اقتاۋداعى «Zhamal-ai LTD» جاۋاپكەرشىلىگى شەكتەۋلى سەرىكتەستىگى جيىرما بەس جىلدان استام ۋاقىت تىنباي جۇمىس ىستەپ كەلەدى. شيرەك عاسىر ىشىندە وزىندىك باعىت-باعدارىن قالىپتاستىرىپ, تاجىريبەسىن تولىقتىرعان سەرىكتەستىك وتاندىق نارىقتا ءوزىن تەك ۇزدىك جاعىنان كورسەتىپ ءجۇر.
مۇنايشىلارعا, اسكەري كۇش قۇرىلىمدارىنا, قۇقىق قورعاۋشىلارعا, مەديتسينا قىزمەتكەرلەرىنە ارنايى كيىمدەر, ليتسەي وقۋشىلارى ءۇشىن مەكتەپ فورماسىن تىگۋمەن قاتار, جۇمىسشى كيىمى مەن اياق كيىمدەرىن وندىرەتىن كاسىپورىن ەندى حالىققا ارنالعان كۇندەلىكتى اياق كيىم شىعارۋعا كىرىستى.
ساپالى ونىمىمەن, جوعارى ۇجىمدىق ۇيىمداستىرۋشىلىق ەرەكشەلىگىمەن جەڭىل ونەركاسىپ سالاسىندا بىرنەشە رەت قالالىق, وبلىستىق جانە رەسپۋبليكالىق كورمەلەردىڭ جۇلدەگەرى اتانعان كاسىپورىندا 160 ادام ەڭبەك ەتەدى. تسەحتارى زاماناۋي جوعارى تەحنولوگيالىق جابدىقتارمەن قامتاماسىز ەتىلگەن كاسىپورىنعا ءوندىرىستى كەڭەيتۋ ماقساتىندا 2017 جىلى 100% ماقتادان جاسالعان كيىمدەر تىگۋ تەحنولوگياسى ەنگىزىلدى. پولو جەيدەلەرى, ۇزىن جانە قىسقا جەڭدى فۋتبولكالار, بالالار پولوسى, بالالار سپورت كيىمى وسى ساناتقا جاتادى. قازىرگى ۋاقىتتا نارىقتاعى بارلىق ءونىم تۇتىنۋشىلاردىڭ ۇلكەن سۇرانىسىنا يە.
«Zhamal-ai LTD» جاۋاپكەرشىلىگى شەكتەۋلى سەرىكتەستىگى ديرەكتورى زيبيرا حاسانوۆانىڭ ايتۋىنشا, كاسىپورىن جىلىنا 19 مىڭ دانا ارنايى كيىم, 100 مىڭ جۇپ ارنايى اياق كيىم مەن 30 مىڭ جۇپ ماكاسين دايىندايدى. كەيبىر اياق كيىمدەردىڭ تابانى وسىندا قۇيىلادى. شيكىزاتتار رەسەي مەن يتاليا, تۇركيادان جەتكىزىلۋدە. كاسىپورىننىڭ «Sharkey» برەندى – ءساندى, ادەمى جانە جوعارى ساپالى بىلعارىدان جاسالعان اياق كيىم. بارلىق وتباسىنا, ياعني ەر ادام, ايەل, بالالارعا ارنالعان اياق كيىمدەر ساپاسى جاعىنان جاقسى تانىلعان وتاندىق ءونىم ساناتىندا. ساپالى ونىمدەر اقتاۋ مەن جاڭاوزەن قالالارىندا ساۋدالانۋدا, سونداي-اق استانا مەن الماتى قالالارىندا ساۋدا نۇكتەلەرى بار.
ءونىم وندىرۋدە وزىندىك ورنەگىن قالىپتاستىرعان «Zhamal-ai LTD» سەرىكتەستىگى جەڭىل ونەركاسىپ پەن جيھاز جاساۋشىلار اراسىنان ماڭعىستاۋدا العاشقى بولىپ يندۋستريالىق سەرتيفيكاتقا يە بولدى. يندۋستريالىق سەرتيفيكات مەملەكەتتىك ساتىپ الۋعا قاتىسۋعا, وتاندىق تاۋارلاردى, جۇمىستار مەن قىزمەتتەردى شەتەلدە كورسەتۋ بويىنشا شىعىنداردى وتەۋگە رۇقسات بەرەدى. «بۇعان دەيىن ءوندىرىس وشاعى ست KZ سەرتيفيكاتىمەن ءونىم شىعارىپ كەلدى. جاڭا سەرتيفيكاتتى الۋ ءۇشىن ءتيىستى دالەلدى قۇجاتتار جيناقتالدى. ءوندىرىس عيماراتىن, ءوندىرىس قارقىندىلىعىن, وتاندىق ءونىم ءوندىرۋ شىنايىلىعىن, تەحنيكالاردى ارنايى كوميسسيا تەكسەردى. تالاپتارعا ساي كەلگەندىكتەن اتالعان سەرتيفيكاتتى العاش وسى كاسىپورىنعا بەرۋگە شەشىم قابىلداندى», دەيدى سەرتيفيكاتتاۋ جونىندەگى ينجەنەر بولات دۇيسەكەشەۆ.
ماڭعىستاۋ وبلىسى كاسىپكەرلەر پالاتاسىنىڭ سەرتيفيكاتتاۋ جونىندەگى 1-ساناتتى مامانى اسحات ىسقاقوۆتىڭ ايتۋىنشا, «Zhamal-ai LTD» سەرىكتەستىگى 268 تاۋار تۇرىنە ارنالعان يندۋستريالىق سەرتيفيكاتقا يە.
اتىراۋدان ءوز نۇكتەلەرىن اشۋدى جوسپارلاپ وتىرعان سەرىكتەستىك كۇزدە ماسكەۋدە وتەتىن كورمەگە قاتىسىپ, حالىقارالىق نارىققا جول سالماق. «قازاقستاندا جاسالعان» تاڭباسىمەن وتاندىق تاۋارلاردىڭ ەكسپورت اياسىن كەڭەيتۋدى ماقسات ەتكەن كاسىپورىننىڭ تاۋارلارى تالعامعا تاتيتىنى انىق.
ماڭعىستاۋ وبلىسى