نۇر-سۇلتان قالاسىنىڭ اكىمدىگى «University Medical Center» كورپوراتيۆتىك قورىنىڭ انا مەن بالا ۇلتتىق عىلىمي ورتالىعىندا ونكولوگيالىق اۋرۋلارعا شالدىققان بالالارعا ارنالعان قايىرىمدىلىق شاراسىن وتكىزدى.
شارا اياسىندا ءىىى Nur-Sultan Music Awards حالىقارالىق مۋزىكا فەستيۆالىنە قاتىسۋشىلار قاتەرلى دەرتكە شالدىققان بۇلدىرشىندەرمەن كەزدەسىپ, سىيلىقتار تارتۋ ەتتى, سونداي-اق كىشكەنتاي ەمدەلۋشىلەرمەن جانە ولاردىڭ اتا-انالارىمەن بىرگە سۋرەتكە ءتۇسىپ, جىلى لەبىزدەرىن ءبىلدىردى.
«ومىردە ادام دەنساۋلىعىنان وزەكتى نارسە جوق. جاقىندارىڭ بار بولسا, دەنساۋلىعىڭ ساۋ بولسا, ودان اسقان ارماننىڭ ءوزى دە ارتىق. نۇر-سۇلتان قالاسىنىڭ اكىمدىگى قايىرىمدىلىق باعىتتا ءتۇرلى شارا ۇيىمداستىرىپ كەلەدى. ونىڭ كوبىن وزدەرىڭىز دە بىلەسىزدەر. وسى ءىىى Nur-Sultan Music Awards حالىقارالىق مۋزىكا فەستيۆالى ەلىمىزدىڭ, ەلوردامىزدىڭ مادەني مارتەبەسىن كوتەرەتىن كولەمدى فەستيۆال بولادى دەپ ويلايمىن. وسى كەشكە قاتىساتىن انشىلەرمەن سىزدەردى قاۋىشتىرعانىمىزعا قۋانىشتىمىز. باستىسى باسىمىز امان, دەنىمىز ساۋ بولسىن. سىزدەر دە تەزىرەك جازىلىپ كەتىڭىزدەر», دەدى نۇر-سۇلتان قالاسىنىڭ مادەنيەت جانە سپورت باسقارماسى باسشىسىنىڭ مىندەتىن اتقارۋشى ناريما ابىلقىزى.
سونىمەن قاتار ناريما ابىلقىزى ونكولوگيالىق اۋرۋلارعا شالدىققان بالالارمەن كەزدەسۋ وتكىزۋگە فەستيۆالعا كەلگەن ونەرپازدار وزدەرى نيەت بىلدىرگەنىن جەتكىزدى.
«كونتسەرت باستالماي تۇرىپ, وسى كىشكەنتاي بالالارىمىزعا كەلىپ, وزدەرىنىڭ اق تىلەكتەرىن ايتىپ جاتىر. ارينە بۇل جاقسى باستاما دەپ ايتا الامىز. بۇل جەرگە بايقاۋعا قاتىسۋشى بارلىق ۇمىتكەر جينالمادى, سەبەبى ولاردىڭ كوبىسى ءبىزدىڭ قالامىزعا ءالى كەلمەدى. دەگەنمەن, ونكولوگيالىق اۋرۋلارعا شالدىققان بالالارعا بۇل كەزدەسۋ ۇلكەن سەرپىن بەرگەنىنە سەنىمدىمىن», دەدى ول.
جالپى, قالا اكىمدىگى ۇيىمداستىرعان قايىرىمدىلىق شاراسىنا انشىلەر Chingiz (ازەربايجان), شاحزودا (وزبەكستان), Markus Riva (لاتۆيا), CYGO (بەلورۋسسيا), سونىمەن بىرگە مۋزتۆ تەلەارناسىنىڭ ديرەكتورى ارمان داۆلەتياروۆ, مۋزتۆ تەلەارناسىنىڭ پروديۋسەرى ءارى جۇرگىزۋشىسى اندرەي رازىگراەۆ قاتىستى.
ال Nur-Sultan Music Awards حالىقارالىق مۋزىكا فەستيۆالى «بارىس-ارەنا» مۇز ايدىنى سارايىندا وتەتىنىن ايتا كەتەلىك. وعان گرۋزيا, فرانتسيا, يتاليا, لاتۆيا, ازەربايجان, وزبەكستان, ۋكراينا, رەسەي جانە قازاقستاننان ميلليونداعان جانكۇيەرلەرى بار تانىمال ءارى دارىندى انشىلەر قاتىسادى. ساحنا تورىندە گريگوري لەپس, LOBODA, Raim & Artur, لوليتا, ەرجان ماكسيم, ديما بيلان, ۆرەميا ي ستەكلو, Shanguy, شاحزودا, Cosmos Girls, Markus Riva جانە Chingiz ءوز ونەرلەرىن كورسەتەدى.