40-تان استام ەلدىڭ جاس كوشباسشىلارى مەن ءار دەڭگەيلى دەلەگاتتارى ەلوردادا ۇيىمداستىرىلاتىن «وزگەرىستەرگە ۇمتىلىس» (Passion for change) اتتى حالىقارالىق جاستار كونفەرەنتسياسىندا باس قوسپاق. تامىزدىڭ 16-20 ارالىعىندا وتەتىن اۋقىمدى شاراعا الەمنىڭ ءار ەلىنەن جانە وتاندىق ءار سالا مايتالماندارىنان 65 سپيكەر كەلەدى دەپ كۇتىلۋدە. ال جالپى قاتىسۋشى دەلەگاتتار سانى قازىردىڭ وزىندە 500-دەن اسىپ ۇلگەرگەن.
HPAIR كونفەرەنتسياسى (The Harvard College Project for Asian and International Relations) – ستۋدەنتتەر مەن جاس ماماندار اراسىندا تاجىريبە الماساتىن پىكىرسايىس الاڭىنا اينالعان جاستار جوباسى. گارۆارد ۋنيۆەرسيتەتى 1991 جىلدان بەرى ءداستۇرلى تۇردە وتكىزىلىپ كەلە جاتقان كونفەرەنتسيانى ازيا جانە حالىقارالىق قاتىناستار فاكۋلتەتى قۇرىلعاندا قولعا العان. HPAIR ورتالىق ازيادا جانە تمد كەڭىستىگىندە تۇڭعىش رەت وتكىزىلەدى.
بيىلعى HPAIR ترانسفورماتسيا, سانامىزدى وزگەرتۋ جانە ءداستۇرلى ادىستەردەن الىستاۋ, سونىمەن قاتار جاڭا تسيفرلى تەحنولوگيالاردى قولدانا وتىرىپ دامۋدىڭ جاڭا دەڭگەيىنە كوشۋ ماسەلەلەرىن كەڭىنەن تالقىلاۋدى كوزدەيدى. ال ورتاعا سالىناتىن تاقىرىپتار عالامدىق نارىق جانە ەكونوميكا; كوركەمونەر, بۇقارالىق اقپارات قۇرالدارى جانە مادەنيەت; الەۋمەتتىك ساياسات جانە ادىلەت; ەنەرگەتيكا جانە ەكولوگيالىق تۇراقتىلىق; باسقارۋ جانە گەوساياسات; عىلىمي تەحنولوگيالار سىندى التى باعىتتى قامتيدى. اتالعان اۋقىمدى پروبلەمالار توڭىرەگىندە وي ءبولىسىپ, يننوۆاتسيالىق يدەيالارىن ۇسىنۋ ارقىلى ستۋدەنت جاستارىمىزدىڭ كونفەرەنتسياعا شاقىرىلعان تانىمال جانە تاجىريبەلى سپيكەرلەرمەن بايلانىس ورناتۋىنا مۇمكىندىك بار. ويتكەنى قازاقستانعا UNICEF كورەيا پرەزيدەنتى, دوكتور سونگ سان حيون, ءۇندىستاننىڭ ەكس-سىرتقى ىستەر ءمينيسترى نيرۋپاما راو, تاياۋ شىعىس پەن سولتۇستىك افريكاداعى عالامدىق نارىق بويىنشا Standard Chartered Bank-ءتىڭ بۇرىنعى باسشىسى دەنيەل اتستسي, نوبەل سىيلىعىنىڭ لاۋرەاتى راە كۆون چۋنگ, McKinsey دۇنيەجۇزىلىك ينستيتۋتىنىڭ ديرەكتورى دجوناتان ۆوتتسەل, World Bank Group-تىڭ باس تەحنيكالىق ديرەكتورى لەسلي گو, ۆاشينگتونداعى CNN, نيۋ-يوركتەگى ABC News, بەرليندەگى Deutsche Welle TV جانە باسقا دا جاڭالىقتار ۇيىمدارىندا جۇمىس ىستەگەن تەلەجۇرگىزۋشىلەر تابان تىرەمەك.
«HPAIR Asia Conference-2019» شاراسىن ۇيىمداستىرۋ كوميتەتىنىڭ اتقارۋشى ديرەكتورى چارلز مايكل بارلىق قۇرلىقتان كەلەتىن سپيكەرلەر بولاشاققا ۇلكەن قادام جاسايتىن, كەلەشەكتەگى وزگەرىستەرگە ازىردەن دايىن بولۋدى قالايتىن جاستارعا شابىتتى دا اسەرلى بەس كۇن سىيلايتىنىن ايتادى. سوندىقتان https://hpair.org/asia-conference-2019 سايتىندا جاريالانعان باعدارلامامەن تولىق تانىسىپ, كونفەرەنتسيادان قۇر قالماۋعا شاقىرادى. ال نازارباەۆ ۋنيۆەرسيتەتتىڭ ستۋدەنتى ءارى «HPAIR Asia Conference- 2019» ۇيىمداستىرۋ كوميتەتىنىڭ ءتورايىمى لەيلا احمەتوۆا: «قازاق مادەنيەتى الەمدىك تاريحتىڭ اجىراماس بولىگى سانالادى, سوندىقتان ءاربىر دەلەگاتتىڭ ونى سەزىنۋى ءۇشىن ءبىز جەكە ءىس-شارا – قازاقستان ءتۇنىن (Kazakhstan Night) ازىرلەپ جاتىرمىز», دەدى.