ءIIى رەسپۋبليكالىق فورۋمى ءوتتى. جيىنعا وبلىس اكىمى بولات باقاۋوۆ, اقپارات جانە قوعامدىق دامۋ ۆيتسە-ءمينيسترى دانيار ەسين, «اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆ, «ەكولوگيالىق ۇيىمدار قاۋىمداستىعى» باسقارماسىنىڭ ءتورايىمى ايگۇل سولوۆەۆا قاتىستى.
«قازاقستان ازاماتتىق اليانسى» بىرلەستىگىنىڭ پرەزيدەنتى اسىلبەك قوجاحمەتوۆ بىلتىر اشىلعان وبلىستىق «ازاماتتىق اليانس» ءۇيىنىڭ قوعام ءۇشىن ماڭىزدى ەكەنىن اتاپ ءوتتى. وندا وڭىردەگى 12 قوعامدىق ۇيىمنىڭ كەڭسەلەرى مەن زالى, كوۆوركينگ ورتالىعى ورنالاسقان. مەيىرىمدىلەر كلۋبى, وبلىستىق «جاسىل ەل» جاستار شتابى, گەوگرافيا ءۇيى, وڭىرلىك «جارتىلاي قىزىل اي» فيليالى, ء«ۇمىت ۇزبەۋ» جانە باسقا دا بەلگىلى ۇيىمدار جۇمىس ىستەيدى. وسى جەردە كەزدەسۋلەر مەن ترەنينگتەر وتەدى. وبلىستا بارلىعى 700-دەن اسا ۇەۇ تىركەلگەن. «بيزنەستىڭ كەيبىر سالاسىن ىنتالاندىرۋ ءۇشىن الەۋمەتتىك-كاسىپكەرلىك كورپوراتسيانى قوسۋ قاجەت. ونىڭ الەۋمەتتىك ماڭىزى بولۋى ءتيىس. باقىلاۋ كەڭەسىنە كاسىبي بىلىكتىلىگى بار ازاماتتىق سەكتور مەن «سامۇرىق-قازىنا», «بايتەرەك» جانە «قازاگرو» حولدينگى وكىلدەرىن قوسقان دۇرىس بولار ەدى», دەيدى ا.قوجاحمەتوۆ.
فورۋمعا قاتىسۋشىلار يننوۆاتسيالىق جوبالارىمەن تانىستىردى. ماسەلەن, ورال قالاسىنان كەلگەن «اربا» قوعامدىق بىرلەستىگىنىڭ ءتورايىمى گۇلميرا باتپاقۇلوۆا «عيبادات» جانە «بايتەرەك» بىرلەستىكتەرى تۋرالى اڭگىمەلەدى. بۇل ۇيىمدار جارىمجان بالالاردىڭ ءومىر ءسۇرۋ ساپاسىن جاقسارتۋعا ارنالعان كۋرستار مەن قيمىل-قوزعالىسى از بالالاردىڭ ارتىق سالماق قوسىپ الماۋى ءۇشىن دۇرىس تاماقتانۋ ماقساتىندا اس ءمازىرىن قۇرۋعا كومەكتەسەدى.
«ەلىمىزدە قىركۇيەك ايىندا «وتباسىلىق الەۋمەتتىك كارتا» ىسكە قوسىلادى, – دەيدى ساراپشى ءلاززات نۇرقاتوۆا. – ەلباسى پارتيالىق فورۋمدا ءار وتباسىنا دەيىن جەتۋ تۋرالى ايتتى. ءبىزدىڭ قاۋىمداستىق ساراپشىلارى كارتا ينديكاتورلارىن ازىرلەپ, ءار وتباسى ءۇشىن شۇعىل, قاناعاتتانارلىق, كريزيستىك, ورتاشا جانە جاقسى انىقتامالارىن بەرەدى». ونىڭ ايتۋىنشا, ءبىر رەتتىك قايىرىمدىلىق شاراسى وتباسىن قيىن جاعدايدان شىعارمايدى. سوندىقتان بۇل ىسكە ازاماتتىق سەكتور مەن بيزنەس-قوعامداستىق تا قاتىسۋى كەرەك.
ال «پارۋس» دەمالىس ايماعىنىڭ ديرەكتورى قايرات سۇلتانوۆ ءوز كاسىبىن قالاي قۇرعانىن ايتىپ بەردى. «اقمولا وبلىسىنىڭ زەرەندى اۋدانىندا 20 جىل تۇرىپ قالعان پيونەرلىك لاگەردى ساتىپ الدىق. دەمالىس ايماعىندا جىلىنا 10 مىڭ ادام دەمالادى. دەمالىس ورنىن جىلىتۋ ءۇشىن كومىر جاقتىق. ەكولوگيالىق تيىمدىلىگى ءۇشىن گاز تارتتىرىپ, قازاندىقتار دا ورناتتىق. زاڭ جۇزىندە اۋماقتا گاز تارتۋعا, ەلەكتر جەلىسىن تارتۋعا, قۇرىلىس سالۋعا تىيىم سالىنادى. سوڭىندا كۇن پانەلدەرىن ورناتتىق, دەگەن ول گاز تارتۋ, جىلى سۋ, ەنەرگيا بويىنشا جوبالاردى جۇزەگە اسىرۋ تۋرالى ۇسىنىسىن ءبىلدىردى. كاسىپكەردىڭ ايتۋىنشا «جاسىل» ەنەرگياعا دا ينۆەستسۋبسيديا ءبولىنۋى كەرەك. سونىمەن قاتار قىزىلوردا قالاسىنان مايا ناريموۆا باسقاراتىن «جومارت» قوعامدىق بىرلەستىگى, ەCO–ASAR باعىتىندا باياناۋىلدىق باتىربەك ارقارباي ۇلى ءوز جوبالارىن ۇسىندى. اقش-تىڭ USAID حالىقارالىق دامۋ اگەنتتىگىنىڭ نۇر-سۇلتان قالاسىنداعى كەڭسەسىنىڭ جەتەكشىسى رايان ۋەددل بيزنەس سەرىكتەستەرىنە تۇراقتى تۇردە كومەكتەسۋ قاجەتتىگىن, بۇل ءۇشىن «ازاماتتىق اليانسپەن» ورتاق مۇددەدە جۇمىس ىستەۋى تيىستىگىن جەتكىزدى. ال س.تورايعىروۆ اتىنداعى ۋنيۆەرسيتەتتىڭ الەۋمەتتىك ماسەلەلەر بويىنشا دەپارتامەنتى باسشىسىنىڭ مىندەتىن اتقارۋشى دارحان قارجاۋباي بۇل فورۋمنىڭ ستۋدەنتتەرگە دە پايدالى بولعانىن اتاپ ءوتتى.
پاۆلودار