جاستار جيىنىنا ەلىمىز ايماقتارىمەن قاتار قىرعىزستان, وزبەكستان, ءازىربايجان ەلىنەن ءۇش جۇزدەن استام قوناقتار كەلگەن. حالىقارالىق ۇيىمداردىڭ مۇشەلەرى بولىپ تابىلاتىن ءارى جاس كوشباسشىلارمەن قاتار ساراپشىلار, قوعام, مادەنيەت پەن عىلىم قايراتكەرلەرى, ستارتاپ-كاسىپكەرلەر, سپورتشىلار دا وسى فەستيۆالدىڭ قوناعى.
فەستيۆالدىڭ اشىلۋ ساتىندە قر تۇڭعىش پرەزيدەنتى- ەلباسى قورىنىڭ اتقارۋشى ديرەكتورى اسەت يسەكەشوۆ, الماتى اكىمى باقىتجان ساعىنتاەۆ, اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ قۇتتىقتاۋ سوزدەرىن ايتتى.
«بۇگىنگى كۇنى ادامي كاپيتال – ۇلت جەتىستىگىنىڭ باستى فاكتورى. فەستيۆالدىڭ شابىت بەرەتىن, ناقتىلى باعىتتى ايقىندايتىن العاشقى قارلىعاش جانە سىزدەردىڭ ارقايسىلارىڭىزدىڭ بەيبىتشىلىك پەن كەلىسىمنىڭ ۇيتقىسى ەكەندىكتەرىڭىزگە سەنىمدىمىن. ءبىزدىڭ فەستيۆال – بۇل تەك العاشقى قادام عانا, ال بولاشاقتا ءبىزدى ۇزاق جانە بارىنشا ناتيجەلى جول كۇتىپ تۇر. اق جول, دوستارىم مەنىڭ!», – دەدى ءوزىنىڭ قۇتتىقتاۋ ءسوزىن وقىعان قر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى اسەت يسەكەشوۆ.
قالا اكىمى باقىتجان ساعىنتاەۆ كەلەر جىلى الماتىدا ورتالىق ازيانىڭ ەرىكتىلەرى مەن ەرىكتىلەر ۇيىمدارىنىڭ جاستار فورۋمىن وتكىزۋدى ۇسىندى. قالا باسشىسى مەملەكەتتىڭ دامۋىنداعى جاستاردىڭ ەرەكشە ءرولى جانە ەل پرەزيدەنتى ق. توقاەۆتىڭ الداعى 2020 جىلدى ەرىكتىلەر جىلى دەپ جاريالاۋى جاستار اراسىنداعى ىنتىماقتاستىقتى نىعايتۋعا وڭ ىقپال ەتەتىنىن اتاپ ءوتتى.
«جاستاردىڭ تىكەلەي ارالاسۋى ستراتەگيالىق سەرىكتەستىكتى, دوستىق پەن تاتۋ كورشى بولۋدى نىعايتۋدىڭ باستى شارتى بولىپ تابىلادى. سوندىقتان قازاقستاننىڭ تۇڭعىش پرەزيدەنتىنىڭ قورىنا, ببۇ-نىڭ وكىلدىگىنە, وزگە دە ىنتالى ۇيىمدار مەن قوناقتارعا - جالپى بارلىقتارىڭىزعا 2020 جىلى الماتىدا ورتا ازيانىڭ ەرىكتىلەرى مەن ەرىكتىلەر ۇيىمدارىنىڭ جاستار فورۋمىن وتكىزۋ مۇمكىندىگىن قاراستىرۋدى ۇسىنامىن», - دەدى ب. ساعىنتاەۆ.
قر تۇڭعىش پرەزيدەنتى – ەلباسىنىڭ قورى مەن الماتى اكىمدىگى وتكىزىپ وتىرعان بۇل فەستيۆال قازاقستانداعى جاستار جىلىنا ارنالعان. القالى شارانى وتكىزۋدەگى قوردىڭ سەرىكتەستەرى – بۇۇ, ەقىۇ جانە كونراد ادەناۋەردىڭ قورى.
فەستيۆال جاستار جەتەكشىلەرىنىڭ الەۋەتىن ارتتىرۋعا, ورتا ازيا جاستارى ءۇشىن تۇراقتى ديالوگ الاڭىن, وڭىرلىك ينتەگراتسيانى, سەرىكتەستىكتى قۇرۋعا, ەل وڭىرلەرى جاستارىنىڭ رەسۋرستارىن ورتاق ىسكە كەڭىنەن جۇمىلدىرۋعا, جاستار ساياساتىنداعى وزىق تاجىريبەلەردى الماسۋعا باعىتتالعان.
فەستيۆال اياسىندا وعان قاتىسۋشىلار وڭىرلىك ماڭىزدى ماسەلەلەر مەن پروبلەمالاردى كەڭىنەن تالقىلايدى. سەسسيا جۇمىسىندا IT-تەحنولوگياعا, كيبەرقاۋىپسىزدىككە, ميگراتسيا پروبلەمالارىنا, زياتكەرلىك كاپيتالدى ساقتاۋعا, سالاۋاتتى ءومىر سالتىن قالىپتاستىرۋعا, قولجەتىمدى بىلىمگە, پوليەتنيكالىق قوعام – بەيبىتشىلىك پەن كەلىسىم مودەلى تاقىرىپتارى قوزعالاتىن بولادى.
الماتى